រាជធានីភ្នំពេញ ៖ បុរសម្នាក់ជាអ្នករត់ឡំប្រឺតាឥណ្ឌា បានត្រូវក្រុមចោរវាយប្លន់ខណៈហៅជិះថាទៅផ្ទះសង្សារ លុះពេលទៅដល់កន្លែងស្ងាត់ក៏ធ្វើសកម្មភាពវាយប្លន់យកកាបូបលុយនិងទូរស័ព្ទ រួចយកទាំងឡំប្រឺតាទៅជាមួយផង។ ហេតុការណ៍នេះ បង្កឱ្យមានការភ្ញាក់ផ្អើលឡើងកាលពីវេលាម៉ោង៦ល្ងាចថ្ងៃទី២៤ ខែមិថុនា នៅតាមផ្លូវលំទល់មុខវត្តស្រះ…
រាជធានីភ្នំពេញ ៖ បុរសម្នាក់ជាអ្នករត់ឡំប្រឺតាឥណ្ឌា បានត្រូវក្រុមចោរវាយប្លន់ខណៈហៅជិះថាទៅផ្ទះសង្សារ លុះពេលទៅដល់កន្លែងស្ងាត់ក៏ធ្វើសកម្មភាពវាយប្លន់យកកាបូបលុយនិងទូរស័ព្ទ រួចយកទាំងឡំប្រឺតាទៅជាមួយផង។ ហេតុការណ៍នេះ បង្កឱ្យមានការភ្ញាក់ផ្អើលឡើងកាលពីវេលាម៉ោង៦ល្ងាចថ្ងៃទី២៤ ខែមិថុនា នៅតាមផ្លូវលំទល់មុខវត្តស្រះ ស្ថិតក្នុងសង្កាត់កំបូល ខណ្ឌពោធិ៍សែនជ័យ ។
ជនរងគ្រោះឈ្មោះ សែម សេងហួរ អាយុ៣៦ឆ្នាំ ស្នាក់នៅក្នុងសង្កាត់ស្វាយប៉ាក ខណ្ឌឫស្សីកែវ និងមានស្រុកកំណើតនៅភូមិបុសខ្នុរ ឃុំបុសខ្នុរ ស្រុកចំការលើ ខេត្តកំពង់ចាម ជាម្ចាស់ឡំប្រឺតាឥណ្ឌា ពណ៌ក្រហម ពាក់ផ្លាកលេខ ភ្នំពេញ ១HB-៧៤១០ ។
ជនរងគ្រោះបាននិយាយថា នៅល្ងាចថ្ងៃនោះ រូបគាត់បាត្រូវជនមួយមានគ្នា៣នាក់ ហៅឱ្យដឹកទៅផ្ទះសង្សាររបស់គេនៅម្តុំវត្តឃ្មួញដោយដឹកពីម្តុំគីឡូម៉ែត្រលេខ៦ ក្នុងតម្លៃ២៥.០០០រៀល ។ ប៉ុន្តែពេលដឹកគឺតាមផ្លូវលំដែលមិនមែនជាផ្លូវទៅវត្តឃ្មួញ តែពួកគេនិយាយថាផ្លូវហ្នឹងហើយមិនច្រឡំទេ។ លុះទៅដល់កន្លែងស្ងាត់ស្រាប់តែពួកគេឲ្យគាត់ឈប់ បន្ទាប់មកបានវាយគាត់ជាច្រើនដៃចំកណ្តាលមុខ បណ្តាលឱ្យបែកបែកឈាមហូរពេញផ្ទៃមុខ ហើយយកកាំបិតភ្ជង់សង្កត់ចុះក្រោមមិនឱ្យគាត់រើបម្រះ ។
ជនរងគ្រោះរៀបរាប់ទៀតថា ក្រុមចោរបានភ្ជង់នឹងសង្កត់កគាត់ចុះក្រោមនៅក្នុងឡំប្រឺតា ដោយជនសង្ស័យម្នាក់ជាអ្នកបើក ហើយ២នាក់ទៀតជាអ្នកសង្កត់និងភ្ជង់ ដឹកចេញពីកន្លែងកើតហេតុជាច្រើនម៉ែត្រនៅជិតវត្តពោធិវ័ន ។ ពេលនោះដោយឃើញមានភ្លើងភ្លឺ គាត់ក៏ស្រែកឱ្យគេជួយ ហើយចោរបានធាក់គាត់ទម្លាក់់ពីលើឡំប្រឺតា ឯជនសង្ស័យក៏បើកឡំប្រឺតារត់ ។ ភ្លាមៗ គាត់បានឱ្យអ្នកស្រុកជួយតាមប្រមាញ់
ក្រុមចោរ និងប្តឹងសមត្ថកិច្ចឱ្យជួយអន្តរាគមន៍ភ្លាមៗដែរ ។
មិនដឹងថា ចោរទាំង៣នាក់មានបញ្ហាអ្វីនោះទេ ពេលបើកមកដល់ខ្លោងទ្វារវត្តពោធិវ័ន ក៏បានប្លុងឡំប្រឺតាចោល ហើយរត់គេចខ្លួនបាត់ ទោះបីសមត្ថកិច្ចខំដេញតាមក៏តាមមិនទាន់ ។ក្រោយពេលកើតហេតុ ជនរងគ្រោះដោយសារតែវង្វេងកន្លែងកើតហេតុរកមិនឃើញ ហើយសមត្ថកិច្ចនាំជនរគ្រោះរកទីតាំងខាងលើជាច្រើនម៉ោងទើបរកឃើញ និងឲ្យជនរងគ្រោះទៅដាក់ពាក្យបណ្តឹងនៅប៉ុស្តិ៍គរបាលកំបូលដើម្បីឲ្យសមត្ថកិច្ចស្រាវជ្រាវរកក្រុមចោរ ៕
ចែករំលែកព័តមាននេះ