សហរដ្ឋអាមេរិក ៖ តាមប្រភពព័ត៌មាន Metro បានឲ្យដឹងថា ស្ត្រីអាយុ៤៧ឆ្នាំស្លាប់យ៉ាងអាណោចអាធ័ម ដោយសារត្រូវបានសត្វក្រពើស៊ីគួរឱ្យរន្ធត់ ខណៈពេលដែលគាត់កំពុងបណ្តើរឆ្កែនៅក្នុងឧទ្យាន Silver Lakes Rotary Nature Park រដ្ឋផ្លរីដា។
សាកសពរបស់ស្ត្រីខាងលើឈ្មោះ Shizuka Matsuki មិនទាន់រកឃើញនៅឡើយទេ ក្រោយពេលបាត់ខ្លួនកាលពីម្សិលមិញ។ ហើយតាមសម្តីប៉ូលិសបានឲ្យដឹងថា គាត់បានស្លាប់ដោយសារតែសត្វក្រពើស៊ី ពេលដែលគាត់កំពុងតែបណ្តើរឆ្កែក្នុងឧទ្យាន។
បើតាមសាក្សីឃើញនៅកន្លែងកើតហេតុថា ពេលជនរងគ្រោះកំពុងបណ្តើរឆ្កែពីរក្បាល។ គាត់ក៏ទូរស័ព្ទទៅប៉ូលិស ក្រោយពេលឃើញតែសត្វឆ្កែព្រុសដាក់ទឹកបឹង ខណៈដែលម្ចាស់វាបានបាត់ខ្លួនទៅហើយ។ ក្រោយមកទើបដឹងថា ក្នុងបឹងនោះមានសត្វក្រពើ ហើយគេបានចាប់វា និងសម្លាប់សត្វក្រពើនោះ ដើម្បីធ្វើការពិនិត្យ។ លទ្ធផលគឺវិជ្ជមានដែលបញ្ជាក់ថា ស្ត្រីឈ្មោះ Matsuki ពិតជាបានស្លាប់ដោយសារតែសត្វក្រពើនោះស៊ីពិតប្រាកដមែន។
ការវាយប្រហារដោយសត្វក្រពើមកលើមនុស្សមានការថយចុះនាពេលបច្ចុប្បន្ន តែសម្រាប់ប្រជាជននៅរដ្ឋផ្លរីដាវិញ មានការប្រឈមមុខខ្ពស់ បើតាមការសិក្សារបស់ Wildlife Commission៕
ចែករំលែកព័តមាននេះ