រាជធានីភ្នំពេញ ៖ សន្និសីទអន្តរជាតិលើកទី២ ស្តីពី កិច្ចព្រមព្រៀងទទួលស្គាល់គ្នាទៅវិញទៅមកលើអ្នកជំនាញទេសចរណ៍អាស៊ាន ក្រោមប្រធានបទ «អភិវឌ្ឍន៍ធនធានមនុស្ស ដើម្បីការអភិវឌ្ឍវិស័យទេសចរណ៍ប្រកបដោយនិរន្តរភាព» ដែលមានរយៈពេល២ថ្ងៃ (២០-២១…
រាជធានីភ្នំពេញ ៖ សន្និសីទអន្តរជាតិលើកទី២ ស្តីពី កិច្ចព្រមព្រៀងទទួលស្គាល់គ្នាទៅវិញទៅមកលើអ្នកជំនាញទេសចរណ៍អាស៊ាន ក្រោមប្រធានបទ «អភិវឌ្ឍន៍ធនធានមនុស្ស ដើម្បីការអភិវឌ្ឍវិស័យទេសចរណ៍ប្រកបដោយនិរន្តរភាព» ដែលមានរយៈពេល២ថ្ងៃ (២០-២១ ខែមិថុនា ឆ្នាំ២០១៨) នៅសណ្ឋាគារសុខាភ្នំពេញ បានបញ្ចប់ហើយនារសៀលថ្ងៃទី២១ ខែមិថុនា កន្លងមកនេះ ។
ឆ្លងតាមរយៈកិច្ចពិភាក្សាក្នុងរយៈពេល២ថ្ងៃនេះ អង្គសន្និសីទសម្រេចបាននូវសមិទ្ធផលជាច្រើន ជាពិសេស ប្រមូលបានធាតុចូលសំខាន់ៗក្នុងការអភិវឌ្ឍវិស័យទេសចរណ៍ប្រកបដោយចីរភាព ។
បើតាមរដ្ឋមន្ត្រីក្រសួងទេសចរណ៍ លោក ថោង ខុន បានបង្ហាញថា អង្គសន្និសីទបានកត់សម្គាល់ពីភាពរីកចម្រើននៃបច្ចេកវិទ្យាពិភពលោក ដែលមានឥទ្ធិពលលើប្រព័ន្ធ និងសមាសធាតុនៃអភិក្រម ការអប់រំបណ្តុះបណ្តាលឲ្យស្របតាមការរីកចម្រើននៃបច្ចេកវិទ្យា ។ ដូច្នេះ ការបណ្តុះបណ្តាលត្រូវតម្រង់ទិសយុវជនឲ្យមានលទ្ធភាពត្រៀមទទួលយកនូវជំនាញថ្មីៗបន្ថែមទៀតនាពេលបច្ចុប្បន្ន និងអនាគត ។
លោករដ្ឋមន្ត្រីបានបន្ដថា អង្គសន្និសីទក៏បានមើលឃើញពីសារសំខាន់នៃការសំយោគបញ្ចូលគ្នា ដោយត្រូវរៀបចំកម្មវិធី និងប្រព័ន្ធបណ្តុះបណ្តាលក្នុងតំបន់អាស៊ាន ដែលជាមូលដ្ឋានរួមប្រកបដោយភាពបត់បែន ស្របតាមស្ថានភាពជាក់ស្តែងនៃប្រទេសជាសមាជិកនីមួយៗ។ ទន្ទឹមនឹងនោះ ក៏បានមើលឃើញពីភាពចាំបាច់នៃតួនាទីរបស់ភាគីឯកជន ក្នុងការចូលរួមបណ្តុះបណ្តាលដោយផ្ទាល់នៅទីតាំងអាជីវកម្ម ដើម្បីរក្សាមូលធនមនុស្សក្នុងក្រុមហ៊ុនអាជីវកម្មរបស់ខ្លួនផង ក៏ដូចជាផ្សារភ្ជាប់ការសិក្សាក្នុងថ្នាក់ទៅនឹងការអនុវត្តជាក់ស្តែងផង ។
លោករដ្ឋមន្ត្រីបន្ថែមទៀតថា អង្គសន្និសីទក៏បានកត់សម្គាល់ពីសារសំខាន់នៃកិច្ចសហប្រតិបត្តិការរវាងស្ថាប័នរដ្ឋនិងឯកជន អង្គការជាតិនិងអន្តរជាតិ ព្រមទាំងដៃគូអភិវឌ្ឍន៍ក្នុងការជំរុញការវាយតម្លៃ និងបណ្តុះបណ្តាលអ្នកជំនាញទេសចរណ៍ប្រកបដោយគុណភាព និងផលិតភាពការងារខ្ពស់ ជាពិសេស ក្នុងស្មារតីនៃកិច្ចព្រមព្រៀងទទួលស្គាល់គ្នាទៅវិញទៅមក លើអ្នកជំនាញទេសចរណ៍អាស៊ាន (ASEAN MRA-TP) ។
ទន្ទឹមនឹងនោះ អង្គសន្និសីទបានគូសបញ្ជាក់ពីភាពចាំបាច់ក្នុងការជំរុញការសិក្សាពេញមួយជីវិត (Lifelong Learning) តាមរយៈការដាក់ចុះនូវវិថីអភិវឌ្ឍជំនាញ (Career Pathway) ដែលក្នុងនោះត្រូវគិតគូរដល់ការបណ្តុះបណ្តាលអ្នកជំនាញថ្មី និងអ្នកជំនាញកំពុងបម្រើការងារបច្ចុប្បន្ន តាមរយៈការវាយតម្លៃការសិក្សាពីមុន(Recognition of Prior Learning) និងការពង្រឹងសមត្ថភាពបន្ថែម ។ អង្គសន្និសីទបានកត់សម្គាល់ពីភាពចាំបាច់របស់វិស័យទេសចរណ៍ ក្នុងការចូលរួមសម្រេចគោលដៅប្រកបដោយនិរន្តរភាព(SDGs)របស់អង្គសហប្រជាជាតិ ជាពិសេស តាមរយៈការអប់រំបណ្តុះបណ្តាលអ្នកជំនាញទេសចរណ៍ ។
លោកថា ផ្តើមចេញពីការកត់សម្គាល់ខាងលើ អង្គសន្និសីទក៏បានកោតសរសើរ និងអបអរសាទរចំពោះរាជរដ្ឋាភិបាលកម្ពុជា ដែលបានយកចិត្តទុកដាក់ក្នុងការអភិវឌ្ឍធនធានមនុស្សក្នុងវិស័យទេសចរណ៍ ឆ្លើយតបទៅនឹងកិច្ចព្រមព្រៀង MRA-TP ព្រមទាំងបានជំរុញការបង្កើតសាលាជាតិបណ្តុះបណ្តាលវិជ្ជាជីវៈទេសចរណ៍ និងវិទ្យាស្ថានជាតិទេសចរណ៍ ក៏ដូចជាបង្កើតឲ្យមានគោលនយោបាយក្នុងការទទួលស្គាល់សាលាបណ្តុះបណ្តាលជំនាញវិជ្ជាជីវៈទេសចរណ៍ឯកជនជាដៃគូ ក្នុងការអនុវត្តកម្មវិធីសិក្សាអាស៊ាន (ASEAN MRA-TP) ផងដែរ ។
ទន្ទឹមនឹងនេះ អង្គសន្និសីទបានអបអរសាទរចំពោះធនាគារ និងគ្រឹះស្ថានមីក្រូហិរញ្ញវត្ថុ មួយចំនួននៅកម្ពុជា ក្រោមការគាំទ្ររបស់រាជរដ្ឋាភិបាល ដែលបានដាក់ចេញអនុវត្តនូវកម្មវិធីឥណទានកម្ចីដល់សិស្សសម្រាប់ជំនាញទេសចរណ៍ (Study Loans for Tourism Skills) ព្រមទាំងវាយតម្លៃខ្ពស់ចំពោះសមិទ្ធផលរបស់កម្ពុជា ក្នុងការបង្កើតឲ្យមានកម្មវិធីបណ្តុះបណ្តាលជំនាញទេសចរណ៍តាមស្តង់ដាអាស៊ាន នៅតាមវិទ្យាល័យចំណេះទូទៅ និងបច្ចេកទេស ដោយសហការជាមួយក្រសួងអប់រំ យុវជន និងកីឡា ក៏ដូចជាក្រសួងការងារ និងបណ្តុះបណ្តាលវិជ្ជាជីវៈ ៕
ចែករំលែកព័តមាននេះ