សហរដ្ឋអាមេរិក ៖ ប្រធានាធិបតីអាមេរិកលោកដូណាល់ត្រាំប្រកាសថា កូរ៉េខាងជើងនាថ្ងៃទី២០ មិថុនា បានប្រគល់សាកសពទាហានអាមេរិក២០០នាក់ ដែលបាត់ខ្លួនក្នុងសម័យសង្គ្រាមកូរ៉េ។ ក្នុងការប្រមូលផ្ដុំមនុស្សមួយនៅទីក្រុង DULUTH រដ្ឋមីនីសូតា…
សហរដ្ឋអាមេរិក ៖ ប្រធានាធិបតីអាមេរិកលោកដូណាល់ត្រាំប្រកាសថា កូរ៉េខាងជើងនាថ្ងៃទី២០ មិថុនា បានប្រគល់សាកសពទាហានអាមេរិក២០០នាក់ ដែលបាត់ខ្លួនក្នុងសម័យសង្គ្រាមកូរ៉េ។
ក្នុងការប្រមូលផ្ដុំមនុស្សមួយនៅទីក្រុង DULUTH រដ្ឋមីនីសូតា ប្រធានាធិបតីអាមេរិកថ្លែងថា យើងបានទទួលបណ្ដាមហាវីរៈបុរសរបស់យើងដែលបានពលីជីវិត ដោយសាកសពពួកគេបញ្ជូនមកនាថ្ងៃនេះ២០០នាក់រួចហើយ។ បណ្ដាអ្នកទទួលខុសត្រូវអាមេរិក ថ្លែងនាថ្ងៃទី១៩ មិថុនាថា កូរ៉េខាងជើងនឹងបញ្ជូននាប៉ុន្មានថ្ងៃខាងមុខ នូវសាកសពទាហានអាមេរិកច្រើននាក់ ដល់ទីបញ្ជាការដ្ឋានអង្គការសហប្រជាជាតិនៅកូរ៉េខាងត្បូង ហើយសាកសពទាហានអាមេរិកទាំងនោះ បន្ទាប់មកបញ្ជូនមកកាន់មូលដ្ឋានអាកាសចរណ៍ HICKAMកោះហាវ៉ៃ។
ក្រោយការជួបគ្នាកំពូលជាប្រវត្តិសាស្ត្រនាថ្ងៃទី១២ មិថុនា ជាមួយមេដឹកនាំកូរ៉េខាងជើង លោកគីម ជុងអ៊ុន លោកដូណាល់ ត្រាំ ថ្លែងក្នុងសន្និសីទសារព័ត៌មានមួយថា កូរ៉េខាងជើងយល់ព្រមប្រគល់បណ្ដាសាកសពទាហានអាមេរិក។
យោងតាមទិន្នន័យអាមេរិកថា ទាហានអាមេរិកប្រមាណ៧៧០០នាក់ បាត់ខ្លួនចាប់តាំងពីសង្គ្រាមកូរ៉េឆ្នាំ១៩៥០-១៩៥៣មក។ កន្លងមក កូរ៉េខាងជើងធ្លាប់បញ្ជាក់ថា បានរក្សាទុកសាកសពទាហានអាមេរិក២០០នាក់។ ទាហានអាមេរិកជាង៣៦៥០០នាក់ស្លាប់ក្នុងជម្លោះនេះ។ បណ្ដាសាកសពទាហានអាមេរិកធ្លាប់ប្រគល់លើកចុងក្រោយកាលពីឆ្នាំ២០០៧ ពេលទស្សនកិច្ចនៅក្រុងព្យុងយ៉ាង របស់អភិបាលរដ្ឋញូវម៉ិកស៊ិក នាសម័យនោះលោក BILL RICHARSON៕
ចែករំលែកព័តមាននេះ