វិស័យឯកជនបង្កើតមូលនិធិអាជីវកម្មសម្រាប់ជួយសហគ្រិនវ័យក្មេង
- ភ្នំពេញ
រាជធានីភ្នំពេញ ៖ ក្នុងគោលដៅជួយដល់សហគ្រិនវ័យក្មេង និងជំរុញសេដ្ឋកិច្ចឌីជីថលនៅកម្ពុជា លោកឧកញ៉ា សៀ ឫទ្ធី ប្រធានសម្ព័ន្ធក្រុមហ៊ុន Worldbridge Group…
រាជធានីភ្នំពេញ ៖ ក្នុងគោលដៅជួយដល់សហគ្រិនវ័យក្មេង និងជំរុញសេដ្ឋកិច្ចឌីជីថលនៅកម្ពុជា លោកឧកញ៉ា សៀ ឫទ្ធី ប្រធានសម្ព័ន្ធក្រុមហ៊ុន Worldbridge Group…
រាជធានីភ្នំពេញ ៖ ក្នុងគោលដៅជួយដល់សហគ្រិនវ័យក្មេង និងជំរុញសេដ្ឋកិច្ចឌីជីថលនៅកម្ពុជា លោកឧកញ៉ា សៀ ឫទ្ធី ប្រធានសម្ព័ន្ធក្រុមហ៊ុន Worldbridge Group បានបោះទុនចំនួន៥លានដុល្លារបង្កើតមូលនិធិអាជីវកម្មកម្ពុជា(OOCTANE) ដើម្បីជួយដល់ក្រុមហ៊ុនអាជីវកម្មដំបូង ហៅកាត់ថា Start Up និងអាជីវកម្មខ្នាតតូច និងមធ្យម ហៅកាត់ថា (SMEs) ដែលប្រើបច្ចេកវិទ្យាឌីជីថល ។
លោកឧកញ៉ា សៀ ឫទ្ធី មានប្រសាសន៍ នាព្រឹកថ្ងៃទី១៩ មិថុនា ថា ការបង្កើតមូលនិធិនេះ ក្នុងគោលបំណងជំរុញឲ្យកម្ពុជាឈានទៅរកសេដ្ឋកិច្ចឌីជីថល ដែលរាជរដ្ឋាភិបាលបានគ្រោងទុក ដោយជួយឲ្យក្រុមហ៊ុន Start Up និងអាជីវកម្មខ្នាតតូច និងមធ្យមបែបបច្ចេកវិទ្យាទាំងអស់ដំណើរការបានជោគជ័យ ស្របពេលយុវជនកម្ពុជាជាច្រើនមានគំនិត តែគ្មានធនធានធ្វើឲ្យវាជោគជ័យនៅឡើយ ។
លោកឧកញ៉ាបន្តថា ៖« មូលនិធិនេះផ្ដោតសំខាន់ជួយដល់យុវជនកម្ពុជា ជាក្រុមដែលមានគំនិតល្អក្នុងការបង្កើតអាជីវកម្មថ្មី និងអាជីវកម្មខ្នាតតូច និងមធ្យម លើវិស័យមានសក្ដានុពលមួយចំនួនដូចជា ក្នុងវិស័យដឹកជញ្ជូនភស្តុភារ ពាណិជ្ជកម្មអនឡាញ បច្ចេកវិទ្យាហិរញ្ញវត្ថុ បច្ចេកទេសកសិកម្ម បច្ចេកវិទ្យាអប់រំ ជីវសាស្ត្រ និងទេសចរណ៍ ជាដើម » ។
លោកឧកញ៉ាបន្ថែមថា ដើម្បីទទួលបានជំនួយថវិកាពីមូលនិធិនេះ យុវជនដែលមានទេពកោសល្យ ត្រូវតែមានគំនិតអាជីវកម្មច្បាស់លាស់សមស្របនឹងគោលដៅរបស់មូលនិធិ ។ ក្រៅពីជំនួយហិរញ្ញវត្ថុ មូលនិធិនឹងជួយជាធនធានមនុស្សបន្ថែមទៀត ដើម្បីជំរុញឲ្យគំនិតអាជីវកម្មនោះដំណើរការបានជោគជ័យ ។
តាមការបញ្ជាក់បន្ថែមរបស់លោកឧកញ៉ា ការវិនិយោគនឹងចាប់ផ្ដើមពី៥ពាន់ដុល្លារ ទៅ១ម៉ឺនដុល្លារសម្រាប់ការចាប់ផ្ដើមដំបូងរបស់ក្រុមហ៊ុនអាជីវកម្ម ។ លើសពីនេះ សម្រាប់អាជីវកម្មដែលមានផលិតផលប្រើប្រាស់ក្នុងទីផ្សាររួចហើយ អាចទទួលបានពីមូលនិធិរហូតដល់២ម៉ឺន៥ពាន់ដុល្លារក្នុង១ក្រុមហ៊ុន ។ លោកឧកញ៉ាបានបង្ហើបទៀតថា មូលនិធិនេះគ្រោងនឹងពង្រីករហូតដល់២៥ទៅ៣០លានដុល្លារអាមេរិកនៅឆ្នាំក្រោយផងដែរ ។
លោកបញ្ជាក់ថា មូលនិធិដែលបង្កើតឡើងនៅពេលនេះ មិនមែនជាធនាគារ ឬមីក្រូហិរញ្ញវត្ថុសម្រាប់ផ្ដល់ឥណទានដល់សហគ្រិនក្នុងការធ្វើអាជីវកម្មទេ ប៉ុន្តែវាជាមូលនិធិជួយដល់សហគ្រិនណាដែលមានគំនិតច្នៃប្រឌិតបង្កើតអាជីវកម្មថ្មីៗ ដើម្បីអភិវឌ្ឍន៍សង្គម ។
ការបង្កើតមូលនិធិអាជីវកម្មកម្ពុជា ធ្វើឡើងស្របគ្នាជាមួយគំនិតផ្ដួចផ្ដើមរបស់រាជរដ្ឋាភិបាល ក្នុងការផ្លាស់ប្ដូរសេដ្ឋកិច្ចកម្ពុជា ទៅជាសេដ្ឋកិច្ចឌីជីថល នៅឆ្នាំ២០២៣ ខាងមុខ ។
ទីប្រឹក្សាផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Markets Consulting លោក ង៉ែត ជូ បានថ្លែងថា ការផ្តល់មូលនិធិនេះ ដើម្បីលើកស្ទួយសហគ្រិនវ័យក្មេង គឺជារឿងល្អប្រសើរមួយ ប៉ុន្តែតើមូលនិធិនេះនឹងគិតដូចម្តេចទាក់ទងនឹងអត្រាការប្រាក់ វាជារឿងមួយទៀត ហើយការបណ្តុះបណ្តាលអ្នកចង់ចាប់ផ្តើមជំនួញវ័យក្មេងជារឿងចាំបាច់មួយទៀត ដើម្បីធ្វើឲ្យប្រាកដថា សហគ្រិនទាំងនោះអាចប្រើប្រាស់មូលនិធិបានត្រឹមត្រូវ និងទទួលបានជោគជ័យក្នុងអាជីវកម្មរបស់ពួកគេ ។
លោកបន្តថា ៖« ការភ្ញាស់សហគ្រិន និងផ្តល់ការបណ្តុះបណ្តាលដល់ពួកគេមានសារសំខាន់ណាស់ ដើម្បីធ្វើឲ្យមូលនិធិនេះទទួលបានការគាំទ្រ និងជោគជ័យ » ។
លោក កាន ច័ន្ទមេត្តា រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានមានប្រសាសន៍ថា បច្ចុប្បន្ន បើក្រឡេកមើលពីសក្ដានុពលបង្កើតអាជីវកម្មបច្ចេកវិទ្យានៅកម្ពុជា ឃើញថា មានសហគ្រិនក្មេងៗជាច្រើនបានចាប់អារម្មណ៍លើការវិនិយោគវិស័យបច្ចេកវិទ្យា ប៉ុន្តែការចុះបញ្ជីចាប់ផ្ដើមអាជីវកម្មជាផ្លូវការនៅមានតិចតួចប៉ុណ្ណោះ ។ អ្វីដែលពួកគេកំពុងជួបប្រទះសម្រាប់អាជីវកម្មនោះ គឺកង្វះខាតហេដ្ឋារចនាសម្ព័ន្ធ និងមិនដឹងថា ពួកគេត្រូវចាប់ផ្ដើមពីត្រង់ណាមុន ។
ដោយឡែក លោក គួច ផែង ប្រធានសមាគមសហគ្រិនវ័យក្មេងកម្ពុជា បានឲ្យដឹងដែរថា បច្ចុប្បន្ននេះ លោកសង្កេតឃើញសហគ្រិនវ័យក្មេងមានគំនិតច្នៃប្រឌិតច្រើនលើការបើកដំណើរការអាជីវកម្ម ប៉ុន្តែពួកគេនៅមានបញ្ហាប្រឈម ដែលមិនអាចដំណើរការអាជីវកម្មបាន ដូចជា កង្វះខាតហិរញ្ញវត្ថុ និងកង្វះខាតប្រព័ន្ធគ្រប់គ្រងច្បាស់លាស់ ។ ដូចនេះ បើសិនជាមានមូលនិធិណាជួយពួកគេនោះ ដំណើរការអាជីវកម្មថ្មីៗនៅកម្ពុជានឹងផ្ដើមកកើតច្រើន ហើយវានឹងជួយឲ្យកម្ពុជាកាន់តែមានការវិនិយោគច្រើន ។ លោកថា ៖« នៅពេលដំណើរការអាជីវកម្មបានត្រឹមត្រូវហើយនោះ មិនខ្វះទេទុនសម្រាប់ចូលរួមជាមួយពួកគេ ដូចជា ទុនមកពីក្រៅប្រទេស និងទុននៅក្នុងស្រុក ជាដើម ។ ក៏ប៉ុន្តែជំហានដំបូង គឺពួកគាត់មិនអាច Run Business ភ្លាមៗនៅពេលនេះបានទេ » ៕
ចែករំលែកព័តមាននេះ