រាជធានីភ្នំពេញ ៖ លោក ញ៉េប ប៊ុនជិន អ្នកនាំពាក្យគណបក្សហ្វ៊ុនស៊ិនប៉ិច នៅព្រឹកថ្ងៃទី១៩ ខែមិថុនា ឆ្នាំ២០១៨នេះ បានថ្លែងប្រាប់អ្នកសារព័ត៌មាននៅក្បែររោងបុណ្យសព…
រាជធានីភ្នំពេញ ៖ លោក ញ៉េប ប៊ុនជិន អ្នកនាំពាក្យគណបក្សហ្វ៊ុនស៊ិនប៉ិច នៅព្រឹកថ្ងៃទី១៩ ខែមិថុនា ឆ្នាំ២០១៨នេះ បានថ្លែងប្រាប់អ្នកសារព័ត៌មាននៅក្បែររោងបុណ្យសព អ្នកម្នាង អ៊ុក ផល្លា ថា ពិធីបុណ្យ សពបានចូលដល់ថ្ងៃទី២ជាផ្លូវការ បន្ទាប់ពីសពត្រូវបានដឹកមកតម្កល់នៅក្នុងសាលតម្កល់សព ក្នុងវត្តបទុមវត្តី តាំងពីព្រឹកថ្ងៃទី១៨ ខែមិថុនា។ គណបក្សហ្វ៊ុនស៊ិនប៉ិចទាមទារឲ្យអាជ្ញាធរមានសមត្ថកិច្ច ធ្វើការស៊ើបអង្កេតឲ្យបានច្បាស់លាស់ពីករណីនេះព្រោះវាបានកើតឡើងដដែលបីដង ពេលនេះបាន បាត់បង់ជីវិតមនុស្ស។ លោកថា ការទទួលមរណៈភាពអ្នកម្នាងរហូតដល់ពេលនេះគ្មានការទូលថ្វាយ សម្តេចក្រុមព្រះនៅឡើយទេ ខណៈដែលពេលនេះទ្រង់បានដឹងព្រះកាយ និងអាចមានបន្ទូលបានហើយ។ លោកថា”គណបក្សហ្វ៊ុនស៊ិនប៉ិច មានទុក្ខជាទម្ងន់ ហើយសម្តេចក្រុមព្រះកំពុងសម្រាកព្យាបាលនៅក្នុង មន្ទីរពេទ្យក្រៅប្រទេសមិនទាន់បានដឹងថាអ្នកម្នាងទទួលអនិច្ចកម្មទេ”។ 
លោក ញ៉េប ប៊ុនជិន ថ្លែងទាំងអួលដើមកទៀតថា”យើងទាំងអស់គ្នាមិនទាន់បានទូលថ្វាយសម្តេចព្រះប្រធានដែរដោយយើងចង់លាក់ព័ត៌មាននេះមិនឲ្យទ្រង់ដឹងទេ ទុកឲ្យទ្រង់ជាសះស្បើយសិន”។ លោកថា កម្មវិធីបុណ្យចាប់ពីថ្ងៃទី១៨ដល់២០ខែមិថុនា នឹងបូជាសពវេលាម៉ោង៩ព្រឹក មុខវត្តបទុមវត្តី ហើយសូមអំពាវនាវដល់ជនរួមជាតិដែលស្រឡាញ់អ្នកម្នាង និងសម្តេចក្រុមព្រះចូលរួមពិធីនេះ។ លោកអ្នកនាំពាក្យគណបក្សបានលើកឡើងថា សម្តេចក្រុមព្រះនរោត្តម រណឫទ្ធិ នៅមិនទាន់ដឹងពីអ្នកម្នាងទទួលមរណៈភាពទេ។ លោកថា”យើងមានការបារម្ភចំពោះសម្តេចក្រុមព្រះ ដែលកំពុងសម្រាកនៅមន្ទីរពេទ្យ ហើយនៅពេលទ្រង់ជាសះស្បើយយាងត្រឡប់មកវិញរកអ្នកម្នាង មិនឃើញនេះ។ 
នៅវេលាម៉ោងប្រមាណ១០ និង៣០នាទីព្រឹក ថ្ងៃទី១៩ ខែមិថុនា ឆ្នាំ២០១៨ សម្តេចព្រះមហាក្សត្រី នរោត្តម មុនិនាថ សីហនុ ទ្រង់បានយាងគោរពវិញ្ញាណក្ខន្ធសពអ្នកម្នាង អ៊ុក ផល្លា រណប្ញទ្ធិ ដែលកំពុងត្រូវបានតម្កល់នៅវត្តបុទុមវត្តី ខណ្ឌដូនពេញ មុនធ្វើការបូជានៅថ្ងៃស្អែក។ កាលពីម្សិលមិញ គណបក្សហ្វ៊ុនស៊ិនប៉ិច បានចេញសេចក្តីជូនដំណឹង អំពីការទទួលមរណៈភាពរបស់អ្នកម្នាង អ៊ុក ផល្លារណប្ញទ្ធិ ដោយឧបទ្ទវហេតុគ្រោះថ្នាក់ចរាចរណ៍ នៅពេលដង្ហែសម្តេចក្រុមព្រះ ព្រះប្រធានគណបក្សហ្វ៊ុនស៊ិនប៉ិច យាងទៅសំណេះសំណាល និងសួរសុខទុក្ខប្រជាពលរដ្ឋនៅខេត្តព្រះសីហនុ។ ពិធីបុណ្យសពអ្នកម្នាង អ៊ុក ផល្លា រណប្ញទ្ធិ បានធ្វើឡើងនៅក្នុងបរិវេណវត្តបុទុមវត្តី ខណ្ឌដូនពេញ រាជធានីភ្នំពេញនឹងបូជាសពនៅព្រឹកថ្ងៃពុធ ទី២០ ខែមិថុនា ឆ្នាំ២០១៨ នៅបរិវេណខាងមុខវត្តបទុមវត្តី៕
ចែករំលែកព័តមាននេះ