អង់គ្លេស ៖ តាមប្រភពព័ត៌មាន Oddity Central បានឲ្យដឹងថា សហជីពគ្រូបង្រៀននៅអង់គ្លេសបានសម្រេចចិត្តឈប់ប្រើប្រាស់នាឡិកាមានទ្រនិច ដោយជំនួសមកវិញនូវនាឡិកាមានលេខស្រាប់ ព្រោះតែសិស្សមិនចេះមើល។
អនុប្រធាននៅសមាគមនៃអ្នកដឹកនាំសាលា និងសាកលវិទ្យាល័យ លោក Malcolm Trobe បានឲ្យដឹងថា សិស្សជាច្រើននាក់មិនចេះមើលម៉ោងនៅលើនាឡិកាមានទ្រនិចឡើយ ដោយសារតែគេធ្លាប់តែមើលម៉ោងមានលេខស្រាប់។ នេះក៏ដោយសារតែនៅលើទូរស័ព្ទ ឡេបថប និង គ្រឿងប្រើប្រាស់ផ្សេងទៀតសុទ្ធតែមានម៉ោងជាលេខ។ ដូចនេះសាលាជាច្រើននៅអង់គ្លេសក៏សម្រេចចិត្តប្តូរនាឡិកាមានទ្រនិចចេញ ហើយដាក់មកវិញនូវនាឡិកាមានលេខស្រាប់។ ការធ្វើនេះក៏ដើម្បីកុំឲ្យសិស្សមានភាពលំបាកទៅលើរឿងបន្តិចបន្តួច។
ប្រធានក្រុមវេជ្ជបណ្ឌិតផ្នែកកុមារ Sally Payne បានសម្តែងការព្រួយបារម្ភថា ការធ្វើដូចនេះអាចឲ្យសិស្សកាន់តែពិបាកក្នុងការមិនមានសម្ភារៈទំនើប។ ពួកគេអាចនឹងមិនចេះប្រើសម្ភារៈសាមញ្ញមួយចំនួនដូចជាខ្មៅដៃ និងក្រដាស ដោយសារតែពេលនេះសិស្សមួយចំនួនធំប្រើប្រាស់ iPad ជាមធ្យោបាយក្នុងការកត់ត្រាទៅវិញ។
តើលោកអ្នកមានមតិយ៉ាងណាដែរ ចំពោះការសម្រេចចិត្តរបស់សាលានៅអង់គ្លេស?
ចែករំលែកព័តមាននេះ