ខេត្តស្ទឹងត្រែង ៖ ក្រោយការសាងសង់ក្នុងរយៈពេលច្រើនខែ អគារប៉ុស្តិ៍សុខភាព រួមទាំងអគារ បណ្តុះបណ្តាលវិជ្ជាជីវៈ នៃពន្ធនាគារខេត្តស្ទឹងត្រែង បានដាក់សម្ពោធឲ្យប្រើប្រាស់ជាផ្លូវការនៅថ្ងៃទី១៤ ខែ មិថុនា ឆ្នាំ២០១៨ ក្រោមអធិបតីភាពឧត្តមអគារនុរក្សថ្នាក់លេខ១ សន្តិបណ្ឌិត ចាន់ គីមសេង អគ្គនាយក នៃនាយកដ្ឋានពន្ធនាគារ ដោយមានការគាំទ្រពីអង្គការម្ចាស់ជំនួយរួមមាន ប្រធានកម្មវិធី សម្របសម្រួលដោយ ប្រធានអង្គការីតាស ប៊ែលហ្ស៊ីក ប្រចាំកម្ពុជា និងអគ្គរាជទូតប៊ែលហ្ស៊ីក ប្រចាំប្រទេសកម្ពុជា ថៃ ឡាវ មីយ៉ាន់ម៉ា។ អគារប៉ុស្តិ៍សុខភាព និងអគារបណ្តុះបណ្តាលវិជ្ជាជីវៈ ពន្ធនាគាខេត្តដែលបានសម្ពោធដាក់ឲ្យប្រើប្រាស់ជាផ្លូវការនាបច្ចុប្បន្ន ប្រធានពន្ធនាគារខេត្តស្ទឹងត្រែង ឧត្តមអគារនុរក្សថ្នាក់លេខ២ លោក ឈឹម ធីតា បញ្ជាក់ថា អគារទាំងពីរនេះ បានសាងសង់ក្នុងបរិវេណ ពន្ធនាគារ ដែលមានទំហំផ្ទៃដីប្រមាណ៤១,២០០ ម៉ែត្រការ៉េ មានចម្ងាយ០៥គីឡូម៉ែត្រពីទីរួមខេត្ត ស្ថិតនៅភូមិបាចុង សង្កាត់ព្រះបាទ ក្រុងស្ទឹងត្រែង ខេត្តស្ទឹងត្រែង។ លោកបន្ថែមថា អគារប៉ុស្តិ៍សុខភាព និងអគារបណ្តុះបណ្តាលវិជ្ជាជីវៈខាងលើ ផ្តើមសាងសង់ឡើងដោយមានជំនួយពីអង្គការការីតាស ខេត្តសៀមរាប។
អង្គការមួយនេះបានផ្តល់ការឧបត្ថមនូវសមិទ្ធផលដល់ពន្ធនាគាររួមមាន ប៉ុស្តិ៍សុខភាពមានទំហំ ១១ម៉ែត្រ គុណ៤ម៉ែត្រ មាន៣បន្ទប់ អគារបណ្តុះបណ្តាលវិជ្ជាជីវៈ មានទំហំ១៧ម៉ែត្រ គុណ៥ម៉ែត្រ មាន០៣បន្ទប់ និងបានសាងសង់អគារជំនាញជួសជុលម៉ូតូទំហំ ៧ម៉ែត្រគុណនឹង៦ម៉ែត្រ រួមទាំងបានជួយផ្តល់ជាសម្ភារបរិក្ខា សម្រាប់ប៉ុស្តិ៍សុខភាព និងឧបកណ៍សម្រាប់បណ្តុះបណ្តាលវិជ្ជាជីវៈមួយចំនួនទៀតផងដែរ។ ឧត្តមអគារនុរក្សថ្នាក់លេខ១ សន្តិបណ្ឌិត លោក ចាន់ គីមសេង អគ្គនាយកនៃនាយកដ្ឋានពន្ធនាគារ បានថ្លែងអំណរគុណ យ៉ាងជ្រាលជ្រៅ ចំពោះអង្គការដៃគូរអភិវឌ្ឍន៍ ពិសេសអង្គការីតាស សម្រាប់ការជួយជ្រោមជ្រែងជាថវិកា ក្នុងការសាងសង់អគារប៉ុស្តិ៍សុខភាព និងអគារបណ្តុះបណ្តាលវិជ្ជាជីវៈ រួមទាំងបានផ្តល់ជាសម្ភារ បរិក្ខាផ្សេងៗជាច្រើនទៀតដល់អង្គភាពពន្ធនាគារ។ លោកនាយកលើកឡើងថា ការសម្ពោធដាក់ឲ្យប្រើប្រាស់អរគារប៉ុស្តិ៍សុខភាព និងអគារបណ្តុះបណ្តាលវិជ្ជាជីវៈនេះបង្ហាញ ឲ្យឃើញនូវជំហ៊ានវិជ្ជមាន និងការរីកចម្រើនថ្មីមួយទៀតបញ្ជាក់ពីកិច្ចសហការយ៉ាងជិតស្និទ្ធ និងកិច្ចខិតខំប្រឹងប្រែងឧបត្ថមគាំទ្រយ៉ាងពេញទំហឹងរបស់អង្គការការីតាស ចំពោះវិស័យពន្ធនាគានៅកម្ពុជា។
ហេដ្ឋារចនាសម្ព័ន្ធថ្មីនេះ ជាផ្នែកមួយនៃការគាំទ្ររបស់អង្គការការីតាស ដើម្បីអភិវឌ្ឍន៍ការយល់ដឹង និងលក្ខណៈផាសុកភាពសម្រាប់ជនជាប់ឃុំ ធានាបាននូវសន្តិសុខ អនាម័យ និងលេចធ្លោស្រមតាមគោលដៅនៃច្បាប់ស្តីពីពន្ធនាគារ។ កត្តាទាំងនេះបានរួមចំណែកធ្វើឲ្យប្រសើរ នូវការគោរពសិទ្ធិជាមូលដ្ឋានរបស់មនុស្ស។ លោកបន្តថា ដោយកិច្ចសហប្រតិបត្តិការក្នុងការគាំទ្រឧបត្ថមនេះនឹងធ្វើឲ្យមានប្រសើរឡើងនូវការអប់រំ កែប្រែ ក៏ដូចជាលើកកម្ពស់សុខមាលភាពជនជាប់ឃុំក្នុងពន្ធនាគារពិសេសបានសម្រួលដល់ជនត្រូវចោទ ជនជាប់ចោទ ពិរុទ្ធជន និងទណ្ឌិតមានឱកាសក្នុងការកែប្រែ និងសិក្សារៀនសូត្រជំនាញ ដើម្បីយកទៅប្រើប្រាស់ប្រកបរបរស្របច្បាប់នៅពេលដែលពួកគេត្រូវបានដោះលែងឲ្យទៅរស់នៅក្នុងសហគមន៍វិញ។ សូមបញ្ជាក់ថា បច្ចុប្បន្ននេះគិតត្រឹមថ្ងៃទី១៤ ខែមិថុនា ឆ្នាំ២០១៨នេះ ជនជាប់ឃុំសរុបចំនួន ៣២៧នាក់ ស្រី២៩នាក់ ក្នុងនោះ ជនត្រូវចោទចំនួន ៧៤នាក់ ស្រី០៤នាក់ ជនជាប់ចោទ ចំនួន៤៤នាក់ ស្រី០៤នាក់ ពីរុទ្ធជន១០៦នាក់ ស្រី០៩នាក់ និងទណ្ឌិត ១០៣នាក់ និងស្រី១២នាក់៕
ចែករំលែកព័តមាននេះ