ខេត្តកំពង់ឆ្នាំង ៖ បុរសម្នាក់បានស្លាប់នៅនឹងកន្លែងកើតហេតុក្នុងគ្រោះថ្នាក់ចរាចរណ៍មួយបានកើតឡើងនៅវេលាម៉ោង៧និង៣០នាទីយប់ថ្ងៃទី១៣ ខែមិថុនា ឆ្នាំ២០១៨ នៅលើកំណាត់ផ្លូវជាតិលេខ៥ ត្រង់ចន្លោះគីឡូម៉ែត្រលេខ១២៦ និង១២៧ ស្ថិតនៅក្នុងភូមិចក ឃុំចក…
ខេត្តកំពង់ឆ្នាំង ៖ បុរសម្នាក់បានស្លាប់នៅនឹងកន្លែងកើតហេតុក្នុងគ្រោះថ្នាក់ចរាចរណ៍មួយបានកើតឡើងនៅវេលាម៉ោង៧និង៣០នាទីយប់ថ្ងៃទី១៣ ខែមិថុនា ឆ្នាំ២០១៨ នៅលើកំណាត់ផ្លូវជាតិលេខ៥ ត្រង់ចន្លោះគីឡូម៉ែត្រលេខ១២៦ និង១២៧ ស្ថិតនៅក្នុងភូមិចក ឃុំចក ស្រុកបរិបូណ៌ ខេត្តកំពង់ឆ្នាំង ។
សមត្ថកិច្ចនគរបាលមូលដ្ឋានបានដឹងថា ជនរងគ្រោះមានឈ្មោះ ផ្លុង សំបុណ្យ អាយុ៣៩ឆ្នាំ មានទីលំនៅភូមិកែវឡាត ឃុំពន្លៃ ស្រុកបរិបូណ៌ ។
មុនពេលកើតហេតុជនរងគ្រោះបានជិះម៉ូតូម៉ាកឌ្រីមសង់១២៥ ពាក់ស្លាកលេខកំពង់ឆ្នាំង1E- 8069 មកពីលេងផ្ទះម្ដាយនៅក្នុងភូមិត្រពាំងចាន់លុះមកដល់ចំណុចកើតហេតុ ស្រាប់តែមានរថយន្តមួយគ្រឿងមិនស្គាល់ម៉ាកបានបុកពេញទំហឹងក្នុងទិសដៅច្រាស់គ្នា បណ្ដាលឲ្យជនរងគ្រោះស្លាប់នៅនឹងកន្លែងកើតហេតុ ចំណែកឯរថយន្តបង្កបានគេចខ្លួនបាត់ ។
ប្រភពដដែលបានបន្តថា ជនរងគ្រោះបានធ្វើដំណើរក្នុងទិសដៅពីលិចមកកើត ហើយតាមការពិនិត្យកន្លែងកើតហេតុសមត្ថកិច្ចសន្និដ្ឋានថា រថយន្តបង្កអាចនឹងវ៉ាជែងរថយន្តមួយគ្រឿងទៀត ក្នុងទិសដៅស្របគ្នា រួចក៏ជ្រុលមកបុកជនរងគ្រោះក្នុងទិសដៅច្រាស់គ្នា បណ្ដាលឲ្យជនរងគ្រោះបោកក្បាលស្លាប់នៅនឹងកន្លែងតែម្តង ។ ពេលនេះសមត្ថកិច្ចកំពុងស្រាវជ្រាវរករថយន្តបង្ក ដើម្បីយកមកផ្តន្ទាទោសតាមផ្លូវច្បាប់ ។ ចំណែកសពជនរងគ្រោះត្រូវបានប្រគល់ជូនក្រុមគ្រួសារធ្វើបុណ្យតាមប្រពៃណី ៕
ចែករំលែកព័តមាននេះ