រាជធានីភ្នំពេញ ៖ ជនសង្ស័យចំនួន៥នាក់បានធ្វើសកម្មភាពលួចគាស់យកគ្រឿងអលង្ការរបស់អ្នកជិតខាងដែលជាអ្នកលក់គ្រឿងសំណង់ម្នាក់ ហើយនាំគ្នាគេចខ្លួនបាត់អស់ ។ ប៉ុន្តែអ្វីដែលបែកការណ៍នោះ គឺក្រោយពេលកើតហេតុ ជនរងគ្រោះបានសុំឆែកកាមេរ៉ាសុវត្ថិភាពផ្ទះអ្នកជិតខាង ដែលបានដំឡើងក្បែរផ្ទះនោះ ក៏បានឃើញក្រុមជនសង្ស័យខាងលើ ចូលធ្វើសកម្មភាពកាត់ចម្រឹងបង្អួចផ្ទះរបស់ខ្លួនចូលលួចគ្រឿងអលង្ការ។ ទោះជាយ៉ាងណា ម្ចាស់ផ្ទះមិនបានដាក់ពាក្យបណ្ដឹងភ្លាមៗទេ ព្រោះរវល់ធ្វើការងារ លុះ៣ថ្ងៃក្រោយមក ជនសង្ស័យញ៉ាមក៏ទៅធ្វើសកម្មភាពគាស់បង្អួចផ្ទះអ្នកជិតខាងម្នាក់ផ្សេងទៀត។ ខណៈនោះ ដោយសារស្គាល់ភិនភាគតាមកាមេរ៉ាសុវត្ថិភាពស្រាប់ផង ទើបអ្នកភូមិរាយការណ៍ជូននគរបាលចាប់ខ្លួនបានម្នាក់នាំទៅសាកសួរនិងឈានដល់ការចាប់ខ្លួនបក្សពួកជាបន្តបន្ទាប់ទៀត ។ ការចាប់ខ្លួននេះ បានធ្វើឡើងកាលពីវេលាម៉ោង៥និង៣០នាទីល្ងាចថ្ងៃទី៩ ខែមិថុនា និងវេលាម៉ោង១០និង៣០នាទីព្រឹកថ្ងៃទី១០ ខែមិថុនា នៅភូមិតាឡី សង្កាត់ដង្កោ ខណ្ឌដង្កោ និងនៅក្បែរគំនរសំរាម ស្ថិតក្នុងភូមិបារគូ សង្កាត់ដង្កោ ខណ្ឌដង្កោ ។
ជនសង្ស័យទាំង៥នាក់នេះ មាន ១-ឈ្មោះ សាន ជាតក់ អាយុ២០ឆ្នាំ មុខរបរមិនពិតប្រាកដ ២-ឈ្មោះ បូ សុខហួន អាយុ២៣ឆ្នាំ មុខរបរមិនពិតប្រាកដ ៣-ឈ្មោះ យុន បញ្ញា អាយុ២៣ឆ្នាំ មុខរបរមិនពិតប្រាកដ ៤-ឈ្មោះ ឌូ រតនា ហៅហុយ អាយុ២៣ឆ្នាំ មុខរបរមិនពិតប្រាកដ ។ ទាំង៤នាក់នេះ ស្នាក់នៅក្បែរគំនរសំរាម ក្នុងភូមិបារគូ សង្កាត់ដង្កោ ខណ្ឌដង្កោ និង៥-ឈ្មោះ នួន លីម អាយុ២២ឆ្នាំ មុខរបរមិនពិតប្រាកដ
(ជននេះត្រូវចាប់ខ្លួនបានមុនគេ) ស្នាក់នៅក្នុងភូមិតាឡី សង្កាត់ដង្កោ ខណ្ឌដង្កោ ។
ចំណែកម្ចាស់ផ្ទះដែលរងគ្រោះឈ្មោះ ឌិន ឡាំ ភេទប្រុស អាយុ៣៣ឆ្នាំ មុខរបរលក់គ្រឿងសំណង់ អាសយដ្ឋានផ្ទះលេខD៩ ផ្លូវលំ ភូមិតាឡី សង្កាត់ដង្កោ ខណ្ឌដង្កោ ។មន្ត្រីនគរបាលឲ្យដឹងថា កាលពីថ្ងៃទី៦ ខែមិថុនា វេលាម៉ោង៥ និង៣០នាទីព្រឹក ម្ចាស់ផ្ទះបានបិទទ្វារផ្ទះនិងទ្វាររបងដោយចាក់សោត្រឹមត្រូវ រួចក៏ចេញទៅធ្វើការរៀងៗខ្លួន ។រហូតដល់វេលាម៉ោង៦និង៣០នាទីល្ងាចទើបត្រឡប់ចូលផ្ទះវិញ ហើយចាក់សោទ្វារនិងដើរចូលទៅក្នុងផ្ទះ ស្រាប់តែភ្ញាក់ព្រើតព្រោះឃើញបង្អួចផ្ទះមានស្នាមគាស់ដាច់ចម្រឹងអស់ ។ បន្ទាប់មក ទៅមើលអីវាន់នៅក្នុងផ្ទះមានសភាពរប៉ាត់រប៉ាយ ហើយគ្រឿងអលង្ការខ្សែកប្លាទីនចំនួន២ខ្សែសរុបទម្ងន់៤ជី រួមនឹងសម្ភារផ្សេងៗមួយចំនួនទៀតត្រូវលួចយកបាត់ ។ប្រភពដដែលបន្តថា បន្ទាប់មក ជនរងគ្រោះបានពឹងពាក់អ្នកជិតខាងសុំឆែកមើលកាមេរ៉ាសុវត្ថិភាពដែដាក់នៅខាងមុខផ្ទះ ឃើញជនឈ្មោះនួន លីម ដែលជាអ្នកភូមិជាមួយគ្នាចូលទៅគាស់ចម្រឹងបង្អួច ចូលលួចយកទ្រព្យសម្បត្តិរបស់ខ្លួនប៉ុន្តែគាត់មិនបានប្ដឹងនគរបាលឡើយ ។
លុះមកដល់ថ្ងៃទី៩ មិថុនា វេលាម៉ោង៥និង៣០នាទីល្ងាច ជនឈ្មោះ នួន លីម ដដែលបានចូលទៅធ្វើសកម្មភាពលួចគាស់បង្អួចផ្ទះអ្នកភូមិម្នាក់ទៀត ខណៈម្ចាស់ផ្ទះនោះមិននៅគឺបិទទ្វារចាក់សោចោល ។ ភ្លាមៗនោះ ដោយដឹងតាមរយៈកាមេរ៉ាសុវត្ថិភាពថា ជនសង្ស័យខាងលើគឺជាចោរគាស់ផ្ទះលក់គ្រឿងសំណង់ ទើបអ្នកភូមិរាយការណ៍ជូននគរបាលខណ្ឌដង្កោ ដែលកំពុងល្បាតជិតនោះស្រាប់ចាប់ខ្លួនភ្លាមៗ រួចនាំទៅសាកសួរ ហើយមកដល់ថ្ងៃទី១០ ខែមិថុនា ក៏ឈានទៅចាប់ខ្លួនបក្សពួក៤នាក់ទៀត ៕
ចែករំលែកព័តមាននេះ