នៅស្ទើរតែគ្រប់ទីតាំងលក់រាយ បោះដុំផលិតផលបារីក្នុងទីផ្សារទូទាំងប្រទេស គឺសុទ្ធតែមានការតាំងលក់ និងការលក់លួចលាក់នូវផលិតផលបារី 555 រួចពន្ធ (duty free) និងក្លែងក្លាយ ក្នុងចំនួនយ៉ាងច្រើនសន្ធឹកសន្ធាប់។ នេះបើតាមរបាយការណ៍របស់ក្រុមហ៊ុនថ្នាំជក់ អង់គ្លេស អាមេរិកាំង កម្ពុជា ដែលជាក្រុមហ៊ុននាំចូលផ្ដាច់មុខផលិតផលបារី 555។
យោងតាមលោក អ៊ុំ រតនា ជាអ្នកនាំពាក្យរបស់ក្រុមហ៊ុនថ្នាំជក់ អង់គ្លេស អាមេរិកាំង កម្ពុជា បានគូសបញ្ជាក់ថា «យើងគឺជាក្រុមហ៊ុនតែមួយគត់ដែលទទួលសិទ្ធិផ្ដាច់មុខក្នុងការនាំចូល និងចែកចាយលក់ផលិតផលបារី 555 ដូច្នេះរាល់អាជីវករដែលដាក់តាំងលក់ ឬលក់លួចលាក់ផលិតផលបារី 555 រួចពន្ធ នៅក្រៅពីលក់នៅក្នុងទីផ្សាររួចពន្ធ (duty free) និងក្លែងក្លាយ គឺសុទ្ធតែជាអំពើខុសច្បាប់ទាំងអស់ ដែលត្រូវប្រឈមមុខនឹងការរឹបអូសយកទៅកម្ទេចចោល ក៏ដូចជាជាប់ទោសទណ្ឌតាមផ្លូវតុលាការ ដូចករណីចុះបង្ក្រាបថ្មីៗរបស់សមត្ថកិច្ចរឹបអូសយកជាង ១.០០០ សុង ពីទីតាំងលក់ក្នុងផ្សារធំថ្មី និងកន្លែងស្ដុកបារីរបស់អាជីវករមួយកន្លែង កាលពីសប្ដាហ៍មុន។
លោកបន្ថែមថា «គ្រប់បារីក្លែងក្លាយទាំងអស់ គឺសុទ្ធតែផលិតឡើងចេញពីសារធាតុគីមីម្យ៉ាង ដែលគេហាមឃាត់មិនឲ្យប្រើប្រាស់ក្នុងចំណីអាហារ ដែលវាហុចផលអាក្រក់ដល់អ្នកជក់ក្នុងរយៈពេលមួយដ៏ខ្លី។ ចំពោះលក្ខណៈសម្គាល់ថាជាផលិតផលបារី 555 ពិតប្រាកដ និងស្របច្បាប់វិញ គឺនៅលើកញ្ចប់ និងសុងរបស់បារី 555 គឺមានបោះពុម្ពសារព្រមានសុខភាពជារូបភាព និងជាភាសាខ្មែរ ទំហំ ៥៥% ហើយនៅផ្នែកចំហៀងខាងក្រោយកញ្ចប់ គឺមានបិតតែមប្រិ៍អាករ រីឯបារី ៥៥៥ ក្លែងក្លាយវិញ គឺមានសារព្រមានជាភាសាអង់គ្លេស ពុំមានបិតតែមប្រិ៍អាករ ហើយលក់នៅក្រៅទីផ្សាររួចពន្ធ (duty free shop)»។
គួររំឭកថា កាលពីថ្ងៃទី ០៤ ខែឧសភា ឆ្នាំ ២០១៨ កន្លងទៅ គឺមានការចុះបង្ក្រាបពីសមត្ថកិច្ចប្រឆាំងបទល្មើសសេដ្ឋកិច្ច សហការជាមួយស្ថាប័យអយ្យការអមសាលាដំបូងរាជធានីភ្នំពេញទៅលើទីតាំងក្នុងផ្សារធំថ្មី និងទីតាំងស្ដុកបារីរបស់អាជីវករ ហើយរឹបអូសបានបារីខុសច្បាប់ និងបារីគេចពន្ធយ៉ាងច្រើន ប្រមាណជាង ១.០០០ សុង ដែលកំពុងត្រូវកសាងសំណុំរឿងបញ្ជូនទៅតុលាការដោះស្រាយតាមនីតិវិធី និងត្រូវកម្ទេចចោល៕
ចែករំលែកព័តមាននេះ