រាជធានីភ្នំពេញ ៖ មន្ត្រីជាន់ខ្ពស់់នៃក្រសួងការងារ និងបណ្តុះបណ្តាលវិជ្ជាជីវៈ បានអះអាងថា ប្រទេសកម្ពុជានាពេលបច្ចុប្បន្ននេះ អត្រាអ្នកមានការងារធ្វើខ្ពស់រហូតដល់កម្រិត៩៩,៣% ស្មើនឹងប្រមាណជិត១០លាននាក់ ហើយអត្រាគ្មានការងារធ្វើ ត្រូវបានកាត់បន្ថយមកត្រឹមកម្រិតទាប០,៧%…
រាជធានីភ្នំពេញ ៖ មន្ត្រីជាន់ខ្ពស់់នៃក្រសួងការងារ និងបណ្តុះបណ្តាលវិជ្ជាជីវៈ បានអះអាងថា ប្រទេសកម្ពុជានាពេលបច្ចុប្បន្ននេះ អត្រាអ្នកមានការងារធ្វើខ្ពស់រហូតដល់កម្រិត៩៩,៣% ស្មើនឹងប្រមាណជិត១០លាននាក់ ហើយអត្រាគ្មានការងារធ្វើ ត្រូវបានកាត់បន្ថយមកត្រឹមកម្រិតទាប០,៧% ។
លោក អុិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានអះអាងបែបនេះ នៅក្នុងពិធីផ្សព្វផ្សាយរបាយការណ៍ស្តីពី « លទ្ធផលអង្កេតនិយោជក ស្តីពីកង្វះ និងគម្លាតជំនាញនៅក្នុងទីផ្សារការងារកម្ពុជា ក្នុងឆ្នាំ២០១៧ និងរបាយការណ៍ស្តីពីទស្សនវិស័យការងារកម្ពុជាឆ្នាំ២០១៨ » កាលពីរសៀលថ្ងៃទី៨ មិថុនា នៅទីស្តីការក្រសួងការងារ និងបណ្ដុះបណ្ដាលវិជ្ជាជីវៈ ។
លោករដ្ឋមន្ត្រីបានលើកឡើងថា លទ្ធផលនៃការធ្វើអង្កេតនេះ ពិតជាមានសារសំខាន់ណាស់ក្នុងការផ្តល់ព័ត៌មានអំពីស្ថានភាពទីផ្សារការងារនាពេលបច្ចុប្បន្នទៅដល់ភាគីពាក់ព័ន្ធនានា និងរួមចំណែកពង្រឹងប្រព័ន្ធព័ត៌មានទីផ្សារការងារនៅកម្ពុជាទាំងមូលឲ្យដំណើរការពេញលេញ ពិសេសយុវជន និងអ្នកស្វែងរកការងារ អាចត្រៀមខ្លួនបានកាន់តែប្រសើរ ស្របតាមតម្រូវការរបស់ទីផ្សារការងារ ។
លោករដ្ឋមន្ត្រីថ្លែងថា ៖« ការបន្តរក្សាបាននូវសន្តិភាព ស្ថិរភាពពេញលេញទូទាំងប្រទេស នាំឲ្យកម្ពុជាបន្តទាក់ទាញបាននូវវិនិយោគិនកាន់តែល្អ និងសម្រេចបានកំណើនសេដ្ឋកិច្ចខ្ពស់ក្នុងរយៈពេល២ទសវត្សរ៍កន្លងមកនេះ នាំឲ្យយើងអាចបង្កើតការងារថ្មីកាន់តែប្រសើរជាច្រើន និងបន្តរក្សាការងារដែលមានស្រាប់ជូនប្រជាពលរដ្ឋ ជាពិសេសយុវជនដែលដល់អាយុធ្វើការចំនួនប្រមាណ៣សែននាក់ក្នុង១ឆ្នាំៗ » ។
លោករដ្ឋមន្ត្រី អុិត សំហេង បញ្ជាក់ថា ៖«បច្ចុប្បន្ននេះ យើងមានអត្រាមានការងារធ្វើខ្ពស់រហូតដល់កម្រិត៩៩,៣% ស្មើនឹងប្រមាណជិត១០លាននាក់ ហើយអត្រាគ្មានការងារធ្វើត្រូវបានកាត់បន្ថយមកត្រឹមកម្រិតទាប០,៧%។ ក្នុងចំណោមអ្នកមានការងារធ្វើសរុបទាំងអស់មានចំនួនជិត១,៥លាននាក់ធ្វើការនៅក្នុងសេដ្ឋកិច្ចក្នុងប្រព័ន្ធ, ជាង២,៤លាននាក់នៅក្នុងសេដ្ឋកិច្ចក្រៅប្រព័ន្ធ, ជាង៤លាននាក់នៅក្នុងវិស័យកសិកម្ម, ១,២លាននាក់ធ្វើការនៅក្រៅប្រទេស និងជាង០,៥លាននាក់ជាមន្ត្រីសាធារណៈ » ។
ទោះយ៉ាងណាក្តី លោករដ្ឋមន្ត្រីក៏បានលើកឡើងថា ការរីកចម្រើនសេដ្ឋកិច្ច-សង្គមដ៏ឆាប់រហ័សនេះ នាំឲ្យទីផ្សារការងារនៅកម្ពុជាមានជីវភាពខ្លាំង ដែលបណ្តាលឲ្យមានការកើតឡើងនូវកង្វះ និងគម្លាតជំនាញ ដោយ សារយន្តការគាំទ្រដោយលំហូរព័ត៌មានរវាងភាគីពាក់ព័ន្ធ ជាពិសេសអ្នកស្វែងរកការងារ និយោជក អ្នកផ្តល់ការអប់រំបណ្តុះបណ្តាលមិនទាន់ត្រូវបានអភិវឌ្ឍន៍ល្អពេញលេញ ។
លោកថា ៖« ដើម្បីដោះស្រាយបញ្ហានេះ រាជរដ្ឋាភិបាលបានយកចិត្តទុកដាក់ខិតខំដោះស្រាយតាមរយៈការអនុវត្តគោលនយោបាយទីផ្សារការងារសកម្ម ដោយបង្កើតឱ្យមានឡើងនូវប្រព័ន្ធព័ត៌មានទីផ្សារការងារជាតិមួយ គឺទីភ្នាក់ងារជាតិមុខរបរ និងការងារ (NEA) ដែលដើរតួនាទីក្នុងការប្រមូលវាយតម្លៃ និងផ្តល់ព័ត៌មានទីផ្សារទូលំទូលាយ សំដៅធ្វើឱ្យមានតម្លាភាពទូទាំងប្រទេស ពាក់ព័ន្ធនឹងការផ្គត់ផ្គង់ និងតម្រូវការនៅលើទីផ្សារការងារ ផ្តល់ភាពងាយស្រួលឆាប់រហ័សដល់អ្នកស្វែងរកការងារ និងនិយោជកក្នុងការទទួលបានព័ត៌មាន និងការផ្គូផ្គងរវាងឱកាសការងារ និងដំណឹងជ្រើសរើសកម្លាំងពលកម្ម ព្រមទាំងផ្តល់ការគាំទ្រផ្សេងទៀត ដើម្បីជួយឱ្យទីផ្សារការងារមានដំណើរការកាន់តែប្រសើរ » ។
លោកជំទាវ ម៉ារៀ សាគ្រិន ឯកអគ្គរដ្ឋទូតស៊ុយអែតប្រចាំកម្ពុជា បានលើកឡើងដែរថា ៖«តាមរយៈទីភ្នាក់ងារផ្តល់សេវាការងារសាធារណៈ ប្រទេសស៊ុយអែតបានសហការជាមួយទីភ្នាក់ងារជាតិមុខរបរ និងការងារតាំងពីឆ្នាំ២០១២ ដើម្បីគាំទ្រដល់ការអភិវឌ្ឍជំនាញ និងការងារសម្រាប់យុវជន ។ ជាក់ស្តែង របាយការណ៍ទាំងពីរដែលផ្សព្វផ្សាយថ្ងៃនេះ គឺជាផ្នែកមួយនៃកិច្ចសហប្រតិបត្តិការនេះ » ។
លោកជំទាវថ្លែងថា ៖« វាគឺជាប្រភពព័ត៌មានដែលអាចជឿទុកចិត្តបាន និងមានសារប្រយោជន៍សម្រាប់អ្នកស្វែងរកការងារធ្វើ ជាពិសេស យុវជនអាចស្វែងរកការងារបានកាន់តែល្អប្រសើរនាពេលខាងមុខ » ។
យោងតាមលទ្ធផលអង្កេតនិយោជកលើកទី៤ ស្តីពីកង្វះ និងគម្លាតជំនាញនៅក្នុងទីផ្សារការងារឆ្នាំ២០១៧នេះ បង្ហាញថា ៖ ៧៧,៩% នៃនិយោជកនៅក្នុងវិស័យសណ្ឋាគារ និងការស្នាក់នៅ កំពុងជួបបញ្ហាលំបាកក្នុងការជ្រើសរើសបុគ្គលិក ។ ចំណែកឯវិស័យដទៃទៀត គឺស្ថិតក្នុងអត្រា៦៤,១% ក្នុងវិស័យឡូជីស្ទីក និងការដឹកជញ្ជូន, សុខាភិបាល៥៨,៣%, អប់រំ និងបណ្តុះបណ្តាល ៥៣,០%, កែច្នៃម្ហូបអាហារ និងភេសជ្ជៈ ៥១,៧%, ហិរញ្ញវត្ថុ និងធានារ៉ាប់រង ៥០,៧%, ព័ត៌មានវិទ្យា៣៦,៥%, សំណង់ ៣៤,៤%, វាយនភ័ណ្ឌកាត់ដេរសម្លៀកបំពាក់និងផលិតស្បែកជើង ២០,៩% និងផលិតកម្មកៅស៊ូ និងប្លាស្ទិក ៧,៣% ។
លទ្ធផលអង្កេតបានឲ្យដឹងទៀតថា កត្តាចម្បងដែលនាំឱ្យនិយោជកជួបប្រទះការលំបាកក្នុងការជ្រើសរើសកម្លាំងពលកម្មនេះ គឺបណ្តាលមកពីបេក្ខជនគ្មានជំនាញបច្ចេកទេសតាមតម្រូវការ, មានការប្រកួតប្រជែងខ្លាំងក្នុងចំណោមនិយោជកក្នុងការជ្រើសរើស, កង្វះបទពិសោធន៍ការងារ និងបេក្ខជនដាក់ពាក្យស្វែងរកការងារមានចំនួនតិច ។ ចំណែកជំនាញសំខាន់ៗដែលអ្នកស្វែងរកការងារខ្វះខាតរួមមាន ជំនាញភាសាបរទេស, ជំនាញបច្ចេកទេស, ការបម្រើសេវាអតិថិជន, ការនិយាយស្តី, ការបំពេញការងារជាក្រុម, ការដោះស្រាយបញ្ហា និងការប្រើប្រាស់បច្ចេកវិទ្យាព័ត៌មាន ។
ទន្ទឹមនឹងនេះ ទិន្នន័យដែលប្រមូលបានពីការអង្កេតនេះ បានផ្តល់លទ្ធភាពឱ្យទីភ្នាក់ងារជាតិមុខរបរ និងការងារ (NEA) ធ្វើការវិភាគព្យាករណ៍ និងផលិតជារបាយការណ៍មួយទៀតស្តីពី « ទស្សនវិស័យការងារកម្ពុជាឆ្នាំ២០១៨»ដែលបង្ហាញអំពីការវិវត្តរបស់ទីផ្សារការងារនៅកម្ពុជា ដោយផ្តោតសំខាន់ទៅលើឱកាសការងារតាមប្រភេទនៃមុខរបរ » ។
លទ្ធផលនៃរបាយការណ៍នេះក៏បានបង្ហាញដែរថា ប្រភេទការងារដែលអាចឲ្យអ្នកស្វែងរកការងារងាយនឹងទទួលបាននោះមានដូចជាវិស្វករឧស្សាហកម្ម និងផលិតកម្ម, វិស្វករទូរគមនាគមន៍, អ្នកឯកទេសផ្នែកវិទ្យាសាស្ត្រ និងថតកាំរស្មីអុិច, អ្នកបកប្រែអត្ថបទ និងអ្នកបកប្រែផ្ទាល់មាត់, អ្នកបច្ចេកទេសផ្នែកសេវាគាំទ្រព័ត៌មានវិទ្យា, វិស្វករគីមី, អ្នកបញ្ជាម៉ាស៊ីនចំហុយទឹក, ជាងធ្វើកញ្ចក់, ជាងដំឡើងបំពង់ទុយោ និងបំពង់បង្ហូរ និងអ្នកដំឡើងម៉ាស៊ីនយានយន្ត ៕
ចែករំលែកព័តមាននេះ