ខេត្តព្រះសីហនុ ៖ កម្លាំងអធិការដ្ឋាននគរបាលស្រុកព្រៃនប់ ដឹកនាំដោយលោកវរសេនីយ៍ត្រី ហួ យ៉ៃ អធិការរងស្រុកព្រៃនប់ សហការជាមួយនគរបាលប៉ុស្តិ៍ព្រៃនប់ ប៉ុស្តិ៍អូរឧកញ៉ាហេង ប៉ុស្តិ៍រាម និងប៉ុស្តិ៍បិទត្រាង បានចុះឃាត់ខ្លួនជនសង្ស័យម្នាក់កាលពីនៅរសៀលថ្ងៃទី09 មិថុនា ពីបទរំលោភសេពសន្ថវៈ ។
ជនសង្ស័យខាងលើឈ្មោះ សាក់ ឡា ភេទប្រុស អាយុ20ឆ្នាំ ស្រុកកំណើតភូមិស្ទោង ឃុំចំណាលើ ស្រុកស្ទោង ខេត្តកំពង់ធំ មុខរបរកម្មករសំណង់ ស្ថិតក្នុងភូមិអុង ឃុំរាម ស្រុកព្រៃនប់ ចំណែគជនរងគ្រោះអាយុ16ឆ្នាំ មុខរបរកម្មករសំណង់ដូចគ្នា។
បើតាមសមត្ថកិច្ចឱ្យដឹងថា ហេតុការណ៍នេះកើតឡើងកាលពីម៉ោង១០និង១៥នាទីយប់ នៅថ្ងៃទី០៨ មិថុនា នៅលើអគាររបស់ក្រុមហ៊ុនមួយកន្លែង។ សមត្ថកិច្ចបញ្ជាក់ថា រវាងជនសង្ស័យ និងជនរងគ្រោះបានស្គាល់គ្នារយៈពេលកន្លះខែ មកហើយ ហើយជនសង្ស័យបានបបួលជនរងគ្រោះទៅស៊ីផឹកនៅលើអគារដែលខ្លួនធ្វើការ ដោយជនរងគ្រោះមានគ្នា២នាក់ ហើយជនសង្ស័យមានគ្នា២នាក់ បន្ទាប់ពីផឹកស៊ីរហូតដល់ម៉ោងជាង១០យប់ម្នាក់ៗស្រវឹងរៀងៗខ្លួន ស្រាប់តែជនសង្ស័យគ្រាជនរងគ្រោះចូលទៅបន្ទប់ រួចចាប់រំលោភសម្រេចតែម្តង ចំណែកអ្នកផឹកស៊ីជាមួយបានបែកគ្នាទៅវិញអស់ទៅ។
រហូតមកដល់២និង១០នាទីរសៀល ថ្ងៃទី៩ មិថុនា ទើបជនរងគ្រោះ យករឿងរ៉ាវទៅប្រាប់ម្តាយរបស់ខ្លួន ហើយម្តាយក៏បានមករាយការណ៍ប្រាប់នគរបាល ទើបឈានដល់ការចាប់ខ្លួនជនសង្ស័យមកសួរនាំ ដើម្បីចាត់ការទៅតាមច្បាប់៕
ចែករំលែកព័តមាននេះ