ក្រុមហ៊ុន Pernod Ricard ដែលជាក្រុមហ៊ុនផលិតស្រានាំមុខគេលំដាប់ទី២ នៅលើពិភពលោក បានកំណត់យកថ្ងៃទី៧ ខែមិថុនាដើម្បីរួមចំណែកក្នុងការងារសង្គម (Responsib’All Day) នៅក្រោមប្រធានបទ «ការរស់នៅប្រកបដោយភាពរីករាយជាមួយនឹងពិភពលោកដែលស្រស់បំព្រង» ក្រោមការចូលរួមពីបុគ្គលិករបស់ក្រុមហ៊ុនជាង១៨,៥០០នាក់ទូទាំងពិភពលោក។
គួរបញ្ជាក់ផងដែរថា បុគ្គលិកមកពីក្រុមហ៊ុនបុត្រសម្ព័ន ជាង៨៥នៅទូទាំងពិភពលោក បានចូលរួមគម្រោងសហគមន៍ក្នុងស្រុកជាង១០០គម្រោង ដើម្បីបង្ហាញពីការប្តេជ្ញាចិត្ត និងការចូលរួមចំណែករបស់ពួកគេចំពោះសង្គម។
យើងជឿជាក់ថា ក្រុមហ៊ុនទូទាំងសកលលោក គួរតែជាអ្នកដឹកនាំនូវយុទ្ធនាការការពារបរិស្ថាននៅក្នុងតំបន់របស់ពួកគេ។ ជាក់ស្តែង ក្រុមហ៊ុន Pernod Ricard បានចូលរួមសហការជាមួយនឹងដៃគូរបស់ខ្លួនក្នុងគម្រោងImpact 2030 ដែលជាគម្រោងមួយជម្រុញឲ្យមានការចូលរួមសហការពីវិស័យឯកជន សង្គមស៊ីវិល ក្នុងការប្តេជ្ញាអនុវត្តនូវគោលដៅទាំង ១៧ ចំណុចរបស់អង្គការសហប្រជាជាតិ ដែលមានឈ្មោះថា ការអភិវឌ្ឍន៍ប្រកបដោយចីរភាព (SDGs)។
ទន្ទឹមគ្នានេះដែរ សម្រាប់ឆ្នាំទី៨ នេះដែរ ក្រុមហ៊ុន Pernod Ricard បានសម្រចជ្រើសយកប្រធានបទ «ទឹកស្អាត និងអនាម័យស្អាត» ដែលជាគោលដៅទី១៥ នៃកម្មវិធីរបស់អង្គការសហប្រជាជាតិដោយផ្អែកលើហេតុផលមួយថា ទឹកគឺជាវត្ថុធាតុដើមដែលសំខាន់បំផុតក្នុងការផលិតនូវផលិតផលស្រារបស់ក្រុមហ៊ុន។
លោក Alexandra Ricard អគ្គនាយក និងនាយកប្រតិបត្តិក្រុមហ៊ុន បានមានប្រសាសន៍
ថា «ចីរភាពអាចកើតមានបានលុះត្រាតែមានអ្នកចូលរួមការពារ។ ខ្ញុំពិតជាមានមោទនភាពណាស់ដែលបុគ្គលិករបស់ក្រុមហ៊ុនបានបង្កើត និងរួមចំណែកក្នុងកម្មវិធីរបស់សង្គម ជាពិសេសដើម្បីបរិស្ថានដែលយើងកំពុងរស់នៅ»។ ក្នុងឆ្នាំនេះដែរ ក្រុមហ៊ុន Pernod Ricard Cambodge (PR CAM) បានសហការជាមួយសមាគមសហគ្រិនឯកជនដែលមានឈ្មោះថា Plastic Free Cambodia (PFC) បានរៀបចំនូវកម្មវិធីរួមចំណែកក្នុងការកាត់បន្ថយការប្រើប្រាស់ថង់ប្លាស្ទិក។
គួរបញ្ជាក់ផងដែរថា Plastic Free Cambodia បានបង្កើតឡើងនៅឆ្នាំ២០១៥ ក្នុងបេសកកម្មមួយក្នុងការផ្សព្វផ្សាយ អប់រំ និងណែនាំឲ្យប្រជាជននៅក្នុងប្រទេសកម្ពុជាយល់អំពីផលប៉ះពាល់នូវការប្រើប្រាស់ថង់ប្លាស្ទិកនៅកម្ពុជា។ ដោយសហការជាមួយស្ថាប័ន និងក្រុមហ៊ុនឯកជន Plastic Free Cambodia បានបំផុសនូវស្មារតីសាធារណជន ក្នុងការកាត់បន្ថយ និងគ្រប់គ្រងនូវកាកសំណល់ថង់ប្លាស្ទិចក្នុងការរស់នៅប្រចាំថ្ងៃ។
ជាមួយគ្នានេះដែរ ក្រុមហ៊ុន Pernod Ricard Cambodge បានសហការជាមួយនឹងផ្សារទំនើបធំៗចំនួនបួននៅក្នុងទីក្រុងភ្នំពេញដែលមានដូចជា ផ្សារទំនើបម៉ាក្រូ ថៃហួត ឡាក់គី និង Circle K ក្នុងការរំណែនាំអ្នកប្រើប្រាស់នូវរបៀបងាយៗពីការកាត់បន្ថយការប្រើប្រាស់ថង់ប្លាស្ទិក ដោយផ្តល់ជូននូវអតិថិជនរបស់ផ្សារទំនើបនីមួយៗនូវថង់ទិញឥវ៉ាន់ដែលអាចប្រើបានច្រើនដងសម្រាប់ការទិញទំនិញលើកក្រោយផងដែរ។ ក្រុមហ៊ុនក៏បានបង្កើតកម្មវិធីអប់រំ និងផ្សព្វផ្សាយ សម្រាប់អ្នកលក់ដុំ និងរាយរបស់ក្រុមហ៊ុន ដែលមានចំណាប់អារម្មណ៍ក្នុងការការពារបរិស្ថាន និងផ្តល់ជូននូវវិធីសាស្ត្រក្នុងការកាត់បន្ថយថង់ប្លាស្ទិចនៅក្នុងអាជីវកម្មរបស់ពួកគាត់។
លោក Marc Rosales នាយកគ្រប់គ្រងទូទៅរបស់ក្រុមហ៊ុន Pernod Ricard Cambodge បានបញ្ជាក់ពីតួនាទីសំខាន់របស់វិស័យឯកជនក្នុងការកាត់បន្ថយការប្រើប្រាស់ថង់ប្លាស្ទិកថា «ការការពារបរិស្ថាននៅជុំវិញខ្លួនយើង ស្មើនឹងការផ្តល់នូវការយកចិត្តទុកដាក់ដល់អតិថិជនរបស់យើងផងដែរ។ គោលដៅរបស់យើងអាចសម្រេចទៅបាន អាស្រ័យលើការចូលរួមចំណែកយ៉ាងសកម្ម ដែលចូលរួមសហការពីសហគមន៍ដើម្បីបង្កើតឲ្យមានកម្មវិធីកាត់បន្ថយនូវការប៉ះពាល់បរិស្ថានប្រកបដោយប្រសិទ្ធភាព។ ការកាត់បន្ថយការប្រើប្រាស់ថង់ប្លាស្ទិកពេលនេះនឹងបង្កើតឲ្យមាននូវស្ថេរភាពសម្រាប់ការរស់នៅប្រកបដោយសុខមាលភាពដល់អ្នកជំនាន់ក្រោយ»។
គួរបញ្ជាក់ផងដែរថា Responsib’All Day គឺជាកម្មវិធីរួមចំណែកក្នុងការងាររបស់សង្គម ក្នុងគោលបំណងរយៈពេលយូរ ដែលក្រុមហ៊ុន Pernod Ricard Cambodge បានរៀបចំឡើងជាសកម្មសង្គមជាលើកដំបូង បន្ទាប់ពីក្រុមហ៊ុនបានបើកជាផ្លូវការនៅប្រទេសកម្ពុជា៕
ចែករំលែកព័តមាននេះ