រាជធានីភ្នំពេញ ៖ កុដិចំណាស់មួយខ្នងត្រូវបានអគ្គីភ័យលេបត្របាក់ឆាបឆេះអស់ម៉ូតូពីរគ្រឿង និងទ្រព្យសម្បត្តិមួយចំនួនទៀតនៅក្នុងកុដិផ្អើលដល់ព្រះសង្ឃ និងកូនសិស្សលោក កាលពីវេលាម៉ោង១១និង៤០នាទីយប់ ថ្ងៃទី០៧ ខែមិថុនា ឆ្នាំ២០១៨ នៅក្នុងកុដិចំណាស់អត់លេខមួយខ្នង ស្ថិតក្នុងវត្តទឹកថ្លា ខណ្ឌសែនសុខ ។
បើតាមសម្តីពីបុរសម្នាក់មានឈ្មោះ សេង ហុង អាយុ២៤ឆ្នាំ ជានិសិត្សឆ្នាំ៤ ស្នាក់នៅកុដិកើតហេតុមានស្រុកំណើតនៅស្រុកបាធាយ ខេត្តកំពង់ចាម បានរៀបរាប់ប្រាប់ឲ្យដឹងថា គាត់បានមកស្នាក់នៅក្នុងវត្តនេះអស់រយៈពេលជាង៣ឆ្នាំមកហើយគឺស្នាក់នៅតែរូបគាត់ និងបុរសម្នាក់ទៀតដែលជានិសិត្សមកស្នាក់នៅក្នុងវត្តខាងលើដែលតែប៉ុណ្ណោះ ។
នៅមុនពេលកើតហេតុរូបគាត់ទាំងពីរនាក់បានមកពីរៀនហើយក៏បានយកម៉ូតូចំនួនពីរគ្រឿងគឺម៉ាកហុងដាឌ្រីមស៊េរីឆ្នាំ២០១៧ និងមួយគ្រឿងទៀតម៉ាក ZOOMER-X ស៊េរីឆ្នាំ២០១៨ ដែលជារបស់ពួកគាត់យកទៅទុកនៅក្នុងកុដិកើតហេតុហើយក៏បានចាក់សោទ្វារចោលទុកនៅខាងក្រោមរួចក៏នាំគ្នាទៅសំរាកនៅជាន់ទី១ដូចសព្វដងជាធម្មតា ។
លុះដល់វេលាកើតហេតុខណៈពេលដែលពួកគាត់កំពុងតែដេកលងលក់ក៏ស្រាប់តែឮសំលែងផ្ទុះ និងមានផ្សែងខ្មួលខ្មាញ់ចេញពីជាន់ក្រោមដែលជាបន្ទប់ដាក់ម៉ូតូរបស់ពួកគាត់ ។ បន្ទាប់មករូបគាត់ក៏ចុះមកមើលស្រាប់តែឃើញមានអណ្តាតភ្លើងកំពុងតែឆាបឆេះបន្ទប់នោះយ៉ាងសន្ធោសន្ធៅ ភ្លាមៗនោះគាត់ក៏បានស្រែកឆោឡោបង្កឱ្យមានការភ្ញាក់ផ្អើលដល់ព្រះសង្ឃដែលគង់នៅវត្ត និងកូនសិស្សនាំគ្នាទាញតុយោទឹកបាញ់ពន្លត់អស់ជាងមួយម៉ោងទើបរលត់ទៅវិញជាស្ថាពរដោយមិនរំខាន់ដល់រថយន្តពន្លត់អគ្គីភ័យនេះទេ ។
អគ្គីភ័យឆាបឆេះកុដិខាងលើគឺបង្កឱ្យឆេះម៉ូតូពីរគ្រឿងទាំងស្រុង និងរបស់មួយចំនួនតូច នៅក្នុងបន្ទប់ជាន់ផ្ទាល់ដីដែលមានទំហំ៤ម៉ែត្រគុណនឹង៧ម៉ែត្ររងការខូចខាតឆេះអស់ទាំងស្រុង ។ ចំពោះមូលដែលបណ្តាលឱ្យមានអគ្គីភ័យឆាបឆេះឡើងនៅមិនទាន់មានប្រភពឲ្យច្បាស់លាស់ថា ឆេះមកពីមូលហេតុអ្វីនោះទេ? ព្រោះដោយសារតែកុដិកើតហេតុខាងលើពុំមានបណ្តាញចរន្តអគ្គិសនីចូលឬដុតទាន់បំភ្លឺបន្ទប់អ្វីនោះដែរ ។ ចំពោះសមត្ថកិច្ចមូលដ្ឋានវិញក៏មិនបានមកពិនិត្យមើលរកមូលហេតុនោះដែរ ៕
ចែករំលែកព័តមាននេះ