ខេត្តបាត់ដំបង ៖ ក្រុមលេខាធិការគណៈកម្មាធិការព្រំដែនថ្នាក់ភូមិភាគកម្ពុជា-ថៃលើកទី២៦ (ហៅកាត់ថា RBC) ដែលភាគីកម្ពុជាបានជួបប្រជុំត្រៀមចំនួន៥០នាក់ មកពីស្ថាប័នកងទ័ព ប៉ូលិស អាវុធហត្ថ កងការពារព្រំដែន…
ខេត្តបាត់ដំបង ៖ ក្រុមលេខាធិការគណៈកម្មាធិការព្រំដែនថ្នាក់ភូមិភាគកម្ពុជា-ថៃលើកទី២៦ (ហៅកាត់ថា RBC) ដែលភាគីកម្ពុជាបានជួបប្រជុំត្រៀមចំនួន៥០នាក់ មកពីស្ថាប័នកងទ័ព ប៉ូលិស អាវុធហត្ថ កងការពារព្រំដែន មន្ត្រីបរិស្ថាន សុខាភិបាល កសិកម្ម អប់រំទេសចរ ពាណិជ្ជកម្ម ខេត្តបាត់ដំបង និងបន្ទាយមានជ័យបានជួបប្រជុំគ្នា នៅក្នុងសាលប្រជុំទីបញ្ជាការយោធភូមិភាគទី៥នៅក្រុងបាត់ដំបង វេលាព្រឹកថ្ងៃទី០៦ ខែមិថុនា ឆ្នាំ២០១៨ ក្រោមការដឹកនាំលោកឧត្តមសេនីយ៍ត្រីសេង ថាប៊ី នាយរងសេនាធិការយោធភូមិភាគទី៥ អនុប្រធានក្រុមលេខាខាងកម្ពុជា ។
បន្ទាប់ពីលោកឧត្តមសេនីយ៍ត្រីសេង ថាប៊ី មានមតិស្វាគមន៍រួចមកលោកឧត្តមសេនីយ៍ត្រីអាន សារ៉ាយ នាយការិយាល័យព្រំដែនយោធភូមិភាគទី៥ បានអានរបាយការណ៍កិច្ចប្រជុំ RBC លើកទី២៥ នាក្រុងប៉ាតាយ៉ាប្រទេសថៃកន្លងមក បានអនុវត្តន៍រួមគ្នាទទួលបានលទ្ធផលល្អប្រសើរ និងពង្រាងខ្លឹមសារពិភាក្សាសម្រាប់ប្រជុំ RBC លើកទី២៦ កម្ពុជា-ថៃ ដោយបានផ្តោតលើកិច្ចសហប្រតិបត្តការទ្វេភាគីលើវិស័យសន្តិសុខដែលមាន៖ ១- ការបង្ការទប់ស្កាត់ការកើតឡើងវិវាទ ២- ទប់ស្កាត់បញ្ហាឧក្រិដ្ឋកម្ម និងភរវកម្មឆ្លងដែន ៣- ការពារ បង្ក្រាបទប់ស្កាត់គ្រឿងញៀនឆ្លងដែន ៤- បង្កាបង្ក្រាបបទល្មើសតាមព្រំដែន ៥- ការឆ្លងកាត់តាមព្រំដែន ៦- ទប់ស្កាត់ការជួញដូរមនុស្ស និងក្មេងអនាថា និង៧- ពលករខុសច្បាប់ ។
ក្នុងនោះអង្គប្រជុំបានពិភាក្សាបន្តដោយផ្តោតលើកិច្ចសហការបន្ថែមលើវិស័យសេដ្ឋកិច្ច សង្គមកិច្ច បរិស្ថាន វិទ្យាសាស្ត្រ និងបច្ចេកទេសសុខាភិបាលកសិកម្មអប់រំទេសចរណ៍អប់រំផ្សព្វផ្សាយ និងក្របខណ្ឌទិសដៅ ការអនុវត្តន៍រួមគ្នា ក្រោយការចូលជាសហគមន៍អាស៊ានដែលហៅកាត់ថា (AC) ។
ចុងក្រោយលោកឧត្តមសេនីយ៍ត្រី សេង ថាប៊ី បានផ្តាំផ្ញើថា សូមក្រុមការងារតាមមុខជំនាញដែលបានពង្រាងលើកឡើងមកនេះយកចិត្តទុកដាក់បន្ថែមទៀត ព្រោះកិច្ចការទាំងនេះត្រូវជួបពិភាក្សាគ្នានៅថ្ងៃទី២០ ដល់២២ ខែមិថុនា ឆ្នាំ២០១៨ខាងមុខនេះ ជាមួយភាគីថៃនៅខេត្តសៀមរាបឲ្យទទួលបានលទ្ធផលល្អបន្ថែមទៀត ៕
ចែករំលែកព័តមាននេះ