រាជធានីភ្នំពេញ ៖ អភិបាលរាជធានីភ្នំពេញលោក ឃួង ស្រេង បានអំពាវនាវដល់បងប្អូនប្រជាពលរដ្ឋ រស់នៅរាជធានីភ្នំពេញទាំងអស់សូមអញ្ជើញទៅបោះឆ្នោត នៅថ្ងៃទី២៩ កក្កដា ឆ្នាំ២០១៨ ខាងមុនឲ្យបានគ្រប់ៗគ្នា ព្រោះការបោះឆ្នោតនេះ គឺជាសិទ្ធិសម្រេចរបស់បងប្អូនក្នុងការជ្រើសរើស គណបក្សណាមួយ ដែលខ្លួនស្រឡាញ់។ ក្នុងឱកាសអញ្ជើញចុះជួបសំណេះសំណាល សួរសុខទុក្ខ និងស្តាប់សំណូមពរ ពីប្រជាពលរដ្ឋក្នុងបុរីសន្តិភាព២ សង្កាត់ចោមចៅទី២ ខណ្ឌពោធិសែនជ័យ កាលពីចុងសប្តាហ៍កន្លងមកនេះ លោក ឃួង ស្រេង អភិបាលរាជធានីភ្នំពេញមានប្រសាសាន៍ថា នៅសល់ជាង១ខែទៀតប៉ុណ្ណោះ ការបោះឆ្នោតជ្រើសរើស តំណាងរាស្ត្រ និងតិកាលទី៦ នឹងឈានចូល មកដល់នាពេលខាងមុខ។
ដូច្នេះ បងប្អូនប្រជាពលរដ្ឋ មានសិទ្ធិបោះឆ្នោត ត្រូវត្រៀមខ្លួនទុកជាមុន ដូចជាអត្តសញ្ញាណប័ណ្ណ និងឯកសារពាក់ព័ន្ធជាដើម ដើម្បីអញ្ជើញទៅបោះឆ្នោត។ លោកបន្តថា ការបោះឆ្នោត គឺជាសិទ្ធិរបស់បងប្អូន ដូច្នេះមុនសម្រេចចិត្តគូសសន្លឹកឆ្នោតជ្រើសរើសគណបក្សណាមួយ ត្រូវពិចារណាឲ្យបានមុតមាំ ក្នុងការជ្រើសរើសថ្នាក់ដឹកនាំនៅមូលដ្ឋានខ្លួន ហើយថ្នាក់ដឹកនាំនោះ ដែលបងប្អូនជឿជាក់ នឹងសង្ឃឹមថា អាចជួយដោះស្រាយបាននៅពេលបងប្អូនមានទុក្ខកង្វល់ និងជួយអភិវឌ្ឍន៍មូលដ្ឋានជូនបងប្អូនបាន នៅពេលជួបបញ្ហា ថាតើគណបក្សណា គឺជាគណបក្សណាសន្យាខ្យល់ ហើយគណបក្សណា សន្យាហើយធ្វើជូនបងប្អូន នឹងរួមសុខរួមទុក្ខជាមួយបងប្អូន។
អភិបាលរាជធានីបន្តទៀតថា ព្រឹត្តិការណ៍ នៃការបោះឆ្នោតដ៏សំខាន់នាថ្ងៃខាងមុននោះ បងបន្អូប្រជាពលរដ្ឋ ដែលមានប័ណ្ណបោះឆ្នោត ត្រូវត្រៀមខ្លួន និងឯកសារពាក់ព័ន្ធឲ្យបានរួចរាល់ ដូចជាអត្តសញ្ញាណប័ណ្ណជាដើម។ លោកបានណែនាំដល់កងកម្លាំង មានសមត្ថកិច្ចក្នុងកំឡុង ថ្ងៃបោះឆ្នោតនោះ ត្រូវត្រៀមកម្លាំងការពារសុវត្ថិភាពជូនបងប្អូនឲ្យបានល្អ ដើម្បី បង្កលក្ខណៈជូនបងប្អូន ហើយប្រជាពលរដ្ឋខ្លួនឯងត្រូវចេះសហការជាមួយអាជ្ញាធរ ដើម្បីធ្វើយ៉ាងណា ឲ្យថ្ងៃបោះឆ្នាតនោះ បានដំណើរការប្រព្រឹត្តិទៅបានដោយរលូន គ្មានអំពើហិង្សា គ្មានការបង្ខិតបង្ខំ ដោយតម្លាភាព សុក្រឹតភាព និងយុត្តធម៌៕
ចែករំលែកព័តមាននេះ