រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជា (CPP) បានធ្វើការវាយបកទៅកាន់ក្រុមប្រឆាំងមួយចំនួនដែលរិះគន់ការអនុម័តច្បាប់ ស្តីពីសញ្ជាតិរបស់រដ្ឋសភាកាលពីពេលថ្មីៗកន្លងមកថា បានរផ្តល់អំណាចទៅលើរដ្ឋាភិបាលតែម្នាក់ក្នុងការផ្តល់សញ្ជាតិដល់បរទេសថា ជាការរិះគន់នេះ គ្មានចេតនាស្ថាបនាឡើយ ។…
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជា (CPP) បានធ្វើការវាយបកទៅកាន់ក្រុមប្រឆាំងមួយចំនួនដែលរិះគន់ការអនុម័តច្បាប់ ស្តីពីសញ្ជាតិរបស់រដ្ឋសភាកាលពីពេលថ្មីៗកន្លងមកថា បានរផ្តល់អំណាចទៅលើរដ្ឋាភិបាលតែម្នាក់ក្នុងការផ្តល់សញ្ជាតិដល់បរទេសថា ជាការរិះគន់នេះ គ្មានចេតនាស្ថាបនាឡើយ ។
លោកសុខ ឥសានអ្នកនាំពាក្យគណបក្សប្រជាជនកម្ពុជាបានឲ្យដឹងនៅថ្ងៃទី៥ មិថុនា ឆ្នាំ២០១៨ថា ក្រុមអគតិមួយចំនួននិយាយថា ស្ថាប័ននីតិប្បញ្ញត្តិប្រញាប់អនុម័តច្បាប់ស្តីពីសញ្ជាតិឲ្យបានមុនការបោះឆ្នោតជាការខុស ។
លោកបន្តថា ការកសាងច្បាប់នានា គឺស្របតាមសំណូមពរត្រូវការមិនមែនដូចពួកអគតិថា នោះទេ ។ ច្បាប់ស្តីពីសញ្ជាតិមានតាំងពីឆ្នាំ១៩៩៦ មកដែលជាហេតុចាំបាច់ត្រូវតែពិនិត្យឡើងវិញ បន្ទាប់ពីបានអនុវត្តជាង២០ឆ្នាំមកហើយ ដែលចំណុចជាច្រើនលែងសមស្របនឹងសភាពការណ៍បច្ចប្បន្ននេះ ។
លោកបានគូសបញ្ជាក់ថា «ដោយសារការរិះគន់មិនមានចេតនាល្អស្ថាបនានោះទើបរាជរដ្ឋាភិបាលកម្ពុជាយកពាក្យស្លោក ឆ្កែចេះតែព្រុសមនុស្សចេះតែដើរ មិនឆោតល្ងង់តាមឧបាយកលរបស់ពួកអគតិឡើយ » ។
ជាមួយគ្នានោះដែរអ្នកនាំពាក្យបក្សកាន់អំណាចក៏បានលើកឡើងថា មានជនអគតិមួយចំនួនរិះគន់មិនចង់ឲ្យមន្ត្រីគណបក្សប្រជាជនកម្ពុជា និងរាជរដ្ឋាភិបាលឆ្លៀតនៅថ្ងៃឈប់សម្រាកចុះទៅធ្វេីសកម្មភាពនយោបាយជាមួយប្រជាជននៅតាមមូលដ្ឋាន ។ ជាការភ្លីភ្លេីមែនទែន ដោយមិនដឹងខ្យល់ថា ច្បាប់អនុញ្ញាតឲ្យធ្វេីសកម្មភាពនយោបាយបានមិនមានខុសច្បាប់ឡេីយ ។
លោកសង្កត់ធ្ងន់ថា«ការរិះគន់នេះក៏អាចជាល្បិចកលមិនចង់ឲ្យមន្ត្រីរាជរដ្ឋាភិបាល និងគណបក្សចុះជួបសំណេះសំណាល និងដោះស្រាយបញ្ហាជូនប្រជាជនខ្លាចក្រែងប្រជាជនកម្ពុជានៅតែបន្តគាំទ្រ និងបោះឆ្នោតឲ្យគណបក្សប្រជាជនកម្ពុជាឈ្នះឆ្នោតកាន់អំណាចត ទៅទៀត ។ គណបក្សប្រជាជនកម្ពុជាមិនឆោតល្ងង់ជឿតាមឧបាយកលរបស់ពួកអគតិដោយបោះបង់ចោលទម្លាប់ចុះមូលដ្ឋានជួបជាមួយប្រជាជនឡេីយ» ។
ការវាយបករបស់អ្នកនាំពាក្យបក្សកាន់អំណាចនេះ ពីក្រុមអ្នកលេងហ្វេសប៊ុកបានរិះគន់ជាបន្តបន្ទាប់ ក្រោយពីពេលដែលរដ្ឋសភា ជាតិបានអនុម័តសេចក្ដីព្រាងច្បាប់ស្ដីពីសញ្ជាតិនៅក្នុងសម័យប្រជុំលើកទី១០របស់ខ្លួនកាលពីថ្ងៃទី៣១ ខែឧសភា ឆ្នាំ២០១៨កន្លងទៅថ្មីនេះ ។ ហើយច្បាប់នេះបច្ចុប្បន្នកំពុងបញ្ជូនបន្តទៅព្រឹទ្ធសភារួចទៅក្រុមប្រឹក្សាធម្មនុញ្ញ ដើម្បីអនុម័តបន្តមុននឹងសម្រេចឡាយព្រះហស្ថលេខាដាក់ឲ្យប្រើប្រាស់ជាធរមានដោយព្រះមហាក្សត្រ ។ ច្បាប់ថ្មីស្ដីពីសញ្ជាតិនេះនឹងបើកផ្លូវឲ្យជនអន្តោប្រវេសន៍កំពុងរស់នៅកម្ពុជាក្លាយជាពលរដ្ឋខ្មែរស្របច្បាប់ ក្រោយបំពេញតាមលក្ខខណ្ឌកំណត់មួយចំនួនដែលមានចែងកំណត់ក្នុងច្បាប់នេះ ។
អ្នកវិភាគឯករាជ្យលោកបណ្ឌិតឡៅ ម៉ុងហៃត្រូវបានវិទ្យុអាស៊ីសេរីស្រង់សម្តីផ្សាយថា មកពីរាជរដ្ឋាភិបាលកម្ពុជារងសម្ពាធពីរដ្ឋាភិបាលវៀតណាមដែលតែងតែស្នើឲ្យរបបនេះជួយផ្តល់កិច្ចគាំពារ និងជួយសម្រួលដល់ ពលរដ្ឋដើមកំណើតវៀតណាមរបស់ខ្លួនដែលកំពុងតែរស់នៅក្នុងទឹកដីប្រទេសកម្ពុជាបច្ចុប្បន្ន ។
លោកថា ការស្នើសុំពីសំណាក់ភាគីវៀតណាម គឺតែងតែធ្វើឡើងនៅរៀងរាល់ពេលដែលមានដំណើរទស្សនកិច្ច ផ្លូវរដ្ឋរបស់មន្ត្រីជាន់ខ្ពស់ និងរបបរដ្ឋវៀតណាមមកកម្ពុជាម្តងៗ ។ លោកបណ្ឌិតឡៅ ម៉ុងហៃពន្យល់អំពីហេតុផលមួយទៀតនៃការព្យាយាមអនុម័តច្បាប់នេះដែលលោកថា គឺមិនខុសពីការអនុម័តសន្ធិសញ្ញាបំពេញបន្ថែម អំពីរឿងព្រំដែនកាលពីឆ្នាំ២០០៥ កន្លងទៅដើម្បីធ្វើឲ្យអ្វីដែលខុសច្បាប់ទៅជាស្របច្បាប់ ។
លោកបញ្ជាក់ថា អត់ហ៊ានបញ្ជូនគេទៅវិញ គឺធ្វើឲ្យស្របច្បាប់ក៏ដូចជា សន្ធិសញ្ញាអត់ស្របច្បាប់រវាងវៀតណាម និងសាធារណរដ្ឋប្រជាមានិតកម្ពុជាមុនហ្នឹង ហើយគេធ្វើសន្ធិសញ្ញាបំពេញបន្ថែមហ្នឹងទទួលស្គាល់សន្ធិសញ្ញាដែលអត់ស្របច្បាប់ឲ្យទៅជាស្របច្បាប់វិញ ។
សម្តេចក្រឡាហោមស ខេង ឧបនាយករដ្ឋមន្ត្រី រដ្ឋមន្ត្រីក្រសួងបានលើកឡើងក្នុងសម័យប្រជុំកាលពីថ្ងៃទី៣១ ឧសភា ឆ្នាំ២១០៨ថា ច្បាប់សញ្ជាតិខ្មែរ គឺជាចំណងគតិយុត្តិ និងនយោបាយដែលភ្ជាប់បុគ្គលនៅនឹងព្រះរាជាណាចក្រកម្ពុជា ហើយតាមរយៈចំណងនេះរូបវន្តបុគ្គលត្រូវបានចាត់ ទុកជាប្រជាពលរដ្ឋខ្មែរ ។
សម្តេចក្រឡាហោម ស ខេងក៏បានបញ្ជាក់ថា « ស្ថានភាពសង្គមបច្ចុប្បន្ននេះមិនស្របក្នុងការប្រើប្រាស់ច្បាប់សញ្ជាតិឆ្នាំ១៩៩៦ ។ អីញ្ចឹងហើយបានជាយើងមិនយកច្បាប់នោះមកអនុវត្តតទៅទៀតដែលចាំបាច់យកច្បាប់ចាស់នោះមកសិក្សាដោយរាជរដ្ឋាភិបាលបាន បង្កើតក្រុមការងារមួយដែលខ្ញុំជាប្រធាន ។ នៅពេលសិក្សារួចមកយើងរកឃើញថា មានចំណុចផ្សេងៗជាច្រើនត្រូវធ្វើការកែប្រែក្នុងនោះការកំណត់ពីទឹកប្រាក់ ដើម្បីសុំចូលសញ្ជាតិតាមរយៈការវិនិយោគ ឬហៅថា សញ្ជាតិតូបនីយកម្មនោះត្រូវបានលុបចេញដាក់ក្នុងអនុក្រឹត្យវិញ ដើម្បីងាយស្រួលកែប្រែតាមស្ថានការណ៍សង្គម» ។
សេចក្តីព្រាងច្បាប់សញ្ជាតិត្រូវបានតាក់តែងឡើងដោយឈរលើមូលដ្ឋានបី គឺ១-រក្សាទុកនូវបទប្បញ្ញត្តិទាំងឡាយនៃច្បាប់ស្តីពីសញ្ជាតិឆ្នាំ១៩៩៦ ដែលនៅមានលក្ខណៈសមស្របក្នុងការអនុវត្ត ។ ២- កែសម្រួល ឬលុបចោលនូវបទប្បញ្ញតិ្តទាំងឡាយណាដែលលែងមានលក្ខណៈសមស្របក្នុងការអនុវត្ត និង៣- បន្ថែមបទប្បញ្ញត្តិថ្មីឲ្យស្របតាមការវិវត្តផ្នែកសេដ្ឋកិច្ច និងសង្គមកម្ពុជាបច្ច្ុប្បន្ន ដើម្បីពង្រឹង ការគ្រប់គ្រងកិច្ចការសញ្ជាតិឲ្យកាន់តែមានប្រសិទ្ធភាព សំដៅធានានូវសិទ្ធិរបស់ប្រជាពលរដ្ឋ ការពារសន្តិសុខ និងផលប្រយោជន៍របស់ជាតិ ៕
ចែករំលែកព័តមាននេះ