ខេត្តបន្ទាយមានជ័យ ៖ ដោយសារតែមានបាតុភាពកើតឡើងជាញឹកញាប់ពាក់ព័ន្ធនឹងការកេងចំណេញ ឬបម្រើសេវាបែបមិនស្មោះត្រង់របស់ម្ចាស់ស្ថានីយ និងដេប៉ូលក់ប្រេងឥន្ធនៈមួយចំនួន បានធ្វើឲ្យមានការរិះគន់ខ្លាំងៗពីសំណាក់ប្រជាពលរដ្ឋ ហើយឈានដល់មានយុទ្ធនាការចុះត្រួតពិនិត្យជាបន្តបន្ទាប់ ។ ទន្ទឹមនឹងការចុះពិនិត្យនេះ ក្រសួងឧស្សាហកម្ម…
ខេត្តបន្ទាយមានជ័យ ៖ ដោយសារតែមានបាតុភាពកើតឡើងជាញឹកញាប់ពាក់ព័ន្ធនឹងការកេងចំណេញ ឬបម្រើសេវាបែបមិនស្មោះត្រង់របស់ម្ចាស់ស្ថានីយ និងដេប៉ូលក់ប្រេងឥន្ធនៈមួយចំនួន បានធ្វើឲ្យមានការរិះគន់ខ្លាំងៗពីសំណាក់ប្រជាពលរដ្ឋ ហើយឈានដល់មានយុទ្ធនាការចុះត្រួតពិនិត្យជាបន្តបន្ទាប់ ។
ទន្ទឹមនឹងការចុះពិនិត្យនេះ ក្រសួងឧស្សាហកម្ម និងសិប្បកម្ម ក៏បានស្នើដល់ម្ចាស់ស្ថានីយ និងដេប៉ូចែកចាយប្រេងឥន្ធនៈទាំងអស់ ចូលរួមសហការនិងអនុវត្តច្បាប់ទាំងអស់គ្នា ដោយផ្ដល់សេវាឲ្យបានស្មោះត្រង់ និងលក់ឲ្យបានគ្រប់លីត្រដល់អតិថិជនរបស់ខ្លួន ។
ថ្លែងនៅក្នុងសិក្ខាសាលាផ្សព្វផ្សាយការអនុវត្តច្បាប់ ស្ដីពី មាត្រសាស្ត្រ និងលិខិតបទដ្ឋានគតិយុត្ត កាលពីថ្ងៃទី៣១ ឧសភា កន្លងមក នៅក្រុងសិរីសោភ័ណ លោក លឹម គង់ អនុរដ្ឋលេខាធិការក្រសួងឧស្សាហកម្ម និងសិប្បកម្ម បានមានប្រសាសន៍ថា បណ្តាក្រុមហ៊ុនសហគ្រាសមួយចំនួននៅតែបន្តលក់ផលិតផលរបស់ខ្លួន ដោយពុំមានភាពត្រឹមត្រូវតាមរង្វាស់រង្វាល់នៅឡើយទេ ។ ដូច្នេះ ក្រសួងស្នើដល់ម្ចាស់ស្ថានីយប្រេងឥន្ធនៈក្នុងខេត្តបន្ទាយមានជ័យទាំងអស់ ត្រូវសហការជួយមន្ត្រីជំនាញ ហើយរង្វាស់រង្វាល់ប្រេងម៉ាស៊ូត និងសាំងតាមស្ថានីយលក់ឲ្យអតិថិជន ត្រូវឲ្យបានគ្រប់លីត្រ និងស្តង់ដា ។
លោកសង្កត់ធ្ងន់ថា ៖« ប្រសិនបើមន្ត្រីជំនាញរកឃើញស្ថានីយប្រេងឥន្ធនៈណាមួយមិនគោរពច្បាប់មាត្រសាស្ត្រ នឹងមានវិធានការតាមច្បាប់ » ។
លោក អោម ចន្ថា អភិបាលរងខេត្ត មានប្រសាសន៍ថា នៅទូទាំងខេត្តបន្ទាយមានជ័យមានស្ថានីយ និងដេប៉ូចែកចាយប្រេងឥន្ធនៈចំនួន៩៩កន្លែង ដែលកំពុងផ្ដល់សេវាផ្គត់ផ្គង់ប្រេងឥន្ធនៈដល់ប្រជាពលរដ្ឋដែលមានតម្រូវការប្រើប្រាស់ ។
ម្ចាស់អាជីវកម្មស្ថានីយប្រេងឥន្ធនៈ ត្រូវអនុវត្តតាមគោលការណ៍ច្បាប់ ដោយលក់ប្រេងសាំង និងម៉ាស៊ូត ឲ្យគ្រប់លីត្រនិងចំណុះតាមស្តង់ដា ដើម្បីចូលរួមចំណែកកាត់បន្ថយភាពក្រីក្រជូនប្រជាពលរដ្ឋ ។ នេះជាការរួមចំណែកជាមួយរាជរដ្ឋាភិបាលកម្ពុជា ដែលដឹកនាំដោយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ៕
ចែករំលែកព័តមាននេះ