ខេត្តកណ្តាល ៖ រថយន្តដឹកឈើខុសច្បាប់មួយគ្រឿងក្នុងចំណោមប្រាំគ្រឿងពីខេត្តកំពង់ធំត្រូវបាននគរបាលប្រឆាំងបទល្មើសសេដ្ឋកិច្ចខេត្តកណ្តាលដឹកនាំដោយលោកវរសេនីយ៍ទោ លី សុជាតិ នាយការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តកណ្តាលបានចុះប្រតិបត្តិការណ៍ធ្វើការឃាត់រថយន្តដឹកឈើទាលប្រភេទលេខ០២ បានមួយគ្រឿង ខណៈរថយន្ត០៤គ្រឿងទៀតបានព្យាយាមបើករត់គេចចូលក្នុងដេប៉ូបាត់ ។ ហេតុការណ៍ចុះប្រតិបត្តិការណ៍នេះបានកើតឡើងនៅវេលាម៉ោង០១និង៤៥នាទីយប់ឈានចូលថ្ងៃទី០៣ ខែមិថុនា ឆ្នាំ២០១៨ នៅចំណុចភូមិថ្មី ឃុំកោះចិន ស្រុកពញ្ញាឰ ខេត្តកណ្តាល ។
ប្រភពព័ត៌មានច្បាស់ការបានប្រាប់ឲ្យដឹងថា មុនពេលធ្វើការឃាត់រថយន្តប្រជាពលរដ្ឋបានរាយការណ៍ថា មានរថយន្តប្រភេទសាំយ៉ុងដឹកឈើពេញគូទរថយន្ត ចេញពីខេត្តកំពង់ធំ ឆ្ពោះមកទីក្រុងភ្នំពេញតាមផ្លូវជាតិលេខ០៦A ទើបកម្លាំងនគរបាលប្រឆាំងបទល្មើសសេដ្ឋកិច្ចខេត្តកណ្តាលធ្វើការពួកស្ទាក់ចាប់បានរថយន្តសាំយ៉ុងមួយគ្រឿង ពណ៌លឿង ពាក់ស្លាកលេខភ្នំពេញ 2AR-0867 ដឹកឈើទាលប្រភេទលេខ០២ បានប្រហែលជិត០៦ម៉ែត្រគីប និងរថយន្ត០៤គ្រឿងទៀត បានបើកវ៉ាកៀរពីការឃាត់របស់សមត្ថកិច្ចបាត់ទៅ ។
ប្រភពច្បាស់ការបានបន្តទៀតថា បន្ទាប់ពីធ្វើការឃាត់រថយន្តមួយគ្រឿងហើយ រថយន្ត០៤គ្រឿងទៀតបានបើករថយន្តរត់គេចពីទីតាំងឃាត់នៅខាងលើរហូតដល់ទីតាំងដេប៉ូឈ្មោះស្រីសរ ក្បែរគល់ស្ពានលីយ៉ុងផាត់ ខណ្ឌព្រែកព្នៅ បាត់ស្រមោលទៅ ។
លុះមួយសន្ទុះមានមេការប្រចាំនៅដេប៉ូរលក់ឈើឈ្មោះស្រីស នោះបានចេញមកហើយបាននិយាយថា រថយន្តដែលដឹកឈើបើកចូលដេប៉ូខាងលើនោះ បានបង់លុយឲ្យឈ្មោះណាង មន្ត្រីសង្កាត់រដ្ឋបាលព្រៃឈើចាត់ចែងឲ្យខាងសង្កាត់ ខាងខណ្ឌ ខាងផ្នែក ខាងអធិការរដ្ឋបាលព្រៃឈើអស់ហើយ ឲ្យតែរថយន្តដឹកឈើចេញមកតាមបណ្តោះផ្លូវជាតិ០៦A ។
បើតាមនគរបាលការិយាល័យប្រឆាំងបទល្មើសសេដ្ឋកិច្ចបានបញ្ជាក់ថា បន្ទាប់ពីធ្វើការឃាត់រថយន្តដឹកឈើហើយ កម្លាំងជំនាញបានកសាងសំណុំរឿង និងប្រគល់រថយន្ត និងឈើឲ្យខាងរដ្ឋបាលព្រៃឈើសង្កាត់ស្រុកអង្គស្នួល ដើម្បីបន្តរនីតិវិធីទៅតាមផ្លូវច្បាប់ ៕
ចែករំលែកព័តមាននេះ