ខេត្តកំពង់ធំ ៖ ក្មេងស្រីជំទង់ម្នាក់តខ្សែភ្លើងចាប់សត្វចង្រិតឆក់ខ្លួនឯងស្លាប់ ដែលបានបង្កឲ្យមានការភ្ញាក់ផ្អើលមួយកើតឡើង កាលវេលាម៉ោង០៨និង១០នាទីយប់ថ្ងៃទី២៧ ខែឧសភា ឆ្នាំ២០១៨ ស្ថិតនៅក្នុងភូមិ ត្រាចជ្រុំ ឃុំសំព្រោជ ស្រុកស្ទោង ខេត្តកំពង់ធំ ។
លោកវរសេនីយ៍ត្រី វ៉ន សុភ័ណ្ឌ អធិការរងនគរបាលស្រុកស្ទោងប្រាប់ថា សពក្មេងស្រីរងគ្រោះឈ្មោះ ភា បូផា ហ៊ៅច្រាច់ ភេទស្រី អាយុ១២ឆ្នាំ មានឪពុកឈ្មោះ ភា និងម្តាយឈ្មោះ ប៉ាន់ ច្រឹប រស់នៅភូមិស្រងឹត ឃុំចំណាក្រោម ស្រុកស្ទោង ។
បើយោងតាមការឲ្យដឹងពីសាច់ញាតិប្រាប់ថា ជនរងគ្រោះខាងលើបានទៅរស់នៅជាមួយនឹងម្តាយធំឈ្មោះ ប៉ាន់ ស៊ីវ ឯភូមិត្រាចជ្រុំ ឃុំសំព្រោជ ស្រុកស្ទោង តាមការបំភ្លឺរបស់ឈ្មោះទ្រី រ៉ាវី ភេទស្រី អាយុ១៥ឆ្នាំ នៅភូមិកើតហេតុ និងជាមិត្តភក្តិជាមួយគ្នាប្រាប់ថា នៅមុនពេលកើតហេតុកាលពីយប់ថ្ងៃទី២៧ ខែឧសភា ជនរងគ្រោះ និងមិត្តភក្តិម្នាក់ទៀតបាននាំគ្នាតភ្លើងដាក់អំពូល ដើម្បីចាប់សត្វចង្រិតនៅខាងមុខផ្ទះ។
ក្នុងពេលដែលរាយខ្សែរភ្លើងនោះខ្សែភ្លើងក៏បានដាច់ធ្លាក់ចូលក្នុងទឹកឃើញដូច្នោះជនរងគ្រោះក៏បានដើរទៅចាប់តខ្សែភ្លើងនោះវិញ ដោយពុំបានដកព្រីភ្លើងទើបបណ្តាយឲ្យឆក់ស្លាប់តែម្តងនៅកន្លែងកើតហេតុ ។
បន្ទាប់ពីសមត្ថកិច្ចយើងធ្វើកោសល្យវិនិច្ឆ័យរួច សពបានប្រគល់ជូនក្រុមគ្រួសារធ្វើបុណ្យតាមប្រពៃណី ។
ចែករំលែកព័តមាននេះ