ខេត្តបាត់ដំបង ៖ ពិធីប្រកាសទទួលស្គាល់បញ្ចូលសមាជិកបក្សប្រជាជនចំនួន៤៣៤នាក់ មកពី៨ភូមិ ក្នុងបរិវេណវត្តប៉ាឆា ភូមិរំចេក៤ សង្កាត់រតនះ ក្រុងបាត់ដំបង ក្រោមអធិបតីភាពលោកងិន ឃន…
ខេត្តបាត់ដំបង ៖ ពិធីប្រកាសទទួលស្គាល់បញ្ចូលសមាជិកបក្សប្រជាជនចំនួន៤៣៤នាក់ មកពី៨ភូមិ ក្នុងបរិវេណវត្តប៉ាឆា ភូមិរំចេក៤ សង្កាត់រតនះ ក្រុងបាត់ដំបង ក្រោមអធិបតីភាពលោកងិន ឃន សមាជិកគណកម្មការកណ្តាលគណបក្សប្រជាជនកម្ពុជា លោកឯក សំអូន សមាជិកអចិន្ត្រៃយ៍គណកម្មាធិការកណ្តាលបក្សប្រជាជនកម្ពុជាខេត្តបាត់ដំបង ប្រធានក្រុមការងារចុះជួយសង្កាត់រតនះ ដោយបានធ្វើឡើងវេលាព្រឹកថ្ងៃទី២៦ ខែឧសភា ឆ្នាំ២០១៨ ។
តំណាងគណបក្សថ្មីទាំង៤៣៤នាក់ បានស្ម័គ្រចិត្ត ព្រោះតែមានការជឿជាក់ ដើម្បីរួមគ្នាថែររក្សាសន្តិសុខឲ្យប្រជាជននៅក្នុងភូមិមានក្តីសុខ មិនឲ្យមានជួបការភ័យខ្លាចអ្វីឡើយ ។
បន្ទាប់មកលោកឯក សំអូនប្រធានក្រុមការងារសង្កាត់រតនះបានថ្លែងថា គោលបំណងការប្រកាសសមាជិកបន្ថែមទៀតនេះ គឺបន្ថែមពីលើការងារចាស់ កាលពីឆ្នាំ២០១៧ ដោយឃើញមានប្រជាពលរដ្ឋខ្លះនៅជួបការលំបាកខ្វះខាតនៅឡើយ ហើយកន្លងមកយើងបានចុះធ្វើជាសៀវភៅគ្រួសារបក្សប្រជាជនបានចំនួន១៦៦០គ្រួសារ ដែលមានចំនួនមនុស្ស៤៤៦៥នាក់ ចំណាយថវិកាអស់៥០លានរៀល រួចមកហើយ ដែលមានការទុកចិត្ត និងសង្កេតពីអតីតកាល មកបច្ចុប្បន្នកាល ដែលគណបក្សប្រជាជនកម្ពុជាបានរំដោះរួចចាកផុតពីប្រល័យពូជសាសន៍ និងការចាកចេញវិលត្រឡប់ពីគណបក្សប្រឆាំងមករួមរស់ជាមួយគណបក្សប្រជាជនកម្ពុជាវិញ ។
លោកបានបន្តទៀតថា ចំពោះកិច្ចការនយោបាយពេលនេះយើងគ្មានអ្វីដែលត្រូវមករារាំង ញុះញង់ អូសទាញអារម្មណ៍បងប្អូនឲ្យធ្លាក់ចុះក្នុងភាពវិនាស់ហិនហោច និងអន្តរាយដូចកាល អាណត្តិមុន ដែលមានការបោះឆ្នោត ហើយចាញ់ឆ្នោតនាំបង្កើតបញ្ហាទាមទាររកការបោះឆ្នោត រាប់សន្លឹកឆ្នោតសារជាថ្មី បង្កជាបាតុកម្ម បំផុសបង្កើតជាបដិវត្តន៍ពណ៌ នាំឲ្យមានភាពច្របូកច្របល់ក្នុងសង្គម ដោយក្រុមមួយក្តាប់តូចបានអុកឡុកទៀតបានឡើយ នេះជាចំណាត់ការបានទាន់ពេលវេលាដែលរាជរដ្ឋាភិបាលយើងបានទប់ស្កាត់បានទាន់ពេលវេលា ហើយដោយមានការជួយជំរុញពីលោកច័ន្ទ សុផល ប្រធានគណកម្មាធិការបក្សប្រជាជនកម្ពុជា ខេត្តបាត់ដំបងផងនោះ យើងបានទទួលផ្លូវថ្នល់ក្រាលបេតុង និងចាក់កៅស៊ូបានជាច្រើនខ្សែប្រព័ន្ធលូបង្ហូរទឹក មិនឲ្យមានការលិចតាមភូមិក្នុងសង្កាត់រតនះបន្ថែមទៀត ។
លោកបានបន្តទៀតថា ត្រូវនាំគ្នាពង្រឹងសមាជិកចាស់ ហើយពង្រីកសមាជិកថ្មីបន្ថែមទៀតនេះ ដោយមានទាំងយុវជនជាច្រើនបានមកចូលរួមជាមួយដោយមានឆន្ទះ ស្មារតី ហើយសូមរួមគ្នាចុះជួយជាប្រចាំដល់ប្រជាពលរដ្ឋគ្រប់ក្នុងភូមិមិនឲ្យពលរដ្ឋជួបការលំបាកទៀតឡើយ ហើយសូមត្រៀមទាំងអស់គ្នាចូលរួមទៅបោះឆ្នោតឲ្យបានគ្រប់ៗគ្នា ដែលនៅពេលដ៏ខ្លីខាងមុខនេះកម្ពុជាយើង និងដំណើរការបោះឆ្នោតជ្រើសរើសអ្នកតំណាងរាស្ត្រនីតិកាលទី៦ នៃរដ្ឋសភាដែល និងប្រព្រឹត្តទៅនាខែកក្កដា ឆ្នាំ២០១៨ខាងមុខនេះ ។
បន្ទាប់មកលោកងិន ឃន សមាជិកគណកម្មការកណ្តាលគណបក្សប្រជាជនកម្ពុជាបានថ្លែងថា តាមតួលេខដែលលោកទទួលបាន គឺមានច្រើនជាងនេះដែលមានបងប្អូនមានការទុកចិត្ត ហើយសុំចូលជាសមាជិកគណបក្សប្រជាជនកម្ពុជាបង្កើតបានជាមហាគ្រួសារ កសាងជីវភាពដ៏ធំមួយនៅទីនេះ ។
លោកបានប្រៀបធៀបខេត្តបាត់ដំបង កាលពីសម័យមុនៗឆ្នាំ១៩៧០ ដល់ឆ្នាំ១៩៧៩ គឺបានប្រែប្រួលផ្នែកនយោបាយទាញទម្លាក់ប្រទេសជាតិទៅក្នុងភ្នក់ភ្លើងសង្គ្រាម ក្នុងសម័យលន់ ណុល ហើយបន្តមកសម័យប៉ុល ពត គឺកាន់តែអន្តរាយបន្ថែមទៀត ដោយលប់បំបាត់មិនឲ្យមានការគោរពជំនឿសាសនា បំផ្លាញវត្តអារាម បំបាត់ការចាយលុយ ជម្លៀសប្រជាជនឲ្យទៅរស់នៅស្រុកស្រែ ដែលនៅទីក្រុងមានផ្ទះហើយគ្មានមនុស្សនៅ មានផ្លូវហើយគ្មានមនុស្សដើរ ដោយលើកពាក្យស្លោកមកថា ធ្វើបដិវត្តន៍មហាលោតផ្លោះ មហាអស្ចារ្យ បង្អត់អាហារ កាប់សម្លាប់ ទើបមានការតស៊ូរើបម្រាស់រំដោះចេញពីចំណុចសូន្យ ក្នុងឆ្នាំ១៩៧៩ ហើយកសាងបន្តមកបានរីកចម្រើនរហូតដល់សព្វថ្ងៃនេះ ដោយគណបក្សប្រជាជនកម្ពុជា ដូច្នោះនេះជាការមើលឃើញរបស់បងប្អូនមានការទុកចិត្តទើបចេះតែមានការចូលរួមជាមួយគ្នា ដើម្បីថែររក្សាសុខសន្តិភាព កសាងអភិវឌ្ឍន៍ប្រទេសជាតិជាបន្តទៅទៀត ។
ក្នុងនោះលោក ឯក សំអូន បានជួយផ្តល់ថវិកាឧបត្ថម្ភកម្មវិធី និងទទួលស្គាល់សមាជិកថ្មីចំនួន៤៣៤នាក់ ក្នុងម្នាក់ៗទទួលបាន១ម៉ឺនរៀលផងដែរ ៕
ចែករំលែកព័តមាននេះ