រាជធានីភ្នំពេញ ៖ យុវជនម្នាក់មិនដឹងថា មានបញ្ហាអីនោះទេ ត្រូវបាននគរបាលក្រសួងមហាផ្ទៃឃាត់ខ្លួនហើយប្រើអំពើហិង្សានៅចំពោះមុខមហាជន រហូតរងរបួសធ្ងន់ បង្កឱ្យមានការភ្ញាក់ផ្អើលវេលាម៉ោង០៧និង៣០នាទីយប់ថ្ងៃទី២៤ ឧសភា ទល់មុខហាងលក់ស៊ុបចង្កាក់ មានទីតាំងនៅផ្លូវលេខ៣៦០ សង្កាត់បឹងកេងកង៣ ខណ្ឌចំការមន ។ បុរសដែលសមត្ថកិច្ចចាប់ក្រៀកឃាត់ខ្លួនត្រូវបានគេដឹងឈ្មោះ អុឹង បញ្ញា អាយុ២៣ឆ្នាំ ស្នាក់នៅសង្កាត់ភ្នំពេញថ្មី ខណ្ឌសែនសុខ ។
តាមសម្តីអ្នកដែលបានឃើញហេតុការណ៍នៅកន្លែងកើតហេតុបានឱ្យដឹងថា មិនមាននរណាដឹងថា មានរឿងអ្វីកើតឡើងនោះទេ ក៏ស្រាប់តែប្រទះឃើញយុវជនខាងលើ ជិះម៉ូតូមួយគ្រឿងក្នុងល្បឿនលឿន ខណៈមកដល់ចំណុចកើតហេតុ ក៏ស្រាប់តែផ្តួលម៉ូតូរត់ចូលទៅក្នុងហាងលក់ស៊ុបចង្កាក់ ដើម្បីឱ្យគេជួយ ។ ពេល
នោះដែរ ពួកគាត់ក៏បានឃើញសមត្ថកិច្ច២នាក់ ដោយម្នាក់មានពាក់ឯកសណ្ឋាន និងម្នាក់ទៀតអត់មានឯកសណ្ឋាន បានរត់ទៅចាប់យុវជនខាងលើបាន រួចហើយក៏បានប្រើហិង្សាវាយដំក្រៀកកាច់កនៅចំពោះ
មុខមហាជន ដែលភ្ញាក់ផ្អើលចោមរោមមើលព្រោងព្រាត ហើយក៏បានដាក់ខ្នោះថែមទៀតផង ។
ប្រភពដដែលបន្តទៀតថា បន្ទាប់ពីដាក់ខ្នោះយុវជនម្នាក់នោះ បានតែដៃម្ខាងឯដៃម្ខាងទៀត បានយកទូរសព្ទ័ទាក់ទងទៅឪពុកម្តាយឱ្យមកជួយ ក៏ត្រូវសមត្ថកិច្ចឆក់យកទូរស័ព្ទនោះទៅបោកចោលថែមទៀតផង ។ បន្តិចក្រោយមក បុរសរងគ្រោះខាងលើខំប្រឹងរើបំរះមិនព្រមទៅជាមួយសមត្ថកិច្ចនោះទេ ដោយស្រែកឱ្យគេជួយ ហើយស្រែកថា រង់ចាំឪពុកម្តាយរបស់ខ្លួនមកសិន ព្រោះមិនមែនជាចោរនោះទេ ដោយស្រែកថា ខ្ញុំមិនមែនចោរទេ… ប៉ុន្តែទោះបីជាយុវជនរូបនោះខំស្រែក និងរើបំរះយ៉ាងណាក៏ដោយ សមត្ថកិច្ចនៅតែចាប់អូសដោយក្របួចកអាវប្រៀប ដូចមានទោសធ្ងន់ធ្ងរណាស់ លើករុញដាក់ចូលរ៉ឺម៉កម៉ូតូដឹកចេញទៅបាត់បន្សល់ទុកនូវចម្ងល់របស់មហាជនកកកុញ ដែលឈរមើល ។
ចំពោះករណីនេះដែរ សមត្ថកិច្ចមូលដ្ឋានបានបញ្ជាក់ប្រាប់ថា ពួកគាត់មិនដឹងថា ជាករណីអ្វីនោះទេ គឺខាងសមត្ថកិច្ចរបស់ក្រសួងមហាផ្ទៃ ជាអ្នកធ្វើរឿងនេះ សូមឱ្យបងប្អូនកុំយល់ច្រឡំមកលើសមត្ថកិច្ចមូលដ្ឋាន ។
ក្រោយហេតុការណ៍ បានកើតឡើងរយៈពេលកន្លះម៉ោង ស្រាប់តែខាងសាច់ញាតិរបស់យុវជនដែលត្រូវសមត្ថកិច្ចឃាត់ខ្លួន បានទៅដល់ក្រសួងមហាផ្ទៃរកយុវជនដែលសមត្ថកិច្ចឃាត់ខ្លួន ។ ពេលមកដល់ក៏ស្រាប់តែឃើញយុវជនរូបនោះដេកដង្ហើមចង្រិតនៅលើរ៉ឺម៉កម៉ូតូទាំងដៃជាប់ខ្នោះ និងមានរបួសស្នាមពេញខ្លួនដោយការវាយដំ ។ ពេលសួរនាំសមត្ថកិច្ចម្នាក់ៗ ក៏មិនដឹងថា មានរឿងអ្វីឱ្យពិតប្រាកដដែល ។ ប្រភពដដែលបានបន្តទៀតថា ដោយសារឃើញសភាពបែបនេះ ក្រុមសាច់ញាតិយុវជន ក៏សុំបញ្ជូនទៅធ្វើការសង្គ្រោះនៅគ្លិនិកបាយ័ន តែដោយសារស្ថានភាពរបួសធ្ងន់ គឺបែកក្បាលបាក់ក្តោងច្រមុះផង និងខៀវភ្នែកផង ពួកគាត់ក៏សំរេចចិត្តបញ្ជួនបន្តទៅសង្គ្រោះនៅមន្ទីរពេទ្យព្រះកុសុមៈ ។
ចំពោះករណីនេះដែរ ក្រុមសាច់ញាតិអ្នករងគ្រោះ ដែលត្រូវសមត្ថកិច្ចដេញចាប់ធ្វើទារុណកម្មយ៉ាងចាស់ដៃ ព្រមទាំងមានរបួសស្នាមពេញខ្លួនផង ដោយមិនមានហេតុផលច្បាស់លាស់ ពួកគាត់សូមឱ្យសមត្ថកិច្ចជួយរកយុត្តិធម៌ឱ្យផង តើមានកំហុសអីបានជាធ្វើដល់ថ្នាក់នេះ ឬមួយក៏ចាប់ច្រឡំ ? មិនអាចសាកសួរដល់ក្រុមសមត្ថកិច្ចដែលចាប់យុវជនរូបនេះវាយដំ និងដាក់ខ្នោះបានទេ ហើយឮថា ក្រុមសមត្ថកិច្ចដៃដល់ទាំងនោះបានគេចខ្លួនអស់ និងមិនទាន់បានដឹងនៅអង្គភាពមួយណាច្បាស់លាស់ក្នុងក្រសួងមហាផ្ទៃនោះនៅឡើយទេព្រឹកម្សិលមិញនេះ ។
នៅថ្ងៃ២៥ ខែឧសភា យុវជនដែលរងគ្រោះដោយការវាយដំយ៉ាងហិង្សាព្រៃផ្សៃ កំពុងស្ថិតនៅក្នុងដំណាក់កាលសង្គ្រោះបន្ទាន់ និងតាមដានពីក្រុមគ្រូពេទ្យនៅឡើយ។ គិតត្រឹមវេលាល្ងាចថ្ងៃដដែល យុវជនរងគ្រោះត្រូវបានគេដឹងថា រងរបួសធ្ងន់នៅក្តោងច្រមុះដែលបាក់ និងមានឈាមកកខ្លាំង ក្រៅពីនេះគឺគ្រេចដៃឆ្វេងខ្លាំងដោយសារការចាប់ជាន់ដាក់ខ្នោះ ។ ចំណែកក្បាលក៏ត្រូវខ្លាំងដែរ ។ការវាយដំយុវជនរងគ្រោះដែលគ្នាមិនមានកំហុសអ្វីសោះនោះ គឺជាកំហុសរបស់នគរបាលដែលយកវិធីវាយដំទាំងកំរោលធ្វើជាត្រីមុខ ។ ស្ត្រីជាសាច់ញាតិយុវជនរងគ្រោះ បានឱ្យដឹងថា ក្រុមគ្រួសារគាត់បានដាក់ពាក្យប្តឹងមន្ត្រីនគរបាលដែលប្រើហិង្សាលើប្អូនប្រុសនោះហើយ ដោយដាក់ទៅនាយកដ្ឋាននគរបាលព្រហ្មទណ្ឌក្រសួងមហាផ្ទៃ ៕
ចែករំលែកព័តមាននេះ