ខេត្តបាត់ដំបង ៖ សេចក្ដីរាយការណ៍បឋមឱ្យដឹងថា អគ្គិភ័យមួយបានឆេះផ្ទះប្រជាពលរដ្ឋអស់ចំនួន៣ខ្នង កាលពីវេលាម៉ោង០៩ និង១៥នាទីយប់ថ្ងៃទី២០ ឧសភា ស្ថិតនៅចំណុចផ្សារតាឡន ក្នុងភូមិត្រពាំងព្រលិត ឃុំសន្តិភាព ស្រុកសំពៅលូន ដែលគេសង្ស័យបណ្ដាលមកពីផ្ទុះកំប៉ុងហ្គាស ។
សេចក្ដីរាយការណ៍បន្តថា លំនៅឋានទាំង៣ខ្នងនោះ ស្ថិតនៅជាប់គ្នាមានលក្ខណ:ជាផ្ទះល្វែង និងមានទំហំ
៥ម៉ែត្រx៦ម៉ែត្រដូចគ្នា ដែលធ្វើពីឈើប្រក់ស័ង្កសី ។ ម្ចាស់ផ្ទះមាន១-ឈ្មោះរឹម ពៅ ភេទស្រី អាយុ៣៧ឆ្នាំ
២-ឈ្មោះអឿន សម្ងាត់ ភេទប្រុស អាយុ៣៩ឆ្នាំ និង៣-ឈ្មោះកែវ ហួន ភេទស្រី អាយុ៦0ឆ្នាំ ។
សមត្ថកិច្ចបាននិយាយដែរថា បើតាមការសួរនាំជំហានដំបូង គឺអគ្គីភ័យនោះទំនងបណ្ដាលមកពីការផ្ទុះកំប៉ុងហ្គាស តែភ្លាមៗគេមិនទាន់ដឹងពីចំណុចចាប់ផ្ដើមនៅឡើយទេ ព្រោះសមត្ថកិច្ចកំពុងសាកសួរម្ចាស់ផ្ទះនិងសាក្សីនៅឡើយ។ ប្រភពដដែលថា មន្ត្រីពន្លត់អគ្គិភ័យនៃអធិការស្រុកសំពៅលូន បានចំណាយពេលជិត២ម៉ោងទើបទប់ស្កាត់បាន លំនៅឋាននិងទ្រព្យសម្បត្តិនៅក្នុងលំនៅឋានទាំង៣ខ្នងនោះស្ទើរក្លាយជាផេះអស់ទៅហើយ។ ពេលនេះ មន្ត្រីជំនាញកំពុងសួរនាំជនរងគ្រោះ ដើម្បីធ្វើរបាយការណ៍អំពីការខាតបង់ ។
ព័ត៌មានលម្អឹតនឹងមានផ្សាយជូនបន្តលើទំព័រកាសែតកោះសន្តិភាព ។
ចែករំលែកព័តមាននេះ