រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប បាន ប្រកាសទទួលស្គាល់គណបក្សពីរបន្ថែមទៀតហើយរហូតមកដល់ថ្ងៃទី១៩ ខែឧសភា សរុប១៣ ។ នេះបើតាមការឲ្យដឹងពីអ្នកនាំពាក្យគ.ជ.ប…
រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប បាន ប្រកាសទទួលស្គាល់គណបក្សពីរបន្ថែមទៀតហើយរហូតមកដល់ថ្ងៃទី១៩ ខែឧសភា សរុប១៣ ។ នេះបើតាមការឲ្យដឹងពីអ្នកនាំពាក្យគ.ជ.ប ។
លោកឌឹម សុវណ្ណារុំ អ្នកនាំពាក្យ គ.ជ.បបានឲ្យដឹងថា គិតត្រឹមថ្ងៃទី១៩ ខែឧសភា ឆ្នាំ២០១៨ ថាគ.ជ.ប បានទទួលស្គាល់ចុះបញ្ជីគណបក្សនយោបាយជាផ្លូវការចំនួន២ទៀត សរុបទាំងអស់១៣គណបក្សហើយ គឺគណបក្សធម្មាធិបតេយ្យឈរនៅ១០មណ្ឌល និងគណបក្សមាតុភូមិយើងឈរនៅ៦មណ្ឌល ។
អ្នកនាំពាក្យបានឲ្យទៀតថា ការទទួលស្គាល់គណបក្សនយោបាយ២បន្ថែមសរុប១៣ហើយ រួមមានទី១- គណបក្សធម្មាធិបតេយ្យឈរនៅ១០មណ្ឌល ទី២- គណបក្សមាតុភូមិយើងឈរនៅ៦មណ្ឌល ទី៣- គណបក្សខ្មែរឈប់ក្រ ឈរនៅ២៥មណ្ឌល ទី៤- គណបក្សសម្ព័ន្ធ ដើម្បីប្រជាធិបតេយ្យឈរនៅ២៥មណ្ឌល ទី៥- គណបក្សសំបុកឃ្មុំសង្គមប្រជាធិបតេយ្យឈរនៅ២៥មណ្ឌល ទី៦-គណបក្សប្រជាធិបតេយ្យមូលដ្ឋានឈរនៅ២៥មណ្ឌល ទី៧-គណបក្សខ្មែរតែ១ ឈរនៅ១៦មណ្ឌល ទី៨- គណបក្សពន្លឺថ្មី ឈរនៅ១៣មណ្ឌល ទី៩- គណបក្សប្រជាជនកម្ពុជា ឈរនៅ២៥មណ្ឌល ទី១០-គណបក្សយុវជនកម្ពុជា ឈរនៅ១៧មណ្ឌល ទី១១- គណប ក្សសញ្ជាតិកម្ពុជា ឈរនៅ២៥មណ្ឌល ទី១២- គណបក្សខ្មែររួបរួមជាតិ ឈរនៅ២៥មណ្ឌល ទី១៣- គណបក្សហ្វ៊ុនស៊ិនប៊ិចឈរនៅ២៥មណ្ឌល ។
បើតាមការអះអាងរបស់អ្នកនាំពាក្យ គ.ជ.ប បានឲ្យដឹងនៅក្នុងថ្ងៃទី២០ ខែឧសភានេះ គ.ជ.ប នឹងប្រកាសទទួលគណបក្សនយោបាយប្រមាណពី១គណបក្សទៅ៣គណបក្សនយោបាយ ។
លោកឌឹម សុវណ្ណារុំបានឲ្យដឹងថា ថ្ងៃទី២១ ឧសភា គឺជាថ្ងៃទី៧ ដែលគ.ជ.បត្រូវពិនិត្យហើយបើគណបក្សណាដែលបំពេញបែបបទមិនទាន់ចប់ គជបនឹងចេញសេចក្តីជូនដំណឹង ហើយគណបក្សនោះនឹងមានពេល៥ថ្ងៃទៀត បន្ទាប់ពីទទួលបានសេចក្តីជូនដំណឹងនេះដើម្បីបញ្ចប់នីតិវិធី ។
សូមជម្រាបថា ការបោះឆ្នោតជ្រើសតាំងអ្នកតំណាងរាស្ត្រ អាណត្តិទី៦នឹងប្រព្រឹត្តិទៅនៅថ្ងៃទី២៩ ខែកក្កដា ឆ្នាំ២០១៨ ការបោះឆ្នោតអាណត្តិទី៦នេះ មានគណបក្សចំនួន២០បានសុំចុះបញ្ជីបេក្ខជនឈរឈ្មោះនៅគ.ជ.ប ដើម្បីចូលរួមបោះឆ្នោត ។
សម្រាប់ការបោះឆ្នោតនៅកម្ពុជាត្រូវបានឆ្លងកាត់៦ដំណាក់កាលហើយ ។ ក្នុងនោះការបោះឆ្នោតក្នុងនោះមានការបោះឆ្នោតជ្រើសតាំងតំណាងរាស្ត្រនីតិកាលទី១ ដល់ទី៦ នេះមាន៖ អាណត្តិទី១ ឆ្នាំ១៩៩៣ មាន២០គណបក្សចូលរួមបោះឆ្នោត ចូលរួមអាណត្តិទី២ឆ្នាំ១៩៩៨ មានគណបក្សនយោបាយ៣៩ចូលរួម អាណត្តិទី៣ ឆ្នាំ២០០៣ មានគណបក្សនយោបាយ ២៣ចូលរួម អាណត្តិទី៤ ឆ្នាំ២០០៨ មាន១១គណបក្សចូលរួម អាណត្តិទី៥ ឆ្នាំ២០១៣ មាន០៨គណបក្សចូលរួម និងអាណត្តិទី ៦ ឆ្នាំ២០១៨ មាន២០គណបក្សចូលរួម ។
លោក សុខ ឥសានអ្នកនាំពាក្យគណបក្សប្រជាជនកម្ពុជាបានឲ្យដឹងថា ការចូលរួមប្រកួតប្រជែងដោយគណបក្សច្រើនបញ្ជាក់ថា នៅកម្ពុជាពិតជាមានលទ្ធិប្រជាធិបតេយ្យសេរីពហុបក្ស ស្របតាមស្មារតីនៃរដ្ឋធម្មនុញ្ញ និងស្មារតីនៃកិច្ចព្រមព្រៀងទីក្រុងប៉ារីសថ្ងៃទី២៣ ខែតុលា ឆ្នាំ ១៩៩១ ។ ដូច្នេះការប្រកាសមិនចូលរួមប្រកួតប្រជែងការបោះឆ្នោតនាថ្ងៃទី២៩ ខែកក្កដា ឆ្នាំ២០១៨ នេះ គឺជាសិទ្ធិសម្រេចរបស់សាម៉ី គណបក្សនយោបាយដែលយល់ថា មិនមានលក្ខណសម្បត្តិគ្រប់គ្រាន់ក្នុងការប្រកួតប្រជែង លើទីលានប្រជាធិបតេយ្យនៅកម្ពុជា ។
នេះជារឿងធម្មតានៅក្នងសង្គមប្រជាធិបតេយ្យដែលគ្មានច្បាប់ណាចាប់បង្ខំឲ្យគ្រប់គណបក្សនយោបាយដែលមានឈ្មោះក្នុងបញ្ជីគណបក្សនយោបាយនៅក្រសួងមហាផ្ទៃ ត្រូវតែចុះឈ្មោះជាបេក្ខភាពប្រកួតប្រជែងបោះឆ្នោតនោះឡើយ ៕
ចែករំលែកព័តមាននេះ