សហរដ្ឋអាមេរិក ៖ តុលាការចាប់ផ្ដើមសួរចម្លើយ ក្មេងប្រុសជំទង់ម្នាក់អាយុ១៧ឆ្នាំ ដែលបាញ់សម្លាប់មនុស្ស១០នាក់ កាលពីថ្ងៃទី១៨ ឧសភា ក្នុងវិទ្យាល័យរបស់គេ គឺវិទ្យាល័យSANTA FE នៅរដ្ឋតិចសាស់ មុនពេលប្រគល់ខ្លួនឲ្យប៉ូលិស ក្រោយការបាញ់ប្រហារថ្មីក្នុងគ្រឹះស្ថានសិក្សាអាមេរិក។
ក្មេងប្រុសជំទង់នោះ ឈ្មោះ DIMITRIOS PAGOURIZIS ត្រូវជាប់ការចោទប្រកាន់ពីបទសម្លាប់មនុស្ស ជាអំពើឧក្រិដ្ឋអាចទទួលទោសប្រហារជីវិត។ ទោះបីមិត្តភក្តិមួយចំនួនរបស់គេនិយាយថា គេជាមនុស្សស្ងាត់ស្ងៀម មិនសូវទាក់ទងជាមួយគេឯងក៏ដោយ។ ហើយមូលហេតុនៃការសម្លាប់រង្គាលនេះ នៅពុំទាន់ដឹងនៅឡើយ។ តាមបណ្ដាព័ត៌មានបានរកឃើញក្នុងកុំព្យូទ័រ និងទូរស័ព្ទដៃរបស់គេ អាចឲ្យគេគិតថា ខ្មាន់កាំភ្លើងមានបំណងធ្វើអត្តឃាត ក្រោយការបាញ់ប្រហារ ដែលរូបគេមានផែនការទុកមុន។ នេះជាការបញ្ជាក់របស់អភិបាលរដ្ឋតិចសាស់លោក GREG ABBOTT។
សិស្សវិទ្យាល័យម្នាក់គូសបញ្ជាក់ប្រាប់ទូរទស្សន៍ក្នុងស្រុកមួយថា ក្មេងប្រុសនេះជាអ្នកលេងបាល់ទាត់ ហើយរូបគេរងការវាយដំពីគ្រូបង្ហាត់ និងរងការប្រមាថ។ យោងតាមអាជ្ញាធរថា នាពេលថ្មីៗនេះគេបានផ្សាយរូបថតមួយសន្លឹក តាម FACEBOOK ដែលរូបថតនេះ គេពាក់អាវយឺតពណ៌ខ្មៅ មានចារពាក្យថា កើតដើម្បីសម្លាប់។
ពាក់អាវម៉ង់តូវែង ពណ៌ខ្មៅ លាក់កាំភ្លើងខ្លី មួយដើម ជារបស់ឱពុកគេ ក្មេងប្រុសDIMITRIOS PAGOURIZIS បានដើរចូលថ្នាក់រៀននាវេលាម៉ោង៨ព្រឹក ហើយបាញ់ប្រហារតែម្ដង សម្លាប់មនុស្ស១០នាក់ និងធ្វើឲ្យរបួស១០នាក់ទៀត៕
ចែករំលែកព័តមាននេះ