ខេត្តក្រចេះ ៖ សេចក្តីរាយការណ៍ឱ្យដឹងថា ក្មេងស្រីអាយុ១១ឆ្នាំម្នាក់ បានពុលរហូតដល់ស្លាប់បាត់បង់ជីវិត ក្រោយនាំទៅសង្គ្រោះដល់មន្ទីពេទ្យរាជធានីភ្នំពេញបានរយៈពេល២ថ្ងៃ នៅតែជួយជីវិតនាងមិនបាន ហើយត្រូវបានអាជ្ញាធរឃុំកំពង់ចាម ស្រុកសំបូរ ធ្វើការសន្និដ្ឋានថា គឺដោយសារនាងពុលសាច់ហតដកប៉ាត់តេ ។
មេឃុំកំពង់ចាម លោកឈិត ណន បានឱ្យដឹង នៅថ្ងៃទី១៦ ឧសភា នេះថា ក្មេងស្រីរងគ្រោះឈ្មោះកាន់ ស្រីនិត អាយុ១១ឆ្នាំ ។ នាងបានទិញហតដកនេះពីផ្ទះលក់គ្រឿងទេសមួយកន្លែងនៅក្បែរផ្ទះរបស់នាង ស្ថិតក្នុងភូមិអំពិលទឹក ឃុំកំពង់ចាម ស្រុកសំបូរ ។ លោកមេឃុំកំពង់ចាមបន្តថា ក្រោយពីនាងហូបរួច ក្មេងស្រីរងគ្រោះបានឡើងទៅសម្ងំដេកនៅលើផ្ទះបានរយៈពេលជិត៤ម៉ោង ឱពុកនាងបានទៅដាស់ ក៏ឃើញក្មេងស្រីរងគ្រោះមានអាការៈរវើរវាយ ក្អួតចង្អោរ ទន់ដៃជើង រហូតប្រកាច់រហូតបែកពពុះមាត់ ។
លោកបញ្ជាក់ថា ក្រោយពេលឃើញអាការៈបែបនេះ ក្រុមគ្រួសារបានចាត់បញ្ចូននាងមកសង្គ្រោះនៅមន្ទីរពេទ្យ ដោយសារអាការៈពុលធ្ងន់ធ្ងរ ក៏បញ្ជូនបន្តទៅពេទ្យនៅរាជធានីភ្នំពេញ តែមិនអាចជួយសង្គ្រោះបានរហូតស្លាប់កាលពីយប់ថ្ងៃទី១៥ ឧសភា ។
លោកមេឃុំបានបញ្ជាក់ឱ្យដឹងទៀតថា នំបញ្ចប់ជាច្រើនក៏ដូចជាប៉ាត់តេកញ្ចប់ ត្រូវបាននគរបាលប្រមូលយកពីផ្ទះលក់គ្រឿងទេស ដើម្បីយកទៅធ្វើកោសល្យវិច្ច័យហើយ ។
ចែករំលែកព័តមាននេះ