រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានថ្លែងថា ការបោះឆ្នោតនៅកម្ពុជាកន្លងមក គឺមានភាគរយនៃប្រជាពលរដ្ឋទៅបោះឆ្នោតមានចំនួនជាង៦៩% បានទៅបោះឆ្នោត ខណៈបណ្តាប្រទេសជឿនលឿនមួយចំនួន គឺមានចំនួនភាគរយនៃអ្នកទៅបោះឆ្នោតតិចជាងកម្ពុជា ។
សម្តេចបានសរសេរសារក្នុងហ្វេសប៊ុកនៅព្រឹកថ្ងៃទី១៦ ខែឧសភាថា បើធ្វើការប្រៀបធៀបភាគរយនៃការចូលរួមបោះឆ្នោតពីសំណាក់ប្រជាពលរដ្ឋរវាងប្រទេសកម្ពុជា និងសហគមន៍អ៊ឺរ៉ុប និងសហរដ្ឋអាមេរិក គឺអ៊ឺរ៉ុបមានប្រជាពលរដ្ឋទៅបោះឆ្នោតក្នុងរង្វង់៣០% ក៏អាចទទួលយកបាន រីឯសហរដ្ឋអាមេរិក គឺមានពលរដ្ឋទៅបោះឆ្នោតតែក្នុងរង្វង់៤០%ប៉ុណ្ណោះ ។ ប៉ុន្តែចំពោះកម្ពុជា គឺមានពលរដ្ឋជាង៦៩%ទៅបោះឆ្នោត ។
សម្តេចតេជោបន្តទៀតថា ៖ «នេះ គឺបង្ហាញច្បាស់អំពីការរីកចម្រើននៃលទ្ធិប្រជាធិបតេយ្យពិតប្រាកដនៅក្នុងប្រទេសយើងមិនដូច ការបកស្រាយដោយជនអគតិមួយចំនួនឡើយ ។ ច្បាស់ណាស់ គឺគ្មានមេដឹកនាំណាមួយណែនាំពលរដ្ឋខ្លួនមិនឲ្យទៅបោះឆ្នោតទេ មានតែជនអគតិដែលមានបំណងបំផ្លិចបំផ្លាញលទ្ធិប្រជាធិបតេយ្យ និងឆន្ទៈប្រជាពលរដ្ឋទេ ទើបពួកគេអាចធ្វើដូច្នេះ» ។
សូមរម្លឹកថា ថ្មីនេះលោក សម រង្ស៊ី អតីតមេដឹកនាំអតីតគណបក្សសង្គ្រោះជាតិបានអំពាវនាវម្តងហើយម្តងទៀត កុំឲ្យប្រជាពលរដ្ឋទៅបោះឆ្នោត បើគ្មានវត្តមានបក្សប្រឆាំងចូលរួមប្រកួតប្រជែងការបោះឆ្នោតជាតិឆ្នាំ២០១៨ ជ្រើសតាំងសមាជិកសភាសម្រាប់អាសនៈ១២៥ ដែលនឹងប្រព្រឹត្តទៅនាថ្ងៃទី២៩ ខែកក្កដា ឆ្នាំ២០១៨ នេះ សម្តេចនាយករដ្ឋមន្ត្រីក៏បានបញ្ជាក់ជូនជនរួមជាតិថា ថ្ងៃបោះឆ្នោតជ្រើសតាំងតំណាងរាស្ត្រ គឺកាន់តែខិតជិតមកដល់ហើយ គឺនៅតែជាង២ខែទៀតប៉ុណ្ណោះ ហើយមកទល់ថ្ងៃទី១៦ ឧសភានេះ គឺមានគណបក្សនយោបាយ៥ ដូចជា ១- គណបក្សប្រជាជនកម្ពុជា ២- គណបក្សយុវជនកម្ពុជា ៣- គណបក្សសញ្ជាតិកម្ពុជា ៤- គណបក្សខ្មែររួបរួមជាតិ និង៥- គណបក្សហ្វ៊ុនស៊ិនប៉ិចដែលបានបំពេញបែបបទត្រឹមត្រូវ ចុះបញ្ជី និងបានទទួលស្គាល់ជាផ្លូវការពី គ.ជ.ប ក្នុងការចូលរួមប្រកួតប្រជែងការបោះឆ្នោតជ្រើសតាំងតំណាងរាស្ត្រនៅថ្ងៃទី២៩ កក្កដា ឆ្នាំ ២០១៨ ។ សម្តេចបន្ថែមទៀតថា នៅថ្ងៃទី១៦ ឧសភានេះ គឺគ.ជ.ប និងពិនិត្យសម្រេចទទួលស្គាល់គណបក្សនយោបាយមួយចំនួនថែមទៀតដែលបានបំពេញបែបបទត្រឹមត្រូវរួចរាល់ហើយ ។
យោងតាមចំនួនគណបក្សនយោបាយដែលបានដាក់ពាក្យចុះបញ្ជីចូលរួមប្រកួតប្រជែងការបោះឆ្នោតខាងមុខនេះរួចហើយ គឺមានគណបក្សនយោបាយចំនួន២០ដែល គ.ជ.ប កំពុងពិនិត្យបែបបទថា តើបានបំពេញត្រឹមត្រូវរួចរាល់ហើយឬនៅ មានខ្វះខាតអ្វី ។ ជាមួយគ្នានេះផងដែរ នាយករដ្ឋមន្ត្រីក៏បានអំពាវនាវសូមឲ្យបងប្អូនជនរួមជាតិ និងកូនក្មួយយុវជនទៅបោះឆ្នោតនៅក្នុងថ្ងៃបោះឆ្នោតថ្ងៃទី២៩ ខែកក្កដា ឆ្នាំំ២០១៨ ខាងមុខទាំងអស់គ្នា ។
សម្តេចតេជោ បន្ថែមទៀតថា ៖ «អរគុណបងប្អូន និងកូនក្មួយដែលមានជំនឿជឿជាក់លើការដឹកនាំរបស់ខ្ញុំ ហើយបន្តបោះឆ្នោតឲ្យគណបក្សប្រជាជន ដើម្បីខ្ញុំមានឱកាសដឹកនាំប្រទេសជាតិដែលធានាបាននូវសុខសន្តិភាព និងការអភិវឌ្ឍគង់វង្សយូរអង្វែង» ៕
ចែករំលែកព័តមាននេះ