ខេត្តព្រះសីហនុ ៖ រថយន្តម៉ាកហ៊ីយ៉ាន់ដាយ (រថយន្តដឹកសំរាម) មួយគ្រឿងបើកបរក្នុងទិសដៅពីភ្នំពេញទៅខេត្តព្រះសីហនុបានបុកពីក្រោយម៉ូតូមួយគ្រឿងម៉ាកហុងដា ពណ៌ខ្មៅ បណ្តាលឱ្យស្លាប់ម្នាក់នៅនឹងកន្លែងកើតហេតុ និងរបួសធ្ងន់ម្នាក់ របួសស្រាលម្នាក់ ។ ហេតុការណ៍នេះបានកើតឡើងកាលពីវេលាម៉ោង៦និង៤០នាទីព្រឹកថ្ងៃទី១០ មេសា ឆ្នាំ២០១៨ ស្ថិតក្នុងភូមិស្មាច់ដែង ឃុំរាម ស្រុកព្រៃនប់ ។
តាមប្រភពបានឱ្យដឹងថា ជនរងគ្រោះទាំង៣នាក់រួមមាន ១-ឈ្មោះនេន វិជ្ជា ភេទប្រុស អាយុ២១ឆ្នាំ មុខរបរកម្មកររោងចក្រ ជាអ្នកបើកបរម៉ូតូ មានទីលំនៅភូមិទួលទទឹង១ ឃុំទួលទទឹង ស្រុកព្រៃនប់ បានស្លាប់នៅកន្លែងកើតហេតុ ២-ឈ្មោះម៉ី វិចិត្រ ភេទប្រុស អាយុ២១ឆ្នាំ មុខរបរកម្មកររោងចក្រ មានទីលំនៅភូមិបត់គគីរ ឃុំអូរឧកញ៉ាហេង ស្រុកព្រៃនប់ រងរបួសធ្ងន់ និង៣-ឈ្មោះម៉ៅ ទឹប ភេទប្រុស អាយុ៣១ឆ្នាំ មុខរបរកម្មកររោងចក្រ មានទីលំនៅភូមិបត់គគីរ ឃុំអូរឧកញ៉ាហេង ស្រុកព្រៃនប់ រងរបួសស្រាល។
បច្ចុប្បន្ន សពត្រូវបានសាច់ញាតិរៀបចំយកទៅធ្វើបុណ្យតាមប្រពៃណី រីឯអ្នករងរបួសត្រូវបានបញ្ជូនទៅសង្គ្រោះនៅពេទ្យខេត្ត៕
ចែករំលែកព័តមាននេះ