ប្រទេសប៉ាគីស្ថាន ៖ រដ្ឋមន្ត្រីមហាផ្ទៃប៉ាគីស្ថានលោក AHSAN IQBALរងរបួស កាលពីថ្ងៃទី៦ ឧសភា ដោយគ្រាប់កាំភ្លើង ពេលលោកចូលរួមក្នុងអង្គមីទ្ទីងឃោសនាបោះឆ្នោតមួយ ខណៈសល់ពេលប៉ុន្មានខែទៀតដល់ការបោះឆ្នោតសភា…
ប្រទេសប៉ាគីស្ថាន ៖ រដ្ឋមន្ត្រីមហាផ្ទៃប៉ាគីស្ថានលោក AHSAN IQBALរងរបួស កាលពីថ្ងៃទី៦ ឧសភា ដោយគ្រាប់កាំភ្លើង ពេលលោកចូលរួមក្នុងអង្គមីទ្ទីងឃោសនាបោះឆ្នោតមួយ ខណៈសល់ពេលប៉ុន្មានខែទៀតដល់ការបោះឆ្នោតសភា ក៏ប៉ុន្តែអាយុជីវិតរបស់លោកពុំមានគ្រោះថ្នាក់ឡើយ។
លោក RAJA RIFFAT MUKHTAR អ្នកទទួលខុសត្រូវប៉ូលិសម្នាក់ ថ្លែងថា ជនសង្ស័យមានឈ្មោះថា ABID អាយុប្រមាណ២០ឆ្នាំ បានបាញ់លើរដ្ឋមន្ត្រីរូបនេះជាមួយកាំភ្លើងខ្លី១ដើមហើយត្រូវចំដៃស្ដាំលោក។
អ្នកនាំពាក្យរបស់ខេត្ត PENJABលោកMALIK AHMED KHAN ថ្លែងថា យុវជនរូបនេះប្រុងបាញ់ជាលើកទី២ តែត្រូវប៉ូលិស និងបណ្ដាអ្នកចូលរួមក្នុងមីទ្ទីងសម្លាប់។ លោកបន្តថា អាយុជីវិតរបស់រដ្ឋមន្ត្រី ដែលទទួលការវះកាត់ពុំមានគ្រោះថ្នាក់ឡើយ។
វីដេអូមួយចេញផ្សាយដោយគណបក្សកាន់អំណាច គឺគណបក្សសម្ព័ន្ធភាពអ៊ិស្លាមPMLN បង្ហាញពីរូបលោកត្រូវបានគេដាក់ក្នុងឧទ្ធម្ភាគចក្រមួយគ្រឿង។ ការវាយប្រហារនេះ កើតមានខណៈលោក AHSAN IQBAL ត្រៀមចាកចេញពីមីទ្ទីងបោះឆ្នោតមួយនៅមណ្ឌលរបស់លោកនៃស្រុក NAROWAL។ ប៉ាគីស្ថានរៀបចំខ្លួនសម្រាប់ការបោះឆ្នោតសភានាប៉ុន្មានខែខាងមុខនេះ ទោះបីជាកាលបរិច្ឆេទមួយនៅពុំទាន់កំណត់ក៏ដោយ។
នាយករដ្ឋមន្ត្រីលោក SHAHID KHAQAN ABBASI បានថ្កោលទោសការវាយប្រហារនេះ ក៏ដូចជាប្រមុខគណបក្សប្រឆាំងលោក IMRAN KHAN និងលោក BILAWAL BHUTTO កូនប្រុសលោកស្រីបេណាហ្សៀរប៊ូតូ ដែលត្រូវគេធ្វើឃាតកាលពីឆ្នាំ២០០៧ក្នុងអង្គមីទ្ទីងឃោសនាបោះឆ្នោតមួយ។ ប្រមុខកងទ័ពប៉ាគីស្ថានឧត្ដមសេនីយ៍ QAMAR JAVED BAJWA ក៏ថ្កោលទោសខ្លាំងដែរ៕
ចែករំលែកព័តមាននេះ