រាជធានីភ្នំពេញ ៖ ក្នុងមួយឆ្នាំៗ សិស្សានុសិស្សដែលបញ្ចប់ថ្នាក់មធ្យមសិក្សាទុតិយភូមិមានរាប់ម៉ឺននាក់ និងបានបន្តទៅសិក្សាជំនាញរៀងៗខ្លួននៅថ្នាក់ឧត្តមសិក្សា ដោយរំពឹងថា នៅពេលរៀនចប់ នឹងទទួលបានការងារដែលខ្លួនស្រឡាញ់ ។ ក្នុងនោះ…
រាជធានីភ្នំពេញ ៖ ក្នុងមួយឆ្នាំៗ សិស្សានុសិស្សដែលបញ្ចប់ថ្នាក់មធ្យមសិក្សាទុតិយភូមិមានរាប់ម៉ឺននាក់ និងបានបន្តទៅសិក្សាជំនាញរៀងៗខ្លួននៅថ្នាក់ឧត្តមសិក្សា ដោយរំពឹងថា នៅពេលរៀនចប់ នឹងទទួលបានការងារដែលខ្លួនស្រឡាញ់ ។ ក្នុងនោះ អ្នកខ្លះក៏បានសម្រេចបំណងប្រាថ្នារបស់ពួកគេ ប៉ុន្ដែខ្លះទៀតមិនបានសម្រេចក្ដីសុបិនឡើយ ដោយមានការងារដែលខុសពីជំនាញរបស់ខ្លួនទៅវិញ ។ ដូច្នេះ តើគួរសិក្សាតាមបំណងប្រាថ្នា ឬសិក្សាតាមតម្រូវការការងារក្នុងសង្គម ?
បើតាមការលើកឡើងរបស់តំណាងស្ថាប័នអប់រំនៅក្នុងប្រទេសកម្ពុជា បានឲ្យដឹងថា បច្ចុប្បន្ននេះ ជំនាញណាក៏មានឱកាសការងារច្រើនដែរ គឺវាអាស្រ័យទៅលើកត្តាសិស្ស-និស្សិតខ្លួនឯងទេ ។ ជាក់ស្ដែង និស្សិតខ្លះមិនទាន់ទាំងរៀនចប់ផង ពួកគេអាចរកការងារ មានប្រាក់ចំណូលសម្រាប់ផ្គត់ផ្គង់ខ្លួន និងគ្រួសារទៅហើយ ។
លោក ឃឹម ផុន នាយកប្រតិបត្តិក្រុមហ៊ុន NTC Group ដែលជាស្ថាប័នអប់រំថ្នាក់ក្រោមឧត្តមសិក្សាមួយនៅកម្ពុជា មើលឃើញថា បច្ចុប្បន្ននេះ សិស្សដែលបញ្ចប់ថ្នាក់មធ្យមសិក្សាហើយបន្តនៅថ្នាក់ឧត្តមសិក្សា ភាគច្រើនចាប់យកជំនាញពាណិជ្ជកម្ម និងធ្វើការក្នុងការិយាល័យច្រើនជាងជំនាញដែលចុះអនុវត្តនៅខាងក្រៅផ្ទាល់ ដូចជា ការងារនៅរោងជាង ជាដើម ។
លោកថា ៖« ពេលខ្លះ ដោយសារតែសិស្សជាកូនអ្នកមានជីវភាពធូរធារផងនោះ គេចាប់យកជំនាញពាណិជ្ជកម្ម សម្រាប់សិក្សាថ្នាក់ឧត្តមហើយនៅពេលបញ្ចប់ការសិក្សា ក៏បើកអាជីវកម្មផ្ទាល់ខ្លួន ឬក៏ធ្វើជាអ្នកគ្រប់គ្រងជំនួញតែម្ដង » ។
លោកអះអាងថា ៖« ជំនាញពាណិជ្ជកម្ម ជាជំនាញមួយដែលមានឱកាសការងារច្រើន នៅក្នុងបរិបទសង្គមកម្ពុជាសព្វថ្ងៃនេះ ។ ក្នុងន័យនេះ មិនមែនចង់បានន័យថា ជំនាញផ្សេងអត់ការងារនោះទេ ។ បច្ចុប្បន្ននេះ ឱកាសការងារនៅក្នុងប្រទេសកម្ពុជា មានច្រើនណាស់ ជាក់ស្ដែងដូចយើងបានឃើញស្រាប់ ក្នុង១ថ្ងៃៗ មានក្រុមហ៊ុននានាបានប្រកាសរកបុគ្គលិក ដើម្បីប្រើប្រាស់ការងារនៅក្នុងស្ថាប័នខ្លួន ពេលខ្លះ រកសឹងតែមិនបានផង»។
នាយកការិយាល័យធនធានមនុស្សនៃសាកលវិទ្យាល័យកម្ពុជា លោក ណម ស៊ីណាត បានមានប្រសាសន៍ដែរថា បច្ចុប្បន្ននេះ មានមុខជំនាញ៣ ដែលសិស្ស-និស្សិតចាប់អារម្មណ៍ច្រើនជាងគេ ក្នុងនោះមាន ពាណិជ្ជកម្ម, ទំនាក់ទំនងអន្តរជាតិ និងច្បាប់ ។
លោកបានបន្តថា សម្រាប់ជំនាញពាណិជ្ជកម្ម វាអាចឲ្យសិស្សដែលកំពុងសិក្សារកការងារធ្វើបាន និងអាចរកចំណូលសម្រាប់ការចាយវាយរបស់ខ្លួន ដើម្បីកាត់បន្ថយការចំណាយពីគ្រួសារ។ លោកថា ៖« ជំនាញពាណិជ្ជកម្មនេះ មានភាពទូលំទូលាយដូចជា ទីផ្សារ, ធនាគារ និងហិរញ្ញវត្ថុ, ការគ្រប់គ្រងអាជីវកម្ម និងទេសចរណ៍ ជាដើម សុទ្ធតែស្ថិតនៅក្នុងមុខជំនាញនេះ » ។
លោកបន្តទៀតថា សម្រាប់សិស្សដែលនឹងបញ្ចប់ថ្នាក់មធ្យមសិក្សានៅពេលខាងមុខនេះ ក៏គួរតែសម្លឹងមើលពីបរិបទទីផ្សារការងារនៅក្នុងប្រទេស និងតំបន់ឲ្យបានច្បាស់លាស់ដែរ ជៀសវាងការសិក្សាតាមគ្នា និងមិនចំជំនាញរបស់ខ្លួនដែលមាន ។ លោកថា បើសិនជាសិស្សចង់ក្លាយជាមន្ត្រីការទូត ជំនាញទំនាក់ទំនងអន្តរជាតិ គឺជាជំនាញដែលត្រូវនឹងការងារនេះ ក៏ប៉ុន្តែភាសាអង់គ្លេស ក៏ជាភាសាចាំបាច់មួយសម្រាប់ជាទុនក្នុងការបន្តការសិក្សាលើមុខជំនាញផងដែរ ។
លោក ខឹម ភីឡែន និស្សិតបញ្ចប់ការសិក្សាថ្នាក់បរិញ្ញាបត្រ ផ្នែកអក្សរសាស្ត្រអង់គ្លេស នៃសាកលវិទ្យាល័យបៀលប្រាយ បានឲ្យដឹងថា ក្ដីស្រមៃរបស់លោកតាំងពីក្មេងមក គឺចង់ក្លាយជាគ្រូបង្រៀនភាសាអង់គ្លេសដ៏ពូកែម្នាក់ ដូច្នេះហើយលោកបានជ្រើសរើសរៀនផ្នែកអក្សរសាស្ត្រអង់គ្លេសនេះ ប៉ុន្តែក្រោយបញ្ចប់ការសិក្សា លោកមិនបានសម្រេចការងារតាមអ្វីដែលខ្លួនប៉ងប្រាថ្នាឡើយ តែបែរជាត្រូវធ្វើជាអ្នកវាយកុំព្យូទ័រផ្នែករដ្ឋបាលនៅធនាគារក្នុងស្រុកមួយទៅវិញ ។
ទោះយ៉ាងនេះក្ដី អតីតនិស្សិតរូបនេះនិយាយថា ៖« ក្តីស្រមៃជាគ្រូបង្រៀនភាសាអង់គ្លេសរបស់ខ្ញុំ មិនបញ្ចប់ត្រឹមហ្នឹងឡើយ ទោះបីជាបច្ចុប្បន្ន ខ្ញុំកំពុងធ្វើការងារមួយដែលខុសពីជំនាញដែលធ្លាប់បានរៀនសូត្រកន្លងមកក៏ដោយ » ។
លោក ខឹម ភីឡែន បន្តថា ៖« ការដែលខ្ញុំចូលបម្រើការងារនៅក្នុងធនាគារ ខុសពីជំនាញខ្លួននោះ ដោយសារតែក្រោយបញ្ចប់ការសិក្សាភ្លាម ពុំមានការងារធ្វើ ហើយទៅថ្ងៃមុខ ខ្ញុំមិនរំពឹងថា នឹងនៅធ្វើការក្នុងធនាគារនេះ ឬយ៉ាងណានោះទេ ដរាបណាក្តីស្រមៃធ្វើជាគ្រូបង្រៀននៅតែស្ថិតក្នុងដួងចិត្តខ្ញុំរហូត » ។
ស្រដៀងគ្នានេះដែរ លោក នៅ សារ័ត្ន អតីតនិស្សិតបញ្ចប់ការសិក្សាថ្នាក់បិរញ្ញាបត្រ ផ្នែកអក្សរសាស្ត្រអង់គ្លេស នៃសាកលវិទ្យាល័យធនធានមនុស្ស មានវ័យ២៦ឆ្នាំ បានលើកឡើងថា គោលបំណងរបស់លោក គឺចង់ក្លាយជាសាស្ត្រាចារ្យអក្សរសាស្ត្រអង់គ្លេសម្នាក់ ប៉ុន្ដែបច្ចុប្បន្ន លោកមានការងារជាជាងថតរូបតាមរោងបុណ្យ, រោងការ និងពិធីផ្សេងៗទៅវិញ ។
លោក នៅ សារ័ត្ន បានឲ្យដឹងថា ដោយសារតែកត្តាខ្វះខាត លោកសម្រេចយកពេលវេលាសល់ពីការសិក្សាទៅរៀនថតរូប រហូតចេះស្ទាត់ជំនាញ ក៏បានចូលបម្រើការងារជាជាងថតរូប ។ លោកថា ៖« ក្រោយពេលចេះថតរូប ខ្ញុំបានចាប់ដៃរកស៊ីដើរថតរូបតាមរោងកម្មវិធីជាមួយក្រុមថតរូបដែលខ្ញុំស្គាល់ ដោយក្នុង១រោង មានសមាជិក៥នាក់ អាចរកប្រាក់បានចាប់ពី២៥០ដុល្លារ ទៅ៣០០ដុល្លារ ។ ក្នុងនោះ យើងគ្រាន់តែថតរូប និងផ្តិតជូនម្ចាស់ពិធី ឬម្ចាស់រូបតែប៉ុណ្ណោះ » ។
យ៉ាងណាក៏ដោយ លោក នៅ សារ័ត្ន បញ្ជាក់ថា បើទោះបីជាមានការងារធ្វើ និងរកប្រាក់ចំណូលបានគួរសមក៏ដោយ ក៏លោកមិនបោះបង់ការសិក្សាដែរ ព្រោះលោកបានបញ្ចប់បរិញ្ញាបត្រទៅហើយ ហើយទៅថ្ងៃអនាគត លោកនឹងរៀនបន្តទៀត ប្រសិនបើលោកអាចដកឃ្លាពីការងារថតរូបនេះ ។
គួរបញ្ជាក់ថា ក្រៅពីជំនាញពាណិជ្ជកម្ម និងជំនាញការងារក្នុងការិយាល័យ រាជរដ្ឋាភិបាលក៏បានបង្កើតសាលាបច្ចេកទេសជាច្រើនផងដែរ ដើម្បីផ្ដល់ការបណ្ដុះបណ្ដាលដល់សិស្ស-និស្សិតដែលស្រឡាញ់ជំនាញបច្ចេកទេស ។ ក៏ប៉ុន្តែជំនាញបច្ចេកទេសមិនសូវមានសិស្សចាប់អារម្មណ៍ប៉ុន្មានទេ បើធៀបនឹងជំនាញផ្សេងៗដែលបម្រើការនៅការិយាល័យ មានបន្ទប់ម៉ាស៊ីនត្រជាក់ ពីព្រោះជំនាញបច្ចេកទេសភាគច្រើនត្រូវចុះអនុវត្តផ្ទាល់នៅខាងក្រៅ ៕
ចែករំលែកព័តមាននេះ