រាជធានីភ្នំពេញ ៖ កៅស៊ូជាផលិតផលកសិឧស្សាហកម្មដ៏សំខាន់មួយសម្រាប់សង្វាក់ផលិតកម្មធំៗនៅលើពិភពលោក ហើយមានប្រទេសមិនច្រើនទេ ដែលអាចដាំដំណាំកៅស៊ូបាន ក្នុងនោះកម្ពុជាក៏ជាប្រទេសមានស្ថានភាពអំណោយផលមួយលើដំណាំនេះផងដែរ ។ តាមរបាយការណ៍របស់អគ្គនាយកដ្ឋានកៅស៊ូនៃក្រសួងកសិកម្ម រុក្ខាប្រមាញ់ និងនេសាទ…
រាជធានីភ្នំពេញ ៖ កៅស៊ូជាផលិតផលកសិឧស្សាហកម្មដ៏សំខាន់មួយសម្រាប់សង្វាក់ផលិតកម្មធំៗនៅលើពិភពលោក ហើយមានប្រទេសមិនច្រើនទេ ដែលអាចដាំដំណាំកៅស៊ូបាន ក្នុងនោះកម្ពុជាក៏ជាប្រទេសមានស្ថានភាពអំណោយផលមួយលើដំណាំនេះផងដែរ ។ តាមរបាយការណ៍របស់អគ្គនាយកដ្ឋានកៅស៊ូនៃក្រសួងកសិកម្ម រុក្ខាប្រមាញ់ និងនេសាទ បានបង្ហាញថា ការលក់កៅស៊ូចេញក្នុងត្រីមាសទី១ ឆ្នាំ២០១៨នេះ មានបរិមាណច្រើនជាងការផលិត ។
តាមរបាយការណ៍នេះឲ្យដឹងថា ផលិតផលកៅស៊ូដែលផលិតបានក្នុងមួយត្រីមាសដើមឆ្នាំ២០១៨នេះ សម្រេចបានសរុប៣៧.០២៥តោន កើនឡើងចំនួន២.២៤៤តោន ស្មើនឹង៦% ធៀបនឹងរយៈពេលដូចគ្នាកាលពីឆ្នាំ២០១៧ កន្លងទៅ។ ចំណែកការបញ្ចេញលក់កៅស៊ូនៅត្រីមាសទី១ ឆ្នាំ២០១៨នេះវិញ មានបរិមាណសរុបរហូតដល់៣៩.១៤៧តោន កើនឡើង៦.៧៧៧តោន ស្មើនឹង២១% ធៀបនឹងឆ្នាំ២០១៧ ។
ក្នុងរបាយការណ៍នេះបានបង្ហាញដែរថា គិតត្រឹមដំណាច់ត្រីមាសទី១ ឆ្នាំ២០១៨នេះ ផ្ទៃដីដំណាំកៅស៊ូសរុបមានចំនួន៤៣៦.៨១២ហិកតា ក្នុងនោះផ្ទៃដីទទួលផល ឬផ្ទៃដីអាចចៀរជ័រ មានចំនួន១៧១.០៦៣ហិកតា ឬស្មើនឹងប្រមាណ៣៩,១៦%នៃផ្ទៃដីសរុប ។
សម្រាប់តម្លៃកៅស៊ូក្នុងត្រីមាសទី១ ឆ្នាំ ២០១៨នេះ ជាមធ្យមស្មើ១.៤៥៨ដុល្លារអាមេរិកក្នុង១តោន ហើយតម្លៃនេះបានថយចុះប្រមាណ២៦% បើធៀបនឹងត្រីមាសទី១ ឆ្នាំ២០១៧ ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា បើតាមស្ថិតិក្នុងឆ្នាំ២០១៧ ដំណាំកៅស៊ូជាលក្ខណៈឧស្សាហកម្ម មានសមាមាត្ររហូតដល់៦៤,២២% ហើយក្រៅពីនោះ គឺដំណាំកៅស៊ូជាលក្ខណៈគ្រួសារ ។ លោកថា ៖« ការនាំចេញកៅស៊ូកាលពីឆ្នាំ២០១៧ សម្រេចបានប្រមាណ១៨៨.៨២២តោន និងមានទឹកប្រាក់សរុបជាង៣០០លានដុល្លារអាមេរិក មានកំណើនជាង៣០% ធៀបនឹងឆ្នាំ២០១៦ » ។
នៅក្នុងសន្និបាតកាលពីពេលថ្មីៗនេះ លោក វេង សាខុន បានបញ្ជាក់ថា វិស័យកសិកម្មកម្ពុជាបានលូតលាស់ពី១,៤%ក្នុងឆ្នាំ២០១៦ កើនឡើងដល់ជិត២%ក្នុងឆ្នាំ២០១៧ ដែលបានរួមចំណែកប្រមាណ២៤,៩% នៃផលិតផលក្នុងស្រុកសរុបសម្រាប់ឆ្នាំ២០១៧ ។ លោកថា ៖« នៅក្នុងវិស័យកសិកម្មទាំងមូល តាមស្ថិតិឃើញថា ផ្នែកដំណាំមានចំណែកច្រើនជាងគេរហូតដល់៥៨,៥%, ផលិតកម្មសត្វ១១,២%, ជលផល២៣,៥% និងផ្នែកព្រៃឈើមានចំណែក៦,៨% នៃវិស័យកសិកម្មទាំងមូល » ។
បើតាមលោក ម៉ក់ គីមហុង ប្រធានក្រុមប្រឹក្សាភិបាលសមាគមកៅស៊ូកម្ពុជា បានបញ្ជាក់ថា តម្លៃកៅស៊ូបានធ្លាក់ចុះជាបន្តបន្ទាប់តាំងពីឡើងដល់ជាង៥.០០០ដុល្លារអាមេរិកក្នុង១តោននៅឆ្នាំ២០១០-២០១២ ខណៈពេលនោះ មានតម្រូវការខ្ពស់សម្រាប់ផលិតកង់យានយន្ត ហើយចិនក៏ជាប្រទេសធំមួយដែលនាំចូលកៅស៊ូ ក៏ប៉ុន្តែបន្ទាប់ពីប្រទេសចិនបានយកកៅស៊ូសិប្បនិមិត្តជំនួសកៅស៊ូធម្មជាតិមក បានធ្វើឲ្យតម្លៃកៅស៊ូធ្លាក់ចុះបន្តិចម្ដងៗ ។ ទោះជាយ៉ាងណា នៅថ្ងៃអនាគត តម្លៃកៅស៊ូធម្មជាតិនឹងកើនឡើងវិញ ក្រោយពេលសមាគមកៅស៊ូអន្តរជាតិបានដាក់ចេញផែនការមួយចំនួនដល់បណ្ដាប្រទេសដាំកៅស៊ូ ៕
ចែករំលែកព័តមាននេះ