រាជធានីភ្នំពេញ ៖ លោកលន់ ឫទ្ធិ កូនប្រុសអតីតប្រធានាធិបតីលន់ ណុល ប្រធានគណបក្សខ្មែរសាធាររដ្ឋបានប្រកាសក្នុងសន្និសីទសារព័ត៌មាននៅព្រឹកថ្ងៃទី៣០ ខែមេសា ឆ្នាំ២០១៨ ថា គណបក្សរបស់លោកនឹងចូលរួមប្រកួតប្រជែងការបោះឆ្នោតថ្នាក់ជាតិនាខែកក្កដា ឆ្នាំ២០១៨ ខាងមុខនេះ ជាពិសេស គឺគណបក្សរបស់លោកមានធនធានគ្រប់គ្រាន់ យ៉ាងហោចណាស់បាន៥ខេត្ត-ក្រុង ក្នុងចំណោម២៥ខេត្ត-រាជធានី ។
លោកលន់ ឫទ្ធិ បាននិយាយថា ៖ «យើងមានបំណងដាក់បេក្ខជននៅទាំងប្រទេស ។ តែយ៉ាងហោចណាស់ក៏យើងដាក់បានខេត្ត-ក្រុងសំខាន់៥ដែរ សម្រាប់ការបោះឆ្នោតសភានេះ» ។ លោកប្រធានគណបក្សដែលមានសញ្ជាតិអាមេរិករូបនេះបានលើកឡើងថា «យើងចង់ជួយខ្មែរចាកផុតពីភាពក្រីក្រដូចដែលយើងបានឃើញ ។ គណបក្សខ្មែរសាធារណរដ្ឋមិនយកខ្មែរណាជាសត្រូវ និងខិតខំយ៉ាងការពារពលរដ្ឋខ្មែរ ប្រទេសជាតិមិនឲ្យស្ថិតក្រោមបរទេសត្រួតត្រា» ។
កូនប្រុសអតីតប្រធានាធិបតីលន់ ណុល បានលើកឡើងថា នៅពេលគណបក្សរបស់លោកបានដឹកនាំប្រទេសនឹងមានរៀបចំច្បាស់លាស់ដោយដាក់ចេញគោលនយោបាយកែទម្រង់ថា មន្ត្រីរាជាការ ប៉ូលិស ទាហានមិនធ្វើការងារបម្រើគ្រួសារបក្ខពួកនោះទេ គឺធ្វើការងារ ដើម្បីប្រយោជន៍សាធារណទូទៅ គឺជាតិ និងប្រជាជនកម្ពុជា ។ លោកថា គណបក្សនេះនឹងធ្វើឲ្យមានការធានាដល់សុខភាពពលរដ្ឋ ។ លោកប្រធានថ្លែងថា «គណបក្សខ្មែរសាធារណរដ្ឋប្រឆាំងដាច់ខាតអំពើភេរវកម្ម ការប្រើប្រាស់ថ្នាំញៀន និងការជួញដូរមនុស្ស» ។
លោកបាន បន្ថែមថា គណបក្សរបស់លោកបានបង្កើតឡើងនៅក្នុងឆ្នាំ២០០៨ និងមិនបានចូលរួមការបោះឆ្នោតឆ្នាំ២០១៣ទេ ។ ទោះបីបែបនេះក្តីគណបក្សនៅតែមានសកម្មភាពនយោបាយទាំងក្នុង និងក្រៅប្រទេស ដើម្បីដាក់បេក្ខជន និងចុះឈ្មោះចូលរួមការបោះឆ្នោតនៅឆ្នាំ២០១៨នេះ ។ លោកប្រធានអះអាងថា៖ «នៅពេលគណបក្សខ្មែរសាធារណរដ្ឋមានវាសនាដឹកនាំប្រទេសគណបក្សនឹងផ្តល់ប្រាក់ខែដល់មន្ត្រីរាជការ កម្មករ បុគ្គលិក សង្គមស៊ីវិល ឲ្យពួកគាត់ មានការងារដែលមានទទួលពី៣០០ដល់១៥,០០០ដុល្លារអាមេរិក» ។ លោកស្រី ឡុងចិន្តា អនុប្រធានទី២ បានថ្លែងថា លោកស្រីមើលឃើញថា គណបក្សខ្មែរសាធារណរដ្ឋជាគណបក្សស្អាតស្អំមិនជាប់ជំពាក់បំណុល និងគុណរបស់បរទេស ។
លោកស្រីបន្តថា «ខ្ញុំសម្រេចចិត្តចូលរួមជាមួយគណបក្សខ្មែរសាធារណរដ្ឋ ព្រោះលោកប្រធានជាមនុស្សស្អាតស្អំ និងមិនជាប់ជំពាក់បំណុលបរទេសណាទេ» ។ លោកស្រីអនុប្រធានទី២ បានលើកឡើងថា លោកស្រីគ្រោងឈរឈ្មោះតំណាងរាស្ត្រនៅខេត្តព្រះសីហនុ ។ លោកស្រីមិនទាន់ច្បាស់ពីការដាក់បេក្ខភាពចូលគជបនៅឡើយទេ ។ ខណៈពេលដែលការរៀបចំកំពុងដំណើរការ ហើយនៅពេលនេះលោកស្រីអះអាងថា«យើងអាចដាក់បេក្ខជនសម្រាប់ខេត្តដែលមានអាសនៈចាប់ពី៣អាសនៈឡើង បើមិនបានទាំងអស់ក្តី» ៕
ចែករំលែកព័តមាននេះ