ខេត្តស្វាយរៀង ៖ លោកនាយឧត្តមសេនីយ៍ បណ្ឌិត ជ័យសុន អគ្គលេខាធិការអាជ្ញាធរជាតិទប់ស្កាត់អាវុធគីមី នុយក្លេអ៊ែ ជីវសាស្ត្រ និងវិទ្យុសកម្ម អមដំណើរដោយឧត្តមសេនីយ៍ឯក…
ខេត្តស្វាយរៀង ៖ លោកនាយឧត្តមសេនីយ៍ បណ្ឌិត ជ័យសុន អគ្គលេខាធិការអាជ្ញាធរជាតិទប់ស្កាត់អាវុធគីមី នុយក្លេអ៊ែ ជីវសាស្ត្រ និងវិទ្យុសកម្ម អមដំណើរដោយឧត្តមសេនីយ៍ឯក សៅ សុវណ្ណី អគ្គលេខាធិការរងនិងឧត្តមសេនីយ៍ឯក កេ ដា អគ្គលេខាធិការរង ព្រមទាំងនាយទាហាន នាយទាហានរង និងពលទាហានជំនាញអាវុធគីមី បានធ្វើដំណើរចុះសិក្សាវាយតំលៃ និងត្រួតពិនិត្យផលប៉ះពាល់ដោយគ្រាប់បែកគីមីនៅក្នុងតំបន់វត្តគគីរចំនួន៤០គ្រាប់ទំលាក់ដោយយន្តហោះសហរដ្ឋអាមេរិកក្នុងអំឡុងឆ្នាំ១៩៧០ ដែលស្ថិតនៅក្នុងភូមិគគីរ ឃុំគគីរ ស្រុករមាសហែខេត្តស្វាយរៀងនៅថៃ្ងទី២៩ ខែមេសា ឆ្នាំ២០១៨ ។
បើតាមមន្ត្រីជាន់ខ្ពស់អាជ្ញាធរគីមីបានថ្លែងឱ្យដឹងថា ការរុករកគ្រាប់បែកគីមីនៅឃុំគគីរ ស្រុករមាសហែក នេះមានរយៈពេលជាង៦ខែមកហើយក្នុងនោះមន្ត្រីជំនាញបានចុះរុករកនៅក្នុងភូមិសាស្ត្រឃុំគគីរ ស្រុករមាសហែក រកឃើញគ្រាប់បែកគីមីរបស់អាមេរិកមានចំនួន៤០គ្រាប់គិតត្រឹមថ្ងៃទី២៩ ខែមេសា ឆ្នាំ២០១៨ ។ មន្ត្រីដដែលបានបន្តថា ក្នុងប្រតិបត្តិការរុករកគ្រាប់បែកគីមីនេះមន្ត្រីយើងបានសហការជាមួយមន្ត្រីស៊ីម៉ាក់ធ្វើកិច្ចការងារនេះទាល់តែបោសសម្អាតរួចរាល់នៅក្នុងឃុំគគីរនេះដើម្បីប្រជាពលរដ្ឋ ។
មន្ត្រីអាជ្ញាធរគីមីបានបញ្ជាក់ថា ដោយសារឥទ្ធិពលសារធាតុគីមីបានបង្ខំឲ្យពលរដ្ឋឃុំគីគរត្រូវបញ្ជូនទៅពិនិត្យនៅមន្ទីរពេទ្យ បន្ទាប់ពីមានបញ្ហាសុខភាពដោយសារថប់ដង្ហើម ក្តៅក្រហាយ និងរមាស់លើស្បែក នៅពេលដែលប្រជាពលរដ្ឋកាយប៉ះរណ្តៅគ្រាប់បែកគីមីក្នុងរយៈពេលកន្លងមកនេះ ។
ដោយមានការយកចិត្តទុកពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកស្រីឧបនាយករដ្ឋមន្ត្រី ម៉ែន សំអន នោះរាជរដ្ឋាភិបាលបានកសាងមណ្ឌលសុខភាពនៅក្នុងឃុំគគីរទីដែលរងគ្រោះគ្រាប់បែកគីមីដើម្បីព្យាបាលជនរងគ្រោះដោយឥទ្ធិពលគ្រាប់បែកគីមី និងព្យាបាលជង្ងឺទូទៅផងដែរ ។
គ្រាប់បែកគីមីនៅតែលងបន្លាចដល់គ្រួសារជនរងគ្រោះឃុំគគីរជារៀងរាល់ថ្ងៃមិនដឹងថ្ងៃណាបានដោះស្រាយទុក្ខវេទនានៃផ្លូវចិត្ត និងសុខភាពគ្រួសារដោយសារការសាយភាយនៃគ្រាប់បែកគីមីរបស់សហរដ្ឋអាមេរិកនេះ គ្រួសារប្រជាពលរដ្ឋរងគ្រោះអំពាវនាវដល់អង្គការសហប្រជាជាតិ គួរពន្លើនក្នុងការដោះស្រាយរកយុត្តិធម៌ជូនគ្រួសាររងគ្រោះដោយសារគ្រាប់បែកគីមីរបស់សហរដ្ឋអាមេរិកមកលើគ្រួសារខ្មែររងគ្រោះទាំងអស់នេះ ៕
ចែករំលែកព័តមាននេះ