ប្រតិភូយោធភូមិភាគទី៥ បានធ្វើទស្សនកិច្ចសិក្សាកងទ័ព
- បាត់ដំបង
ខេត្តបាត់ដំបង ៖ វេលាព្រឹកថ្ងៃទី២៩ ខែមេសា ឆ្នាំ២០១៨ នៅទីបញ្ជាការកងការពារព្រំដែនលេខ៥០៣ ស្ថិតនៅតំបន់ភ្នំខ្លែងពណ៌ ភូមិស្លក្រាម ឃុំស្លក្រាម ស្រុកស្វាយចេក…
ខេត្តបាត់ដំបង ៖ វេលាព្រឹកថ្ងៃទី២៩ ខែមេសា ឆ្នាំ២០១៨ នៅទីបញ្ជាការកងការពារព្រំដែនលេខ៥០៣ ស្ថិតនៅតំបន់ភ្នំខ្លែងពណ៌ ភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ បានប្រារព្ធពិធីទស្សនកិច្ចសិក្សាស្តីពីការកសាងពង្រឹងអង្គភាពរឹងមាំលើកគ្រប់វិស័យ ក្រោមអធិបតីភាព របស់លោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោកមេបញ្ជាការយោធភូមិភាគទី៥ ដោយមានការចូលរួមពីមេបញ្ជាការរងយោធភូមិភាគ មេបញ្ជាការតាមបណ្តាអង្គភាព ឈរជើងតាមខ្សែបន្ទាត់ព្រំដែនមានកងព្រំដែនលេខ៥០១,៥០២ និង៥០៤មកពីខេត្តពោធិសាត់ បាត់ដំបង និងប៉ៃលិន កងវរៈសេនាតូច កងអនុសេនាធំចំណុះឲ្យតំបន់សឹករងខេត្តទាំង៤ និងបណ្តាកងពលលេខ៥១,៥២,និង៥៣ សរុបចំនួនប្រមាណ២០០នាក់បានចូលរួម។ ប្រតិភូបានពិនិត្យមើលទៅតាំងការរស់នៅក្នុងអង្គភាព ដោយមានការរីកចម្រើន លើការងារចិញ្ចឹមទ័ព ការហ្វឹកហាត់ សំខាន់អង្គភាពកងការពារព្រំដែនបានជំរុញអំពីការហ្វឹកហាត់បាញ់គ្រាប់ពិតនៅក្នុង អង្គភាពបន្ថែមទៀត ដែលតម្រូវឲ្យកងកម្លាំងធានាបាននូវការអនុវត្តន៍ជាក់ស្តែងនៅក្នុងទីកន្លែងផ្ទាល់ តែម្តង ដោយមានគ្រូបង្វឹកបង្ហាត់ហ្វឹកហ្វឺនមកពីយោធភូមិភាគទី៥ បានចុះធ្វើការនែនាំដោយផ្ទាល់ ផងដែរ។
បន្ទាប់ពីលោកឧត្តមសេនីយ៍ត្រី ឃួន ជឿន មេបញ្ជាការកងការពារព្រំដែនលេខ៥០៣ បានរាយការណ៍អំពីសកម្មភាពរបស់កងកម្លាំងគ្រប់កងល្បាតចំណុះកងការពារព្រំដែនលេខ៥០៣ តែងតែអនុវត្តន៍ជាប្រចាំក្នុងកិច្ចការ ការពារជាតិ រក្សាសន្តិសុខ ដោយបានរួមសហការទប់ស្កាត់ រាល់បទល្មើសផ្សេងៗនៅតាមព្រំដែនបានរួមសហការជាមួយកងទ័ពថៃដែលឈរជើងនៅទល់មុខគ្នាបានយ៉ាងល្អប្រសើរ។ បន្តមកលោកឧត្តមសេនីយ៍ត្រី ញ៉ែម សុខុម នាយរងសេនាធិការយោធភូមិភាគទី៥ បានរាយការណ៍អំពីការកែសម្រួលរៀបចំសណ្តាប់ធ្នាប់ និងយកបទពិសោធន៍ល្អៗក្នុងឆ្នាំ២០១៧ មកបន្តអនុវត្តន៍ជាបន្តទៀតដើម្បីលើកកម្ពស់គុណភាពរបស់កងទ័ពដែលឈរជើងនៅតាមខ្សែបន្ទាត់ព្រំដែនឲ្យកាន់តែមានប្រសិទ្ធភាពបន្ថែមទៀត។ បន្តមកក្នុងកិច្ចទស្សនសិក្សានេះ គ្រប់មេបញ្ជាការកងការពារ ព្រំដែនទាំងអស់បានវាយតម្លៃ និងដាក់ពិន្ទុសរសើរដល់កងការពារព្រំដែនលេខ៥០៣នេះ ធ្វើបានយ៉ាងល្អប្រសើរ ក្នុងការគោរពវិន័យ តាមបទបញ្ជាផ្ទៃក្នុង ការដឹកនាំគ្រប់គ្រងកម្លាំង ការធានាជីវភាពរបស់កងទ័ព ដែលមានការដាំដុះដំណាំ ចិញ្ចឹមសត្វ កសាងជម្រក និងទីតាំងកន្លែងត្រូវធ្វើការជាប្រចាំថ្ងៃ ដោយមិនឲ្យមានការបាត់មុខកងកម្លាំងពីអង្គភាពដែលកំពុង ឈរជើងប្រចាំថ្ងៃបានឡើយ។
លោកវរសេនីយ៍ឯក គឹម រដ្ឋមុនី នាយការិយាល័យហ្វឹកហ្វឺនយោធភូមិ ភាគទី៥បានជួយកែលម្អចំណុចខ្វះខាតខ្លះៗទៀតដែលមានកងកម្លាំងខ្លះនៅមិនទាន់បានអនុវត្តន៍ឲ្យបានត្រឹមត្រូវ១០០%នៅឡើយ គឺត្រូវជំរុញការហ្វឹកហ្វឺនជាបន្តទៅទៀត។ ចុងក្រោយលោកឧត្តមសេនីយ៍ឯក ប៊ុន សេង បានផ្តាំផ្ញើថា សូមបន្តនាំគ្នាធ្វើទស្សនកិច្ចសិក្សាអំពីការកសាងអង្គភាពរឹងមាំលើគ្រប់វិស័យ ពីព្រោះវាបានហុចលទ្ធផលល្អក្នុងរយៈពេល៣ឆ្នាំកន្លងមកនេះ ដែលកងកម្លាំងកងទ័ពយើងមាន គុណភាព មានវិន័យត្រឹមត្រូវ សាកសមជាមួយកងទ័ពថៃ ដែលមួយរយៈកាលមុនមកនោះ គឺយើងមានការលំបាកច្រើនណាស់ក្នុងការរស់នៅ ការស្លៀកពាក់ តែការងារយើងម៉ឹងម៉ាត់ជានិច្ច មានឆន្ទៈ ស្មារតីក្នុងការងារ ចុះជួយដល់ប្រជាជនក្រីក្រ រងគ្រោះ ជួបការលំបាក ហើយត្រូវថែររក្សាសន្តិសុខ និងសុខសន្តិភាពជូនប្រជាជន និងប្រទេសជាតិយើងដែលមានច្បាប់ រដ្ឋធម្មនុញ្ញ របស់រាជរដ្ឋាភិបាលបានកើតឡើងដោយស្របច្បាប់មិនឲ្យសត្រូវណាមកបំផ្លាញបានឡើយ។
លោកឧត្តមសេនីយ៍ឯក បានបន្ថែមថា តាមផែនការយោធភូមិភាគទី៥ មានរយៈពេល៣ឆ្នាំមកហើយនេះ គឺល្មមដល់ពេលដែលអាចងើបឈរត្រូវដើរខ្លួនឯងបានខ្លះហើយ និងគ្រប់តាមបណ្តាអង្គភាពទាំងអស់ ត្រូវជំរុញដល់កងកម្លាំងដែលទទួលគុណភាពបាន ហើយត្រូវបន្ថែមសោភ័ណភាព និងបរិមាណជាបន្តទៅទៀត ហើយត្រូវពង្រឹងការងារចាស់ ពង្រីកការងារថ្មី បន្តសាមគ្គីភាពផ្ទៃក្នុង ហើយអនុវត្តន៍តាមប្រសាសន៍សម្តេចតេជោ ហ៊ុន សែន ទាំង៦ចំណុចដែលធានាបានតាមកាតព្វកិច្ច របស់កងទ័ពយើងឲ្យទទួលបានប្រសិទ្ធភាពខ្ពស់បំផុត។ ចុងក្រោយលោកឧត្តមសេនីយ៍ឯក បានជួយឧបត្ថម្ភក្នុងកម្មវិធីនេះដល់កងការពារព្រំដែនលេខ៥០៣ ចំនួន៤លានរៀល ក្រុមការងារហ្វឹកហ្វឺន និងអាយធី ចំនួន១លានរៀងផងដែរ៕
ចែករំលែកព័តមាននេះ