រាជធានីភ្នំពេញ ៖ ខណៈពេលការចុះឈ្មោះគណបក្សនយោបាយ និងបញ្ជីបេក្ខជនចាប់ផ្តើមនៅថ្ងៃទី៣០ ខែមេសា ឆ្នាំ២០១៨ ស្អែកនេះ គណៈកម្មាធិការជាតិរៀបចំការបោះឆ្នោតហៅកាត់ថា (គ.ជ.ប) បានជូនដំណឹងដល់គណបក្សនយោបាយដែលបានចុះបញ្ជី…
រាជធានីភ្នំពេញ ៖ ខណៈពេលការចុះឈ្មោះគណបក្សនយោបាយ និងបញ្ជីបេក្ខជនចាប់ផ្តើមនៅថ្ងៃទី៣០ ខែមេសា ឆ្នាំ២០១៨ ស្អែកនេះ គណៈកម្មាធិការជាតិរៀបចំការបោះឆ្នោតហៅកាត់ថា (គ.ជ.ប) បានជូនដំណឹងដល់គណបក្សនយោបាយដែលបានចុះបញ្ជី និងទទួលស្គាល់ផ្លូវការនៅក្រសួងមហាផ្ទៃ ត្រូវបំពេញសំណុំឯកសារដែលច្បាប់តម្រូវក្នុងការចុះបញ្ជីគណបក្ស និងបេក្ខជនឈរឈ្មោះសម្រាប់ការបោះឆ្នោតជ្រើសតាំងតំណាងរាស្ត្រអាណត្តិទី៦ (ចាប់ពីថ្ងៃទី៣០ ខែមេសា ដល់ថ្ងៃទី១៤ ខែឧសភា) ។
(គ.ជ.ប) បានបញ្ជាក់ក្នុងសេចក្តីជូនដំណឹងថា គណបក្សនយោបាយត្រូវភ្ជាប់សេចក្តីចម្លងលិខិតបញ្ជាក់ចុះបញ្ជីគណបក្សនយោបាយនៅក្រសួងមហាផ្ទៃដែលមានបញ្ជាក់កីត្យានុកូលកម្មដោយអាជ្ញាធរក្រុង ស្រុក ខ័ណ្ឌ ។ (គ.ជ.ប) បន្តថា បញ្ជីបេក្ខជនពេញសិទ្ធិយ៉ាងតិចមួយភាគបី (១/៣) នៃចំនួនអាសនៈក្នុងរដ្ឋសភា និងបេក្ខជនបម្រុងស្មើគ្នានឹងចំនួនបេក្ខជនពេញសិទ្ធិ ។ គ្រប់គណបក្សត្រូវរៀបចំបញ្ជីបេក្ខជនឈរឈ្មោះ សរុបទូទាំងប្រទេសដែលបញ្ជីនេះត្រូវបានបេក្ខជនពេញសិទ្ធិ និងបេក្ខបម្រុងមានចំនួនស្មើគ្នា គឺស្មើនឹងមួយភាគបី(១/៣)នៃចំនួនអាសនៈក្នុងរដ្ឋសភា ។
លោកនុត សុខុម អនុប្រធាន (គ.ជ.ប) ធ្លាប់បញ្ជាក់កាលពីថ្ងៃទី២៥ ខែមេសាថា តាមរបាយការណ៍របស់ក្រសួងមហាផ្ទៃដែល (គ.ជ.ប) បានទទួលបញ្ជាក់ថា មានគណបក្សប្រមាណជាង៣០ត្រូវបានចុះបញ្ជី នៅក្រសួងមហាផ្ទៃ និងមានសិទ្ធិចុះបញ្ជីសម្រាប់ការបោះឆ្នោតតំណាងរាស្ត្រអាណត្តិទី៦ ខែកក្កដា ២០១៨នេះ ។
លោកបញ្ជាក់ថា ៖ «គណបក្សនយោបាយដែលចុះបញ្ជីផ្លូវការនៅក្រសួងមហាផ្ទៃមាន៣៧គណបក្សនឹងអាចចុះឈ្មោះនៅ(គ.ជ.ប) សម្រាប់ចូលរួមការបោះឆ្នោតបាន» ។ លោកបន្តថា តែគណបក្សនយោបាយទាំងនោះត្រូវបំពេញបែបបទតាមច្បាប់ និងការកំណត់របស់គ.ជ.ប ។ បក្សនីមួយៗត្រូវបានបេក្ខជនយ៉ាងតិច៤១ ឬ៤២រូបពេញសិទ្ធិ និងបម្រុង៤១ ឬ៤២រូបដែរ នៅទាំងប្រទេស ។
លោកនាយឧត្តមសេនីយ៍ខៀវ សុភ៌គ អ្នកនាំពាក្យក្រសួងមហាផ្ទៃបានបញ្ជាក់ថា រហូតដល់ពេលនេះមានគណបក្ស៣២បក្ស បានចុះឈ្មោះទទួលស្គាល់នៅក្រសួងមហាផ្ទៃរាល់ទាំងបក្សថ្មីមួយ (បក្សខ្មែរតែមួយរបស់ប្អូនលោកកែមឡី) ។ លោកបន្ថែមថា គណបក្សទាំងនេះមានសិទ្ធិចុះបញ្ជីនៅ (គ.ជ.ប) សម្រាប់ការបោះឆ្នោតបានតែមិនទាន់ដឹងថា មានបក្សណាខ្លះ ឬចំនួនប៉ុន្មានទេ ដែលនឹងចូលរួមការបោះឆ្នោតថ្នាក់ជាតិ២០១៨ព្រោះ មិនចាប់ផ្តើម និងបិទបញ្ជីនៅឡើយទេ ។
លោកហង្ស ពុទ្ធា អ្នកនាំពាក្យរបស់(គ.ជ.ប) ថ្លែងថា គណបក្សត្រូវមានគណនេយ្យពិតប្រាកដនៅរតនាគារជាតិចំនួន១៥លានរៀល រួមទាំងបំពេញលក្ខខណ្ឌដែល(គ.ជ.ប) កំណត់ចំនួន១០ចំណុច ។ លោកបានបញ្ជាក់ថា គណបក្សមិនអាចដកប្រាក់នេះបានទេ នៅពេលមិនទទួលបានសម្លេង១អាសនៈ ឬ៣%នៃសម្លេងឆ្នោត ។ លោកបន្តថា (គ.ជ.ប) គ្រោងចំណាយ៥០លានដុល្លារអាមេរិកសម្រាប់រៀបចំការបោះឆ្នោតអាណត្តិទី៦នេះ ។ ពេលនេះសភាបានអនុម័តប្រាក់ទាំងនោះរួចហើយ ទោះបីមានជំនួយ ឬគ្មានក្តីដំណើរការបោះឆ្នោតប្រព្រឹត្តទៅធម្មតា ។
ថ្មីៗនេះគណបក្សអំណាចខ្មែរបានចេញសេចក្ដីប្រកាសព័ត៌មានប្រកាស «មិនចូលរួមការបោះឆ្នោត» ជ្រើសតាំងតំណាងរាស្ត្រនីតិកាលទី៦ ដោយចោទប្រកាន់ថា ការបោះឆ្នោតនេះមានអាជ្ញាកណ្ដាលដែលជាស្ថាប័ន (គ.ជ.ប) មិនឯករាជ្យនោះទេ ដូច្នេះដាច់ខាតមិនចូលរួមការបោះឆ្នោតថ្នាក់ជាតិខាងមុខនេះទេ ៕
ចែករំលែកព័តមាននេះ