រាជធានីភ្នំពេញ ៖ បុរសម្នាក់ត្រូវបានគេប្រទះឃើញដេកប្រកាច់ននៀលដីរហូតដល់សន្លប់ស្ដូកស្ដឹង ហើយខណៈនោះមិនមាននរណាបានដឹងថា បុរសខាងលើមានបញ្ហាអ្វីឡើយ និងបានរាយការណ៍ជូននគរបាលឲ្យចុះទៅពិនិត្យមើលទើបដឹងថា បុរសនេះប្រើប្រាស់ថ្នាំញៀនរហូតដល់ញៀនបែកថ្នាំ និងដួលប្រកាច់បែបនេះតែម្ដង ។ ហេតុការណ៍នេះបានកើតឡើងកាលពីវេលាម៉ោង១២និង៣០នាទីថ្ងៃត្រង់ថ្ងៃទី២៩ ខែមេសា ឆ្នាំ២០១៨ នៅតាមបណ្ដោយផ្លូវជាតិលេខ៤ ត្រង់ចំណុចជិតបុរីសែនមនោរម្យភូមិកន្ទោកខាងជើង សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
បុរសខាងលើមិនត្រូវបានស្គាល់ឈ្មោះឡើយ តែមានអាយុប្រហែល៣១ឆ្នាំ ពាក់អាវយឺតដៃខ្លីពណ៌ស ស្លៀកខោខូវប៊យជើងវែង ពណ៌ប្រផេះ ។
តាមប្រភពព័ត៌មានបានឲ្យដឹងថា បុរសខាងលើមិនត្រូវបានស្គាល់អត្តសញ្ញាណនោះឡើយ ព្រោះក្រោយពេលប្រកាច់មួយសន្ទុះក្រោយមក ស្រាប់តែសន្លប់បាត់ស្មារតីនិយាយលែងរួចតែម្ដង ។
នៅមុនពេលកើតហេតុគេបានឃើញបុរសនេះ ដើរតាមផ្លូវជាតិលេខ៤នោះ ក្នុងស្ថានភាពរវើរវាយខុសប្លែកពីធម្មតា លុះបន្តិចក្រោយមក ក៏បានដួលប្រកាច់វក់វីនៅលើចិញ្ចើមផ្លូវ ។ លុះមួយសន្ទុះក្រោយមកក៏បានសន្លប់បាត់ស្មារតី មិនតែប៉ុណ្ណោះមានអ្នកចោមរោមមើលច្រើនដែរ ប៉ុន្តែមិនមានអ្នកស្គាល់ឡើយ ។
ប្រភពខាងលើបានបន្តថា ក្រោយពេលកើតហេតុនគរបាលបានចុះទៅពិនិត្យមើលហើយបានសន្និដ្ឋានថា បុរសនេះប្រើប្រាស់ថ្នាំញៀនមែនរហូតដល់ញៀនក្នុងកម្រិតបែកថ្នាំទៅហើយ ទើបមានអាការៈបែបនេះ ។
បន្ទាប់មកនគរបាលបានហៅរថយន្តសង្គ្រោះអង្គភាព៧១១ ទៅដឹកយកទៅកាន់មន្ទីរពេទ្យដើម្បីសង្គ្រោះបន្ទាន់ ប៉ុន្តែនៅពេលដែលក្រុមសង្គ្រោះលើកដាក់លើប្រង់កាសង្គ្រោះបឋម និងប្រុងសែងដាក់ក្នុងរថយន្តដឹកយកទៅសង្គ្រោះបន្ទាន់ ។ ស្រាប់តែបុរសនេះដឹងខ្លួនឡើងវិញ ហើយបានរមៀលខ្លួនចេញពីប្រង់កា រួចក្រោកអង្គុយ និងសុំទឹកផឹកព្រមទាំងប្រកែកដាច់ខាតមិនព្រមទៅមន្ទីរពេទ្យឡើយ ហើយក៏សារភាពតាមត្រង់ថា ខ្លួនបែកថ្នាំគ្មានជំងឺអ្វីផ្សេងឡើយ ៕
ចែករំលែកព័តមាននេះ