រាជធានីភ្នំពេញ ៖ លោកនាយឧត្តមសេនីយ ខៀវ សុភ៌គ អ្នកនាំពាក្យក្រសួងមហាផ្ទៃបានថ្លែងប្រាប់កោះសន្តិភាពតាមទូរស័ព្ទនៅថ្ងៃទី២៧ ខែមេសា ឆ្នាំ២០១៨ថា គណបក្សឆន្ទៈខ្មែរបានដាក់ពាក្យសុំរបស់ខ្លួនចូលអគ្គនាយកដ្ឋានរដ្ឋបាលនៃក្រសួងមហាផ្ទៃ កាលពីរសៀលថ្ងៃទី២៦ ខែមេសា ឆ្នាំ២០១៨ ដើម្បីសុំចុះឈ្មោះជាផ្លូវការ ។ តែនៅពេលនេះឯកសារទាំងនោះកំពុងត្រូវបានត្រួតពិនិត្យ ។
លោកបានលើកឡើងថា« គិតមកដល់ពេលនេះមានគណបក្សចំនួន៣៧បក្ស ដែលបានចុះបញ្ជីនៅក្រសួងមហាផ្ទៃ និងមានសិទ្ធិចុះឈ្មោះនៅគណៈកម្មាធិការជាតិរៀបចំការបោះឆ្នោត និងចុះបញ្ជីឈ្មោះបេក្ខជនឈរឈ្មោះបោះឆ្នោតខែកក្កដា ២០១៨នេះបាន» ។ តំណាងគណបក្សឆន្ទៈខ្មែរលោក គង់ មុនីកា ដែលគេស្គាល់ថា ជាកូនប្រុសលោកគង់ គាំអតីតសមាជិកព្រឹទ្ធសភាមកពីគណបក្សសម រង្ស៊ីបានប្រកាសតំណាងឲ្យក្រុមអ្នកនយោបាយប្រជាធិបតេយ្យសេរីមួយក្រុមថា នឹងនាំគ្នាបង្កើតគណបក្សឆន្ទៈខ្មែរ ចូលរួមបោះឆ្នោតខែកក្កដា ២០១៨ ។
យោងតាមលិខិតចំហរបស់លោក គង់ មុនីកាកាលពីថ្ងៃទី២៥ ខែមេសា ២០១៨បានលើកឡើងពីការស្រឡាញ់មាតុភូមិកម្ពុជា លទ្ធិប្រជាធិបតេយ្យ និងសិទ្ធិមនុស្សដែលកំពុងជួបបញ្ហាដោយមិនមានអ្នកយកចិត្តទុកដាក់ ទើបក្រុមអ្នកប្រជាធិបតេយ្យប្រមូលផ្តុំគ្នាបង្កើតបក្សឡើង ។ លិខិតអំពាវនាវរបស់លោកគង់ មុនីកាបានលើកឡើងថា៖ ពួកក្រុមអ្នកនយោបាយដែលកំពុងស្ថិតនៅជាមួយភាពស្មុគស្មាញជាក់ស្តែងបានដឹងច្បាស់ពីស្ថានភាពពិតហើយ សកម្មភាពពីខាងក្រៅ គ្រាន់តែរួមផ្សំតែប៉ុណ្ណោះ ។
លោកបានអះអាងថា ៖«យើងគ្មានសុទិដ្ឋិនិយមថា គណបក្សសង្គ្រោះជាតិជាគណបក្សឈរឈ្មោះ និងដាក់បញ្ជីបេក្ខជនបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ បានឡើយ» ។ លោកថា ក្រុមអ្នកនយោបាយប្រជាធិបតេយ្យសេរីសូមប្រកាសបង្កើតគណបក្សឆន្ទៈខ្មែរ ដើម្បីចូលរួមបោះឆ្នោតខែកក្កដា ឆ្នាំ២០១៨ ។ ទោះបីយ៉ាងណាលោកខៀវ សុភ៌គនៅមិនទាន់បានបញ្ជាក់ថា គណបក្សឆន្ទៈខ្មែរនរណាជាប្រធាន អនុប្រធាន និងអគ្គលេខាធិកានៅឡើយទេ ។ គេមានការកត់សម្គាល់ថា មុនពេលដំណើរការបោះឆ្នោតជ្រើសតាំងតំណាងរាស្ត្រអាណត្តិទី៦នៅថ្ងៃទី២៩ ខែកក្កដា ២០១៨មានគណបក្សថ្មីពីរបានប្រកាសបង្កើតឡើង ដើម្បីចូលរួមការបោះឆ្នោតនេះ ។ គណបក្សខ្មែរតែមួយរបស់លោកកែម រិទ្ធិសិតត្រូវបានក្រសួងមហាផ្ទៃទទួលស្គាល់ផ្លូវការកាលពីដើមខែមេសានេះ ។
លោក នុត សុខុម អនុប្រធានគណៈកម្មាធិការជាតិរៀបចំការបោះឆ្នោតកាលពីថ្ងៃទី២៥ ខែមេសា បានថ្លែងថា បច្ចុប្បន្ននេះមានគណបក្សជាង៣០ត្រូវបានចុះបញ្ជីត្រឹមត្រូវនៅក្រសួងមហាផ្ទៃ ។ លោកបានបញ្ជាក់ថា ៖ ការចុះបញ្ជីញគណបក្សនយោបាយ និងបញ្ជីបេក្ខជនឈរ ឈ្មោះចាប់ពីថ្ងៃទី៣០ មេសា ដល់១៤ ឧសភា ឆ្នាំ២០១៨ សម្រាប់ការបោះឆ្នោតជ្រើសតាំងតំណាងរាស្ត្រអាណត្តិទី៦ ៕
ចែករំលែកព័តមាននេះ