ខេត្តព្រះវិហារ ៖ តំបន់ប្រតិបត្តិការសឹករងខេត្តព្រះវិហារបានបើកវគ្គហ្វឹកហ្វឺនបំប៉នជំនាញអន្តរាគមន៍ពិសេសដល់សិក្ខាកាមចំនួន១០០នាក់លើផ្នែកយុទ្ធវិធី វិន័យ សណ្តាប់ធ្នាប់ ដើម្បីបង្កើននូវចំណេះដឹង និងសមត្ថភាពជូនដល់នាយទហាន នាយទាហានរង និងពលទាហាន យកទៅបំពេញការងារជូនជាតិ…
ខេត្តព្រះវិហារ ៖ តំបន់ប្រតិបត្តិការសឹករងខេត្តព្រះវិហារបានបើកវគ្គហ្វឹកហ្វឺនបំប៉នជំនាញអន្តរាគមន៍ពិសេសដល់សិក្ខាកាមចំនួន១០០នាក់លើផ្នែកយុទ្ធវិធី វិន័យ សណ្តាប់ធ្នាប់ ដើម្បីបង្កើននូវចំណេះដឹង និងសមត្ថភាពជូនដល់នាយទហាន នាយទាហានរង និងពលទាហាន យកទៅបំពេញការងារជូនជាតិ ឲ្យមានប្រសិទ្ធភាព ។
ថ្លែងក្នុងពិធីនោះលោកឧត្តមសេនីយ៍ទោ ច័ន្ទ សុភ័ក្ត្រា មេបញ្ជាការរងយោធភូមិភាគទី៤ និងជាមេបញ្ជាការតំបន់ប្រតិបត្តិការសឹករងខេត្តព្រះវិហារ មានប្រសាសន៍ថា ការរៀបចំហ្វឹកហ្វឺនដល់ នាយទហាន នាយទហានរង និងពលទាហាននាពេលនេះ មានរយៈពេល៤៥ថ្ងៃ នៅទីបញ្ជាការកងវរៈ សេនាតូចលេខ១ ឋិតក្នុងភូមិមហាផល ឃុំឈានមុខ ស្រុកត្បែងមានជ័យ ខេត្តព្រះវិហារ ។
លោក ឧត្តមសេនីយ៍បន្តថា ការបើកវគ្គហ្វឹកហ្វឺននាពេលនេះ មិនត្រឹមតែបំប៉នពីវិន័យ សណ្តាប់ធ្នាប់ អប់រំចិត្តសាស្ត្រ ជំនាញ កម្លាំងអន្តរាគមន៍ពិសេសប៉ុណ្ណោះទេ ថែមទាំងបានចូលរួមថែរក្សាសន្តិភាព សុវត្ថិភាពជូនដល់មហាជន ទាំងអស់នៅក្នុងមូលដ្ឋានថែមទៀត ។
នាឱកាសនោះលោក ស៊ូ សិរី អភិបាលរងខេត្តព្រះវិហារក៏បានណែនាំដល់សិក្ខាកាមទាំងអស់ ត្រូវយកចិត្ត ទុកដាក់ក្នុងពេលសិក្សារៀនសូត្រ ស្តាប់គ្រូបង្គោល គោរពវិន័យសិក្សា ដើម្បីបង្កើននូវចំណេះដឹងរបស់ខ្លួនឲ្យកាន់តែល្អប្រសើរ ស័ក្តិសមជា កងកម្លាំងការពារជាតិ ការពារប្រជាពលរដ្ឋ និងសណ្តាប់ធ្នាប់សង្គម ។
ជាមួយគ្នានោះដែរលោកឧត្តមសេនីយ៍ទោ ទេព រួន មេបញ្ជាការរងយោធភូមិភាគទី៤ ក៏បានរំលឹកដល់ការឈ្លានពានពីសំណាក់ភាគីសៀម នៅតំបន់ប្រាសាទព្រះវិហារ និងតាមបណ្តោយជួរភ្នំដងរែក ដែលមានចេតនាចង់ឈ្លានពានទឹកដីកម្ពុជា តែត្រូវបានបរាជ័យទាំងស្រុង ដោយសារតែមាន ការការពារយ៉ាងមុតមាំបំផុតរបស់កងទ័ពកម្ពុជា ។
លោក ទេព រួន បន្តទៀតថា បើទោះបីជាបច្ចុប្បន្ននេះ សភាពការព្រំដែនមានភាពស្ងប់ស្កាត់ក៏ពិតមែន តែកងកម្លាំងទាំងអស់នៅតែបន្តហ្វឹកហ្វាត់ជំនាញ បន្តទៀត នឹងត្រៀមលក្ខណៈគ្រប់បែបយ៉ាង ក្នុងការការពារព្រំដែនមិនឲ្យមានសត្រូវណាចូលឈ្លានពានបានឡើយ ៕
ចែករំលែកព័តមាននេះ