ខេត្តកំពង់ធំ ៖ សមត្ថកិច្ចបានចាប់ខ្លួនយុវជនម្នាក់ កាលពីវេលាម៉ោង០២ និង៤០នាទីរសៀលថ្ងៃទី២២ មេសា បន្ទាប់ពីបានទទួលពាក្យបណ្តឹងពីបទរំលោភសេពសន្ថវៈលើក្មេងស្រីជាអនីតិជនអាយុ១៤ឆ្នាំ ។ លោកវរសេនីយ៍ឯក សួង…
ខេត្តកំពង់ធំ ៖ សមត្ថកិច្ចបានចាប់ខ្លួនយុវជនម្នាក់ កាលពីវេលាម៉ោង០២ និង៤០នាទីរសៀលថ្ងៃទី២២ មេសា បន្ទាប់ពីបានទទួលពាក្យបណ្តឹងពីបទរំលោភសេពសន្ថវៈលើក្មេងស្រីជាអនីតិជនអាយុ១៤ឆ្នាំ ។
លោកវរសេនីយ៍ឯក សួង ថេន អធិការនគរបាលស្រុកបារាយណ៍បានឱ្យដឹងថា យុវជនជាប់ចោទឈ្មោះ សួន ស្រេងហុង អាយុ១៩ឆ្នាំ រស់នៅក្នុងឃុំទ្រៀល ស្រុកបារាយណ៍ ។ ការចាប់រំលោភបានកើតឡើងកាលពីវេលាម៉ោង០៨ និង៣០នាទីយប់ថ្ងៃទី២១ ខែមេសា ខណៈក្មេងស្រីទៅស៊ីការគេ ហើយជួបជនសង្ស័យក៏ឱ្យជូនទៅផ្ទះ ដើម្បីផ្លាស់សម្លៀកបំពាក់ ។
បន្ទាប់ជនសង្ស័យបានឌុបនាងទៅផឹកទឹកត្នោតជូរនៅតូបលក់ទឹកត្នោតជូរមួយកន្លែង រួចហើយឆ្លៀតឱកាសនោះ ក៏ដឹកដៃនាងទៅខាងក្រោយតូប និងធ្វើសកម្មភាពបៀតបៀនកេរ្តិ៍ខ្មាស ។ ពេលនោះ នាងក៏ត្រឡប់ទៅផ្ទះវិញ ចំណែកជនសង្ស័យនៅផឹកទឹកត្នោតជូរបន្តទៀត ។ ពេលនាងទៅដល់ផ្ទះ ក៏និយាយរឿងរ៉ាវខាងលើប្រាប់ម្តាយ លុះនៅថ្ងៃ២២ មេសា វេលាម៉ោង១២និង៣០នាទីថ្ងៃត្រង់ ម្តាយនាងក៏ទៅដាក់ពាក្យបណ្ដឹងនៅប៉ុស្ដិ៍នគរបាលទ្រៀលឱ្យឃាត់ខ្លួនជនសង្ស័យតែម្ដង ។
នៅចំពោះមុខសមត្ថកិច្ច ជនសង្ស័យសារភាពថា ពិតជាបានធ្វើដូចពាក្យបណ្តឹងមែន ដោយសារតែរូបគេនិងនាងធ្លាប់មានទំនាក់ទំនងនឹងគ្នា មិនមែនជាការចាប់បង្ខំឡើយ ។ បើសិនជានាងមិនព្រម ហើយមិនធ្លាប់ស្រឡាញ់គ្នានោះ នាងស្រែកហើយ ហើយក៏មិនឱ្យរូបគេឌុបនាងទៅផ្ទះ រួចសុខចិត្តមកផឹកទឹកត្នោតជូរជាមួយរូបគេនោះដែរ ។
ទោះជាមានចម្លើយបែបនេះក្តី ក៏យុវជនរូបនេះ នៅតែមានទោសដែរ ព្រោះក្មេងស្រីជាអនីតិជន ៕
ចែករំលែកព័តមាននេះ