រាជធានីភ្នំពេញ ៖ វិនិយោគិនចិនមកពីខេត្តក្វាងស៊ី កំពុងសម្លឹងឃើញសក្ដានុពលវិនិយោគលើវិស័យនានានៅក្នុងប្រទេសកម្ពុជា និងបានត្រៀមខ្លួនចូលមកវិនិយោគក្នុងពេលឆាប់ៗខាងមុខ ។ នេះបើយោងតាមលោក ឆឹន អ៊ូ (Chen…
រាជធានីភ្នំពេញ ៖ វិនិយោគិនចិនមកពីខេត្តក្វាងស៊ី កំពុងសម្លឹងឃើញសក្ដានុពលវិនិយោគលើវិស័យនានានៅក្នុងប្រទេសកម្ពុជា និងបានត្រៀមខ្លួនចូលមកវិនិយោគក្នុងពេលឆាប់ៗខាងមុខ ។ នេះបើយោងតាមលោក ឆឹន អ៊ូ (Chen Wu) អភិបាលខេត្តក្វាងស៊ី បានថ្លែងក្នុងជំនួបជាមួយរដ្ឋមន្ត្រីក្រសួងពាណិជ្ជកម្មកម្ពុជា កាលពីល្ងាចថ្ងៃទី២៣ មេសា នៅសណ្ឋាគារសូហ្វីតែល ភ្នំពេញ ភូគីត្រា ។
លោក ឆឹន អ៊ូ បានឲ្យដឹងថា បច្ចុប្បន្ននេះ មានក្រុមហ៊ុនមកពីខេត្តក្វាងស៊ីមួយចំនួនហើយដែលបាននិងកំពុងបណ្ដាក់ទុនវិនិយោគលើវិស័យកសិកម្ម ដូចជា ដាំដំឡូងមីនៅខេត្តជាប់ព្រំដែនប្រទេសថៃ ជាដើម ហើយមានក្រុមហ៊ុនធំៗជាច្រើនទៀតបាននិងកំពុងសម្លឹងមើលពីសក្ដានុពលនានាក្នុងការវិនិយោគនៅកម្ពុជា និងត្រៀមខ្លួនចូលមកវិនិយោគក្នុងពេលឆាប់ៗខាងមុខនេះ ។
លោកបន្តថា ៖« វិនិយោគិនខេត្តក្វាងស៊ីរបស់យើងបានរាយការណ៍មកថា ពួកគេបានដាំដំឡូងមីនៅខេត្តជាយដែន និងបាននាំចេញដំឡូងមិនទាន់កែច្នៃទៅប្រទេសថៃ ព្រោះកម្ពុជាមិនទាន់មានម៉ាស៊ីនសម្ងួតគ្រប់គ្រាន់ ហើយម្យ៉ាងទៀត ការដឹកជញ្ជូនមកកាន់ភ្នំពេញ ក៏មានតម្លៃខ្ពស់ ។ ដូចនេះហើយពួកគេថា ជម្រើសល្អមានតែលក់ទៅប្រទេសថៃ ទើបអាចចំណេញ » ។
លោកក៏បានជំរុញឲ្យវិនិយោគិនទាំងនោះបន្ថែមការវិនិយោគ ដោយបង្កើតរោងចក្រកែច្នៃនៅនឹងកន្លែង ដើម្បីកែច្នៃផលិតផលដំឡូងមី ដែលផលិតបាន មុននឹងនាំចេញទៅកាន់ប្រទេសមួយទៀត ហើយលោកជឿជាក់ថា ពួកគេនឹងបង្កើតរោងចក្រកែច្នៃដំឡូងមីនៅកម្ពុជា ។
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានមានប្រសាសន៍ថា កម្ពុជាបានរៀបចំបង្កើតឡសម្ងួតបន្ថែមហើយសម្រាប់សម្ងួតផលិតផលកសិកម្មជាច្រើនទៀតក្រៅពីស្រូវ ដើម្បីរក្សាទុកសម្រាប់កែច្នៃមុននាំចេញ ហើយកម្ពុជាក៏មានសក្ដានុពលជាច្រើនសម្រាប់ឲ្យវិនិយោគិនខេត្តក្វាងស៊ីចូលមកវិនិយោគ ។ ជាក់ស្ដែង ក្រៅពីដំណាំស្រូវ និងដំឡូងមី ក៏មានដំណាំផ្លែឈើជាច្រើនទៀតសម្រាប់ឲ្យវិនិយោគិនកែច្នៃនាំចេញទៅប្រទេសផ្សេងៗ រួមទាំងចិនផងដែរ ។
លោកបន្តថា បច្ចុប្បន្ននេះ ក៏មានវិស័យមួយទៀតសម្រាប់វិនិយោគិនចូលមកវិនិយោគដែរ គឺការកែច្នៃឧស្សាហកម្មទឹកស្អាតនៅខេត្តកែប ខណៈខេត្តនេះមិនទាន់មានទឹកស្អាតគ្រប់គ្រាន់សម្រាប់ប្រើប្រាស់នៅឡើយ ហើយរដ្ឋមន្ត្រីក្រសួងឧស្សាហកម្ម និងសិប្បកម្ម ក៏បានស្វះស្វែងរកការវិនិយោគពីបណ្ដាវិនិយោគិននានាមកវិនិយោគទឹកស្អាតផ្គត់ផ្គង់ក្នុងខេត្តនោះ ។
លោកថា ៖« ខេត្តកែប ជាខេត្តជាប់មាត់សមុទ្រ ដូចនេះហើយបញ្ហាទាញយកទឹកពីក្នុងដីមកប្រើប្រាស់ផ្ទាល់ ក៏មិនសូវស្អាតល្អប៉ុន្មានដែរ អីចឹងហើយត្រូវការឲ្យមានការកែច្នៃបន្ថែមទៀត មុននឹងយកទៅប្រើប្រាស់តាមផ្ទះពលរដ្ឋ » ។
លោករដ្ឋមន្ត្រីបានបង្ហាញជំនឿជាក់ថា បន្ទាប់ពីជំនួបនេះ វិនិយោគិនចិននឹងចូលមកបណ្ដាក់ទុនបន្ថែមទៀតក្នុងប្រទេសកម្ពុជា ។ មិនតែប៉ុណ្ណោះ លោកក៏សង្ឃឹមថា កំណើនភ្ញៀវទេសចរចិនមកពីខេត្តក្វាងស៊ី ក៏នឹងកើនឡើងបន្ថែមទៀត ស្របពេលក្រុមហ៊ុនអាកាសចរណ៍ពីខេត្តក្វាងស៊ី ក៏គ្រោងនឹងបើកការហោះហើរត្រង់មកកាន់ខេត្តសៀមរាបផងដែរ ។
លោក Xiong Bo ឯកអគ្គរដ្ឋទូតសាធារណរដ្ឋប្រជាមានិតចិនប្រចាំកម្ពុជា បានឲ្យដឹងថា ក្នុងនាមជាស្ថានទូតចិនប្រចាំកម្ពុជា លោកនឹងទាក់ទាញវិនិយោគិនចិនបន្ថែមទៀតមកវិនិយោគក្នុងប្រទេសកម្ពុជា ហើយលោកនឹងព្យាយាមសម្របសម្រួលឲ្យការវិនិយោគនៅកម្ពុជារបស់វិនិយោគិនកាន់តែមានភាពរលូន និងរីកចម្រើន ។
ក្នុងឆ្នាំ២០១៧ ទំហំវិនិយោគចិនមកកម្ពុជា មានចំនួន១៤,៣ប៊ីលានដុល្លារអាមេរិក ឬស្មើ២៧%នៃទឹកប្រាក់វិនិយោគពីបរទេសសរុប ដែលចំនួននេះបានកើនឡើងស្ទើរពាក់កណ្ដាល បើធៀបនឹងឆ្នាំ២០១៦ ដែលមានត្រឹមតែ៧៤៨លានដុល្លារអាមេរិកប៉ុណ្ណោះ ។
កំណើនការវិនិយោគរបស់ចិនបានសម្រួលដល់ការធ្វើពិពិធកម្មវិស័យការងារសម្រាប់ប្រជាពលរដ្ឋ និងកំណើនសេដ្ឋកិច្ច ដោយសារគម្រោងចិនភាគច្រើនផ្តោតសំខាន់លើវិស័យសំណង់ កសិកម្ម ថាមពល ឧស្សាហកម្មកាត់ដេរ ធនាគារនិងហិរញ្ញវត្ថុ ទូរគមនាគមន៍ និងទេសចរណ៍ ដែលជាសសរស្តម្ភសំខាន់ៗនៃសេដ្ឋកិច្ច ។
ក្រៅពីកំណើនទឹកប្រាក់វិនិយោគ ស្ថានភាពពាណិជ្ជកម្មទ្វេភាគីរវាងចិន និងកម្ពុជា នៅក្នុងឆ្នាំ២០១៧ ក៏មានវឌ្ឍនភាពល្អប្រសើរផងដែរ ។ បើតាមទិន្នន័យផ្លូវការបានបង្ហាញថា ពាណិជ្ជកម្មនៃប្រទេសទាំងពីរសម្រេចបានដល់៥.៧៩០លានដុល្លារអាមេរិក ពោលគឺបានកើនឡើង២១,៧% បើប្រៀបធៀបនឹងឆ្នាំ២០១៦។ ទន្ទឹមគ្នានេះ ភ្ញៀវទេសចរចិនដែលបានចូលមកកម្ពុជា កាលពីឆ្នាំ២០១៧ មានចំនួន១.២១០.០០០នាក់ គឺបានកើនឡើងជិត៤៦% បើធៀបនឹងឆ្នាំ២០១៦ដូចគ្នា ៕
ចែករំលែកព័តមាននេះ