រាជធានីភ្នំពេញ ៖ គម្រោងសាងសង់កំពង់ផែនៅខេត្តកំពត ចាប់ផ្ដើមមានសកម្មភាពជាថ្មី បន្ទាប់ពីស្ងប់ស្ងាត់កន្លងមក ដោយកាលពីព្រឹកថ្ងៃទី២៤ មេសា ម្សិលមិញ ក្រុមហ៊ុនទ្រី ភាព…
រាជធានីភ្នំពេញ ៖ គម្រោងសាងសង់កំពង់ផែនៅខេត្តកំពត ចាប់ផ្ដើមមានសកម្មភាពជាថ្មី បន្ទាប់ពីស្ងប់ស្ងាត់កន្លងមក ដោយកាលពីព្រឹកថ្ងៃទី២៤ មេសា ម្សិលមិញ ក្រុមហ៊ុនទ្រី ភាព គ្រុប បានចុះហត្ថលេខាលើកិច្ចព្រមព្រៀងក្របខ័ណ្ឌកិច្ចសហប្រតិបត្តិការ ស្ដីពីកំពង់ផែកំពត ជាមួយក្រុមហ៊ុនកំពង់ផែអន្ដរជាតិនៃខេត្តគ័ងស៊ី ប្រទេសចិន ។
កិច្ចព្រមព្រៀងនេះ ក្នុងដំណាក់កាលដំបូង ក្រុមហ៊ុនទាំងពីរគ្រោងសិក្សាសាងសង់កំពង់ផែទឹកជ្រៅមួយ ដែលអាចអនុញ្ញាតឲ្យនាវាសមុទ្រធុនធំផ្ទុកទំនិញ១ម៉ឺនតោន ដល់៣ម៉ឺនតោន អាចចូលចត ផ្ទេរ និងផ្ទុកទំនិញបាន និងផ្តល់ការងារចំនួន៥០០កន្លែងនៅក្នុងដំណាក់កាលចាប់ផ្តើម ហើយចំនួននេះនឹងអាចកើនឡើងដល់១.៥០០កន្លែងបន្ថែមទៀតនៅក្នុងរយៈពេល៣ឆ្នាំបន្ទាប់ ។
អគ្គនាយកក្រុមហ៊ុន ទ្រី ភាព គ្រុប លោកឧកញ៉ា ទ្រី ភាព បានថ្លែងក្នុងពិធីចុះហត្ថលេខានេះថា ការបង្កើតកំពង់ផែនៅក្នុងខេត្តកំពត គឺមានគោលបំណងជំរុញវិស័យដឹកជញ្ជូនតាមផ្លូវទឹកឲ្យកាន់តែទូលាយ ក្នុងការធ្វើពាណិជ្ជកម្មរួមគ្នារវាងប្រទេសកម្ពុជា-ចិន ដែលជាផ្នែកមួយយ៉ាងសំខាន់ក្នុងការចូលរួមអភិវឌ្ឍន៍វិស័យដឹកជញ្ជូន ជាពិសេសការចូលរួមចំណែកជំរុញកំណើនសេដ្ឋកិច្ចសង្គម ។
ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយព្រឹទ្ធសភា រដ្ឋសភា និងអធិការកិច្ចលោកជំទាវ ម៉ែន សំអន បានថ្លែងថា កិច្ចសហប្រតិបត្តិការរវាងក្រុមហ៊ុនកម្ពុជា និងក្រុមហ៊ុនចិននៅពេលនេះ បានបញ្ជាក់ពីការលូតលាស់ឥតឈប់ឈរនៃកិច្ចសហប្រតិបត្តិការរវាងប្រទេសកម្ពុជា និងចិន ដែលជាប្រទេសមហាអំណាចសេដ្ឋកិច្ចលើលោក ជាប្រទេសទី១ដែលបានផ្តល់ជំនួយធំជាងគេដល់កម្ពុជា និងជាប្រភពនៃអ្នកវិនិយោគទុនបរទេសដ៏មានសក្តានុពល ព្រមទាំងជាដៃគូពាណិជ្ជកម្មដ៏ល្អបំផុត និងក៏ជាប្រទេសដែលមានចំនួនភ្ញៀវទេសចរដ៏ច្រើនដែលកំពុងមកទស្សនាកម្ពុជាផងដែរ ។
លោកជំទាវបន្តថា ការសម្រេចចិត្តសាងសង់កំពង់ផែអន្តរជាតិនេះ ពិតជាជម្រើសដ៏ត្រឹមត្រូវ ព្រោះខេត្តនេះជាទីតាំងយុទ្ធសាស្ត្រដ៏ល្អ ជាប់មាត់សមុទ្រដ៏ស្រស់ស្អាត ដែលមានសក្តានុពលសេដ្ឋកិច្ច និងពាណិជ្ជកម្មដ៏សំខាន់របស់កម្ពុជា ។ ការអភិវឌ្ឍកំពង់ផែ មិនអាចធ្វើឡើងតែឯកឯងបានទេ ពោលគឺត្រូវអភិវឌ្ឍន៍ជាអន្តរវិស័យដែលពាក់ព័ន្ធជាច្រើន ដូចជា ហេដ្ឋារចនាសម្ព័ន្ធ ការតភ្ជាប់ជាមួយផ្លូវដែក និងសន្តិសុខ ជាដើម ។
ខេត្តកំពត គឺជាទឹកដីដែលកំពុងមានសក្ដានុពលសេដ្ឋកិច្ចខ្លាំងទាំងវិស័យសេវាកម្ម និងឧស្សាហកម្ម និងស្ថិតក្នុងភូមិសាស្ត្រដែលមានសមុទ្រទឹកជ្រៅអំណោយផលដល់វិស័យដឹកជញ្ជូនតាមផ្លូវទឹកភ្ជាប់ទៅកាន់អន្តរជាតិ ជាហេតុធ្វើឲ្យខេត្តមួយនេះមានការចាប់អារម្មណ៍ពីអ្នកវិនិយោគទុនទាំងក្នុង និងក្រៅស្រុក ។
អភិបាលខេត្តកំពត លោក ជាវ តាយ បានថ្លែងប្រាប់កោះសន្តិភាពកាលពីថ្ងៃទី២៣ មេសា ថា ទៅថ្ងៃខាងមុខ ខេត្តមួយនេះនឹងមានការរីកចម្រើនខ្លាំង មិនថាវិស័យសំណង់ ហេដ្ឋារចនាសម្ព័ន្ធ ឬវិស័យអចលនទ្រព្យឡើយ ជាពិសេសកំណើនភ្ញៀវទេសចរ ដែលធ្វើឲ្យសេដ្ឋកិច្ចខេត្តមួយនេះរីកលូតលាស់ និងបង្កើនការងារដល់ប្រជាពលរដ្ឋដែលរស់នៅតំបន់នោះ ។
លោកថា ៖« ពាក់ព័ន្ធនឹងសក្ដានុពលសេដ្ឋកិច្ចបច្ចុប្បន្ននេះ កំពតមានកំពង់ផែចំនួន៤រួចមកហើយ ដែលបានផ្ដល់ការងារដល់ប្រជាពលរដ្ឋនៅក្នុងតំបន់ និងជាផ្នែកមួយទាក់ទាញភ្ញៀវទេសចរ និងអ្នកវិនិយោគទាំងក្នុង និងក្រៅស្រុកឲ្យមកដាក់ទុននៅខេត្តមួយនេះ » ។
លោកបន្តថា ៖« មួយរយៈចុងក្រោយនេះ សន្ទុះនៃការវិនិយោគរបស់ចិន គឺមានការកើនឡើងគួរឲ្យកត់សម្គាល់ ជាហេតុធ្វើឲ្យការទិញ-លក់ដីធ្លីក៏កាន់តែច្រើន និងមានតម្លៃខ្ពស់ជាងពេលមុនៗ ។ អីចឹង ការអភិវឌ្ឍក៏ចេះតែបន្តទៅមុខជាក់ជាមិនខាន » ។
ពាក់ព័ន្ធនឹងការចូលរួមអភិវឌ្ឍន៍កំពង់ផែនៅខេត្តកំពតនេះ សម្ដេចតេជោ ហ៊ុន សែន នាយករដ្ឋមន្ត្រី បានលើកឡើងថា កំពង់ផែនេះមានសារសំខាន់ណាស់ ហើយអាចជារបៀងមួយទៀតស្របតាមយុទ្ធសាស្ត្រផ្លូវមួយ ខ្សែក្រវាត់មួយរបស់ចិន ។ សម្ដេចលើកឡើងនេះក្នុងជំនួបពិភាក្សាការងារជាមួយអភិបាលតំបន់ស្វយ័ត ជនជាតិជាំងក្វាងស៊ី ប្រទេសចិន នៅវិមានសន្តិភាព រាជធានីភ្នំពេញ កាលពីព្រឹកថ្ងៃទី២៤ មេសា ម្សិលមិញនេះ ។
សម្តេចថ្លែងបញ្ជាក់ថា ៖« របៀងនោះមានសារសំខាន់ស្របពេលដែលថ្ងៃខាងមុខនេះ នឹងមានការពង្រីកផ្លូវជាតិលេខ៣ ឱ្យបានធំទូលាយជាងមុនពីរាជធានីភ្នំពេញ ទៅកាន់ខេត្តកំពត ដើម្បីកាត់បន្ថយការចំណាយពេលវេលាសម្រាប់ការដឹកជញ្ជូនទំនិញពីខេត្តកំពត មកកាន់រាជធានីភ្នំពេញ » ។
បន្ថែមពីនេះ សម្តេចបានលើកឡើងថា នៅអមសងខាងផ្លូវជាតិលេខ៣ មានរោងចក្រជាច្រើន និងបណ្ដាញវារីអគ្គិសនីសម្រាប់ផ្គត់ផ្គង់ប្រើប្រាស់ទៀតផង ដែលនេះជាអំណោយផល នៅក្នុងការធ្វើជាច្រករបៀងសេដ្ឋកិច្ចមួយបន្ថែមទៀត ៕
ចែករំលែកព័តមាននេះ