ខេត្តព្រះសីហនុ ៖ មន្ត្រីផ្លូវការមន្ទីរឧស្សាហកម្ម និងសិប្បកម្មខេត្តព្រះសីហនុឱ្យដឹងថា នៅព្រឹកថ្ងៃទី២៤ ខែមេសា ឆ្នាំ២០១៨ នេះក្រុមការងារការិយាល័យទឹកស្អាតបានចុះត្រួតពិនិត្យគុណភាពទឹករបស់ផ្នែកឯកជនដែលផ្គត់ផ្គង់នៅទីប្រជុំជនស្រុកព្រៃនប់ ក្រោយបណ្តាញផ្សព្វផ្សាយដកស្រង់ប្រភពពីប្រជាពលរដ្ឋមកផ្សាយថា ទឹកផ្គត់ផ្គង់តាមបណ្ដាញនៅវាលរេញល្អកខុសប្រក្រតីរហូតពលរដ្ឋរអ៊ូរទាំក្នុងនោះក្រុមការងារបានចុះដល់ទីតាំងផលិតទឹក និងពិនិត្យឃើញថា ទឹកក្នុងស្រះមានគ្រប់គ្រាន់ការផលិតបានត្រឹមត្រូវតាមបច្ចេកទេសទឹកថ្លាស្អាតធម្មតា ។
បន្ទាប់មកក្រុមការងារបានយកទឹកមកពិនិត្យគុណភាពមានលទ្ធផលដូចខាងក្រោម នៅទីតាំងផលិត PH 6.5 កម្រិតល្អក 0.38 ក្លរ 0.27 2.ចុងទុយោជិតផ្សារ PH 6.3 កម្រិតល្អក 1.45 ក្លរ 0.02 ។
ក្នុងករណីនេះក្រុមការងារបញ្ជាក់បានថា បញ្ហាទឹកដែលល្អកកាលពីថ្ងៃទី២២ ខែមេសា ឆ្នាំ២០១៨ គឺកើតឡើងដោយសារមានបែកទុយោមេប្រភេទ (PVC) ប្រវែងប្រមាណជា40ម៉ែត្រ បណ្ដាលមកពីការឈូសឆាយដីចិញ្ចើមថ្នល់ និងថាករណីនេះបានជួសជុលរួចរាល់វិញហើយ ចំណែកទឹកដែលប្រជាពលរដ្ឋបើកប្រើប្រាស់ក៏មិនមានបញ្ហាអីទៀតដែរគឹតត្រឹមយប់ថ្ងៃទី២៤ ខែមេសា ឆ្នាំ២០១៨ នេះហើយជាមួយគ្នានេះពលរដ្ឋសង្ឃឹមថានឹងមិនមានបញ្ហាទៀតឡើយ ហើយបើសិនជាមានសូមឱ្យម្ចាស់ទឹកស្អាត់គួរផ្តល់ព័ត៌មានដល់ពលរដ្ឋតាមរយៈភូមិ-ឃុំដល់អ្នកប្រើប្រាស់ដើម្បីងាយស្រួលដឹងពីមូលហេតុដែលបង្កឱ្យមានភាពអសកម្ម ៕
ចែករំលែកព័តមាននេះ