រាជធានីភ្នំពេញ ៖ អាជីវកម្មសិទ្ធិលក់បន្ត ឬហៅថា Franchise នៅក្នុងប្រទេសកម្ពុជា ត្រូវបានគេមើលឃើញថា កំពុងមានការប្រកួតប្រជែងទាំងម៉ាកពីក្រៅប្រទេស និងម៉ាកបង្កើតឡើងក្នុងស្រុក ។…
រាជធានីភ្នំពេញ ៖ អាជីវកម្មសិទ្ធិលក់បន្ត ឬហៅថា Franchise នៅក្នុងប្រទេសកម្ពុជា ត្រូវបានគេមើលឃើញថា កំពុងមានការប្រកួតប្រជែងទាំងម៉ាកពីក្រៅប្រទេស និងម៉ាកបង្កើតឡើងក្នុងស្រុក ។ ក្នុងនោះដែរ អាជីវកម្មបែបនេះ ក៏មានអាជីវករខ្លះទទួលជោគជ័យ ហើយក៏មានអ្នកខ្លះស្ទើរតែមិនរួចខ្លួន សម្រាប់ពីមួយខែទៅមួយខែ ។
តើការធ្វើអាជីវកម្ម Franchise មានគុណសម្បត្តិ និងគុណវិបត្តិអ្វីខ្លះ ហើយអ្នកចង់ធ្វើអាជីវកម្មមួយនេះ ត្រូវត្រៀមអ្វីខ្លះ ?
អ្នកជំនាញខាងអាជីវកម្មបែបនេះ បានឲ្យដឹងថា ជាទូទៅ នៅពេលដឹងថាខ្លួនមិនទាន់មានជំនាញ និងសមត្ថភាពគ្រប់គ្រាន់សម្រាប់បង្កើត ម៉ាកយីហោក្នុងស្រុកបានទេ ការនាំចូល Franchise ពីខាងក្រៅ គឺជាឱកាសល្អមួយសម្រាប់ធ្វើអាជីវកម្ម ប៉ុន្ដែក៏មិនប្រាកដថាទទួលជោគជ័យគ្រប់គ្នានោះដែរ ។
លោក គួច សុខលី អ្នកគ្រប់គ្រងទូទៅនៃក្រុមហ៊ុនCBM បានឲ្យដឹងថា ៖« បើយើងនាំចូល Franchiseត្រូវ យើងនឹងចំណេញ តែបើយើងនាំចូលខុស យើងនឹងខាតបង់ » ។
លោកបន្ដថា ៖« ការធ្វើអាជីវកម្មបែបនេះ វាមានទាំងគុណសម្បត្តិ ទាំងគុណវិបត្តិ ដូចនេះហើយទើបមុននឹងនាំចូល គឺត្រូវតែសិក្សាឲ្យបានច្បាស់លាស់ ដូចជា ទីផ្សារ និងតម្រូវការ ក៏ដូចជាវប្បធម៌រវាងប្រទេសយើង និងប្រទេសដែលយើងនាំចូលផងដែរ » ។
លោក ដួង តារា ស្ថាបនិកហាងកាហ្វេក្នុងស្រុកមួយ បានឲ្យដឹងថា គុណវិបត្តិនៃការធ្វើអាជីវកម្មនេះកើតមាន ដោយសារតែអ្នកទិញមិនបានសិក្សាឲ្យច្បាស់ពីម្ចាស់ Franchise នោះ ។
លោកបានលើកជាឧទាហរណ៍ថា ៖« ម៉ាកនោះទើបតែបើកបានរយៈពេលខ្លី និងមិនទាន់មានលំនឹងត្រឹមត្រូវផង ក៏ប្រកាសលក់ ដូចនេះអ្នកទិញអាចប្រឈមនឹងបញ្ហាខាតបង់ ខណៈម៉ាកនោះមិនទាន់មានអ្នកស្គាល់ ។ ពេលខ្លះម្ចាស់ Franchise គ្រាន់តែបង្កើតចោល ហើយប្រកាសលក់ ដោយមិនបានធ្វើប្រតិបត្តិការផ្ទាល់ អ្នកចង់ធ្វើអាជីវកម្ម Franchise ក៏មិនគួរទិញបន្តដែរ បើទិញហើយ ហានិភ័យនៃការខាតបង់នឹងមានខ្ពស់ » ។
លោកបន្ថែមថា ការមិនមានអ្នកគ្រប់គ្រងច្បាស់លាស់ទៅលើអាជីវកម្ម ក៏ជាហានិភ័យមួយដែរ វាមិនត្រឹមតែធ្វើឲ្យប៉ះពាល់ដល់អាជីវកម្មអ្នកទិញទៅធ្វើអាជីវកម្មបន្តទេ តែវាក៏ធ្វើឲ្យប៉ះពាល់ដល់ម៉ាកយីហោនោះទាំងមូលផងដែរ ដូចនេះហើយ រាល់ការទិញ Franchise ត្រូវទាមទារឲ្យមានប្រព័ន្ធគ្រប់គ្រងច្បាស់លាស់ ។
លោកនិយាយថា ៖« អ្វីដែលភាគីទាំងពីរ ទាំងអ្នកលក់និងអ្នកទិញត្រូវធ្វើ គឺត្រូវតាមដាន និងធ្វើការជាមួយគ្នា មិនមែនអ្នកលក់ លក់ហើយបោះបង់អ្នកទិញចោលនោះទេ ហើយអ្នកទិញក៏មិនមែនអាងតែមានលុយហើយ ទិញរួចចង់ធ្វើអី ធ្វើតាមចិត្តដែរ » ។
លោកតារា បន្ថែមថា គុណវិបត្តិមួយទៀតចំពោះអ្នកទិញ គឺនៅពេលទិញហើយ អ្នកលក់មិនមកចូលរួមខាតបង់ជាមួយទេ ក្នុងករណីអាជីវកម្មនោះមិនដើរ ឬខាតបង់នៅពេលធ្វើអាជីវកម្ម ។ តែអ្នកលក់អាចមានជម្រើសពីរ ក្នុងការជ្រើសរើស ទី១ កែអាជីវកម្មជាមួយនឹងម្ចាស់ម៉ាក ដោយកែយុទ្ធសាស្ត្រមួយចំនួនដើម្បីទាក់ទាញអតិថិជន ។ ជម្រើសមួយទៀត បើសិនជាកែទម្រង់ហើយ នៅតែមិនអាចដំណើរការទៅមុខបានទៀត អ្នកទិញ Franchise នោះ អាចលក់ទៅម្ចាស់ដើមវិញ ក្នុងទំហំទឹកប្រាក់ចរចាព្រមព្រៀងគ្នាណាមួយដើម្បីឲ្យខាតទាំងសងខាង ព្រោះអ្នកលក់ Franchise ក៏មិនចង់ឲ្យម៉ាកសញ្ញារបស់ខ្លួនត្រូវបិទទ្វារដែរ ។
លោកបញ្ជាក់ថា អាជីវកម្ម Franchise ទាំងអ្នកលក់ និងអ្នកទិញ សុទ្ធតែមានគុណវិបត្តិរៀងខ្លួន ដូចនេះហើយទើបការធ្វើអាជីវកម្មបែបនេះ ត្រូវទាមទារឲ្យមានការខិតខំធ្វើសហការទៅវិញទៅមក ៕
ចែករំលែកព័តមាននេះ