រាជធានីភ្នំពេញ ៖ វិស័យធនាគារនៅកម្ពុជាកំពុងមានការរីកចម្រើនគួរឲ្យកត់សម្គាល់ ហើយធនាគារជាច្រើនត្រូវបានបង្កើតឡើង និងកំពុងប្រតិបត្តិការផ្ដល់សេវាហិរញ្ញវត្ថុជូនដល់អតិថិជន ។ ប៉ុន្តែធនាគារទាំងនោះបានដើរតួនាទីខុសគ្នាទៅតាមកម្រិតទុនចុះបញ្ជីរបស់ខ្លួន ដែលអាជ្ញាធរធនាគារជាតិនៃកម្ពុជាបានផ្តល់ និងអនុញាត្ត ដើម្បីបង្កើតជាធនាគារពាណិជ្ជ…
រាជធានីភ្នំពេញ ៖ វិស័យធនាគារនៅកម្ពុជាកំពុងមានការរីកចម្រើនគួរឲ្យកត់សម្គាល់ ហើយធនាគារជាច្រើនត្រូវបានបង្កើតឡើង និងកំពុងប្រតិបត្តិការផ្ដល់សេវាហិរញ្ញវត្ថុជូនដល់អតិថិជន ។ ប៉ុន្តែធនាគារទាំងនោះបានដើរតួនាទីខុសគ្នាទៅតាមកម្រិតទុនចុះបញ្ជីរបស់ខ្លួន ដែលអាជ្ញាធរធនាគារជាតិនៃកម្ពុជាបានផ្តល់ និងអនុញាត្ត ដើម្បីបង្កើតជាធនាគារពាណិជ្ជ ឬធនាគារឯកទេស ។
តើធនាគារពាណិជ្ជ និងធនាគារឯកទេសមានភាពខុសគ្នាយ៉ាងដូចម្តេច នៅក្នុងឧស្សាហកម្មហិរញ្ញវត្ថុដែលកំពុងតែមានភាពរីកចម្រើននេះ ? ប្រធាននាយកប្រតិបត្តិធនាគារអេស៊ីលីដា ភី អិលស៊ី លោកបណ្ឌិត អ៊ិន ចាន់នី បានថ្លែងឲ្យដឹងតាមទូរស័ព្ទ នារសៀលថ្ងៃទី២៣ មេសា នេះថា ធនាគារពាណិជ្ជ និងធនាគារឯកទេស មានភាពខុសគ្នាលើទុនចុះបញ្ជី និងការផ្តល់សេវាកម្ម ដោយធនាគារពាណិជ្ជទុនចុះបញ្ជីអប្បបរមាចំនួន៧៥លានដុល្លារអាមេរិក និងអាចផ្តល់សេវាកម្មទាក់ទងនឹងវិស័យហិរញ្ញវត្ថុបានទាំងអស់ ដូចជាការផ្តល់ឥណទាន ការទទួលប្រាក់បញ្ញើ និងការទូទាត់ផ្សេងៗទៀត ។
ចំណែកធនាគារឯកទេសមានទុនចុះបញ្ជីតិចជាងនេះ ហើយសេវាកម្មរបស់ពួកគេអាចធ្វើបានតែមួយក្នុងចំណោមសេវាកម្មទាំងបីខាងលើប៉ុណ្ណោះ ឬអាចផ្តល់សេវាកម្មអាស្រ័យលើការផ្តល់ជូន ឬកម្រិតពីធនាគារជាតិនៃកម្ពុជា ។
លោកបណ្ឌិតបានបន្តថា ភាពខុសគ្នារវាងវិស័យធនាគារ គឺមានក្នុងកម្រិតនេះខុសគ្នាលើទុនចុះបញ្ជី និងចំនួនសេវាកម្មដែលអាចផ្តល់ជូនអតិថិជន ខណៈបច្ចុប្បន្ននៅកម្ពុជាមានធនាគារពាណិជ្ជចំនួន៣៩ និងធនាគារឯកទេសចំនួន១៣ ។
លោក ឆារស៍ វ៉ាន់ ប្រធានស្តីទីសមាគមធនាគារកម្ពុជាបានថ្លែងថា វិស័យធនាគារនៅកម្ពុជាកំពុងមានភាពរីកចម្រើនទោះបីជាចំនួនធនាគារថ្មីៗ មិនមានចូលមកកាន់ទីផ្សារនេះនៅដើមឆ្នាំនេះក្តី ប៉ុន្តែកម្រិតនៃការផ្តល់ឥណទាន និងប្រាក់បញ្ញើនៅតែកើនឡើង ដោយសារសេដ្ឋកិច្ចកម្ពុជាបន្តមានភាពរីកចម្រើន ការជឿទុកចិត្តលើវិស័យធនាគារកំពុងមានភាពល្អប្រសើរ ។ លោកបន្តថា ៖ « ការទុកចិត្តពីប្រជាពលរដ្ឋបានធ្វើឲ្យធនាគារនៅកម្ពុជាទទួលបានប្រាក់បញ្ញើកាន់តែច្រើន ដែលអាចប្រើប្រាស់ក្នុងប្រតិបត្តិការរបស់ខ្លួនបាន ប៉ុន្តែមិនគ្រប់នោះទេ គឺធនាគារនានានៅតែពឹងផ្អែកឥណទានពីបរទេសនៅឡើយ » ។
លោកបន្តថា ៖ «សន្តិភាព និងស្ថិរភាពនយោបាយនេះហើយ ដែលបានទាក់ទាញអ្នកវិនិយោគចូលមកកម្ពុជា ហើយនៅពេលការវិនិយោគកាន់តែច្រើន ធនាគារកាន់តែដើរតួនាទីសំខាន់ និងកាន់តែសកម្មក្នុងសេដ្ឋកិច្ចជាតិ » ៕
ចែករំលែកព័តមាននេះ