ខេត្តកំពង់ធំ ៖ បុរសម្នាក់ទៅស៊ីការតែមានការទាស់ពាក្យសម្តីគ្នា ពេលចេញមកវិញត្រូវអាស្ទាវព្រួតគ្នាចាក់ និងវាយរបួសធ្ងន់ ហេតុការខាងលើនេះបានបង្កឲ្យមានការភ្ញាក់ផ្អើលកាលពីវេលាម៉ោង៨និង៣០នាទីនៅយប់ថ្ងៃទី១៩ ខែមេសា ២០១៨ នៅចំណុចតាមដងផ្លូវជាតិលេខ៦ ក្នុងភូមិរពាក់ពេន ឃុំទ្រៀល ស្រុកបារាយណ៍ ខេត្តកំពង់ធំ ។
សមត្ថកិច្ចប្រាប់ឲ្យដឹងថា ជនរងគ្រោះឈ្មោះ វន វិន ភេទប្រុស អាយុ២៦ឆ្នាំ នៅភូមិរពាក់ពេន ឃុំទ្រៀល ស្រុកបាយណ៍ មានមុខរបរជាជាងជួសជុលរថយន្ត បានរងរបួសចំនួន០៣កន្លែង ត្រូវចំឆ្អឹងជំនីឆ្វេង០២កន្លែង និងក្បាលផ្នែកខាងឆ្វេង១កន្លែង ដោយសារដែកចុងស្រួច ហើយត្រូវបានបញ្ជូនទៅព្យាលបាលនៅពេទ្យត្រពាំងស្វាយ ស្រុកបារាយណ៍ ដែលបានបង្កឡើងដោយជនសង្ស័យមានគ្នាចំនួន០៣នាក់ ដោយនាំគ្នាព្រួតចាក់ និងវាយទៅលើជនរងគ្រោះ ។
ចំណែកជនសង្ស័យទាំងបីនាក់ត្រូវបានប្រជាការពារ ពលរដ្ឋ និងនគរបាលព័ទ្ធចាប់បានទី១- ឈ្មោះ ប៉ិន គឹមស្រួន ភេទប្រុស អាយុ២៣ឆ្នាំ មុខរបរកម្មករសំណង់ ទី២- ឈ្មោះ ប៉ិន គឹស្រឿន ភេទប្រុស អាយុ១៩ឆ្នាំ មុខរបរកម្មករសំណង់ ទាំងពីនាក់នៅភូមិអង្គនាង ឃុំទ្រៀល ស្រុកបារាយណ៍ និងទី៣- ឈ្មោះ ធឿន ភេទប្រុស អាយុ២៥ឆ្នាំ មុខរបរកាប់ជ្រូក រស់នៅភូមិរពាក់ពេន ឃុំទ្រៀល ស្រុកបារាយណ៍ ។
នៅមុនពេលកើតហេតុជនរងគ្រោះបានទៅស៊ីការគេនៅក្នុងភូមិ ហើយក៏បានទាស់ពាក្យសម្តីជាមួយ និងក្រុមជនសង្ស័យ លុះដល់ស៊ីការរួច ពេលដើរចេញពីរោងការបានប្រមាណប្រហែលជា២០០ម៉ែត្រ ខាងជើងរោងការ ស្រាប់តែក្រុមជនសង្ស័យស្ទាក់ចាក់ និងដែកចុងស្រួច ព្រួតគ្នាវាយជនរងគ្រោះ បណ្តាលឲ្យរបួសជាទម្ងន់ ។ ភា្លមៗនោះក្រុមប្រជាការពារ និងពលរដ្ឋ ព្រមទាំងសមត្ថកិច្ចបានអន្តរាគមន៍តាមឃាត់បានភ្លាមៗតែម្តង ។
សមត្ថកិច្ចបញ្ជាក់ថា អំពើហិង្សាខាងលើនេះ មូលហេតុ ជនសង្ស័យស្រវឹងស្រា និងបានទំនាស់ពាក្យសំដីគ្នា ។ ជនសង្ស័យទាំង៣នាក់ ត្រូវបានឃាត់ខ្លួនហើយ បញ្ជូនទៅអធិការដ្ឋាននគរបាលស្រុកបារាយណ៍ ដើម្បីចាត់ការតាមនីតិវិធីតាមផ្លូវច្បាប់ ៕
ចែករំលែកព័តមាននេះ