ប្រទេសហ្វ៊ីលីពីនបានបិទដំណើរការកោះទេសចរណ៍ Boracay របស់ខ្លួន គឺបង្ហាញពីសម្ពាធកើនឡើងលើកន្លែងកម្សាន្តតាមឆ្នេរសមុទ្រក្នុងតំបន់ទេសចរណ៍អាស៊ីអាគ្នេយ៍ ខណៈចំនួនភ្ញៀវទេសចរកើនឡើង ។
អ្នកជំនាញផ្នែកទេសចរណ៍បាននិយាយថា ហេដ្ឋារចនាសម្ព័ន្ធរបស់តំបន់នេះកំពុងតែរងសម្ពាធពីកំណើនភ្ញៀវទេសចរ ខណៈមានប្រជាជនចិនកាន់តែច្រើនធ្វើដំណើរទៅបរទេស ហើយអ្នកជំនាញទាំងនោះគិតថា នឹងអាចមានវិធានការផ្សេងទៀតនាពេលអនាគត ។
អាកាសយានដ្ឋានកាន់តែមានភាពវីវក់ សណ្ឋាគារត្រូវបានសាងសង់ឡើងយ៉ាងលឿនដោយមិនគិតពីសុវត្ថិភាព ឬអនាម័យ ខណៈឆ្នេរសមុទ្រពោរពេញទៅដោយសំរាម ហើយផ្កាសមុទ្រកំពុងតែងាប់ផងដែរ ។
ចំណែកប្រទេសថៃ ក៏មានគម្រោងបិទឆ្នេរ Maya Bay នៅកោះ Phi Phi ក្នុងខេត្ត Krabi ផងដែរ រីឯក្នុងប្រទេសឥណ្ឌូណេស៊ីវិញ ក្រុមសកម្មជនការពារបរិស្ថានបានស្នើឲ្យរដ្ឋាភិបាលចេញសកម្មភាពដោះស្រាយភ្លាមៗលើបញ្ហាកោះ Bali ។
លោក Brian King ផ្នែកគ្រប់គ្រងសណ្ឋាគារ និងទេសចរណ៍ នៃសាកលវិទ្យាល័យ Polytechnic ក្រុងហុងកុង បាននិយាយថា ៖«ទីតាំងជាច្រើនក្នុងតំបន់អាស៊ី គឺត្រូវតែសម្អាត។ អ្វីដែលគ្រោះថ្នាក់នោះ គឺគ្មានសកម្មភាពដោះស្រាយ លុះត្រាតែកើតមានបញ្ហាធ្ងន់ធ្ងរទៅហើយ » ។
ក្រុមហ៊ុនអាកាសចរណ៍បានចាប់ផ្តើមកាត់បន្ថយជើងហោះហើរទៅកាន់កោះ Boracay របស់ហ្វ៊ីលីពីន ដែលទទួលភ្ញៀវទេសចរប្រមាណ២លាននាក់កាលពីឆ្នាំមុន ក្នុងនោះភាគច្រើនមកពីប្រទេសចិន និងកូរ៉េខាងត្បូង។ ប្រទេសហ្វ៊ីលីពីនព្យាករថា ការបិទកោះនេះ នឹងកាត់បន្ថយ GDP របស់ប្រទេសប្រមាណ០,១% ។
ពួកគេក៏មានគម្រោងត្រួតពិនិត្យកន្លែងកម្សាន្តនៅតាមឆ្នេរសមុទ្រ Puerto Galera នៅលើកោះ Mindoro ផងដែរ ។ រីឯកន្លែងកម្សាន្ត El Nido និង Coron ក្នុងខេត្ត Palawan មើលឃើញចំនួនភ្ញៀវទេសចរកើនឡើង ខណៈមានការអភិវឌ្ឍយ៉ាងលឿន ៕
ចែករំលែកព័តមាននេះ