លំហូរទុនវិនិយោគផ្ទាល់ពីបរទេសមកកម្ពុជាមានកំណើនខ្លាំង២ឆ្នាំជាប់គ្នា
- ភ្នំពេញ
រាជធានីភ្នំពេញ ៖ ក្រសួងសេដ្ឋកិច្ច និងហិរញ្ញវត្ថុ បានព្យាករថា លំហូរទុនវិនិយោគផ្ទាល់ពីបរទេសមកកម្ពុជា(FDI) មានកំណើនខ្ពស់ ។ ដោយឡែក ទំហំពាណិជ្ជកម្ម…
រាជធានីភ្នំពេញ ៖ ក្រសួងសេដ្ឋកិច្ច និងហិរញ្ញវត្ថុ បានព្យាករថា លំហូរទុនវិនិយោគផ្ទាល់ពីបរទេសមកកម្ពុជា(FDI) មានកំណើនខ្ពស់ ។ ដោយឡែក ទំហំពាណិជ្ជកម្ម ការវិនិយោគផ្ទាល់ពីបរទេស និងការនាំចេញនៅឆ្នាំ២០១៨ អាចរំពឹងក្នុងរង្វង់ជាង១២ពាន់លានដុល្លារ ។
យោងតាមរបាយការណ៍ និងនិទស្សន៍ ការព្យាកររបស់ក្រសួងនេះបានបង្ហាញថា នៅឆ្នាំ២០១៩ ទំហំពាណិជ្ជកម្ម និងលំហូរទុនវិនិយោគផ្ទាល់ពីបរទេស នឹងកើនដល់ជាង១៣ពាន់លានដុល្លារ ហើយការនាំចេញឆ្នាំ២០១៨ មានទំហំទឹកប្រាក់ជាង១៥ពាន់លានដុល្លារ និងឆ្នាំ២០១៩កើនឡើងនូវទំហំទឹកប្រាក់ជាង១៧ពាន់លានដុល្លារអាមេរិកផងដែរ ។
អ្នកតាមដានដំណើរវិវឌ្ឍន៍នៃសេដ្ឋកិច្ចសង្គមកម្ពុជា បាននិយាយក្នុងលក្ខខណ្ឌមិនបញ្ចេញឈ្មោះថា ការមកដល់នៃការវិនិយោគបរទេសនៅកម្ពុជា មិនមែនជារឿងចៃដន្យនោះទេ ប៉ុន្តែវាជាអ្វីដែលជាការខិតខំរបស់រាជរដ្ឋាភិបាល តាមរយៈការរៀបចំច្បាប់ និងបទដ្ឋានគតិយុត្តនានា ពិសេសច្បាប់វិនិយោគដ៏ល្អរបស់កម្ពុជា ដែលអនុញ្ញាតឲ្យជនបរទេសអាចបោះទុនវិនិយោគ១០០% ។ ការផ្ទេរសាច់ប្រាក់ពីកម្ពុជា មិនមាននីតិវិធីស្មុគស្មាញ និងការប្រើប្រាស់ប្រាក់ដុល្លារយ៉ាងទូលំទូលាយនៅកម្ពុជា ជាដើម ។
លោកបន្តថា ៖« ឈរលើមូលដ្ឋានខាងលើនេះ គួបផ្សំនឹងកត្តាសុខសន្តិភាព ស្ថិរភាពនយោបាយ កំណើនសេដ្ឋកិច្ចកម្ពុជា បាននិងកំពុងក្លាយជាគោលដៅនៃការវិនិយោគពីអន្តរជាតិ» ។ លោកបន្តថា ៖« ស្ថិរភាពសង្គមរយៈពេលវែង និងកំណើននៃប្រាក់ចំណូលរបស់ប្រជាពលរដ្ឋ ក៏ជាផ្នែកដ៏សំខាន់មួយនៃការទាក់ទាញការវិនិយោគអន្តរជាតិផងដែរ » ។
អ្នកនាង អាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បានថ្លែងថា កម្ពុជាបានស្ថិតក្នុងក្រសែភ្នែកអ្នកវិនិយោគ និងជាប្រទេសស្ថិតក្នុងគោលដៅអ្នកវិនិយោគអន្តរជាតិ ដោយធ្វើឲ្យលំហូរទុនវិនិយោគបរទេសចូលមកកម្ពុជា មានការកើនឡើងយ៉ាងខ្លាំង និងខ្ពស់ជាងប្រទេសក្នុងតំបន់មួយចំនួនដូចជា ប្រទេសថៃ និងវៀតណាម ជាដើម ។
អ្នកនាងបន្តថា ៖« ជាមួយនឹងការសម្រេចបានកំណើនសេដ្ឋកិច្ចល្អប្រសើរ និងកត្តាសន្តិភាព ពិសេសភាពទាក់ទាញនៃវិស័យអចលនទ្រព្យ បានធ្វើឲ្យអ្នកវិនិយោគអន្តរជាតិកាន់តែច្រើនសម្លឹងមកកាន់កម្ពុជា » ៕
ចែករំលែកព័តមាននេះ