ខេត្តស្ទឹងត្រែង ៖ ករណីរក្សាទុករណាយន្តពីរគ្រឿងនៅសង្កាត់រដ្ឋបាលព្រៃឈើដុងក្រឡកាលពីព្រឹកវេលាម៉ោង៩និង៤៥នាទីថ្ងៃទី០២ ខែមេសា ឆ្នាំ២០១៨ បន្ទាប់ប្រជាសហគមន៍បុរីអូរស្វាយ រឹបអូសពីជនខិលខូចគ្រាដែលប្រព្រឹត្តសកម្មភាពកាប់បំផ្លាញព្រៃសហគមន៍ កាលពីថ្ងៃទី០១ ខែមេសា ឆ្នាំ២០១៨ ។
ប្រភពព័ត៌មានឲ្យដឹងថា កាលពីថ្ងៃទី០១ ខែមេសា ឆ្នាំ២០១៨ ចលនាកម្លាំងប្រជាសហគមន៍បានចុះល្បាតព្រៃដែលជាដែនដីសហគមន៍បុរីអូរស្វាយ ដោយបានប្រទះឃើញជនខិលខូចមួយក្រុម កំពុងធ្វើសកម្មភាពអារឈើទើបមានការរារាំងបញ្ជាឲ្យបញ្ឈប់សកម្មភាពនោះ ព្រមទាំងបានដកហូតរណាយន្តចំនួនពីរគ្រឿង និងណែនាំអប់រំ បើនៅតែហ៊ានចូលអារព្រៃឈើទៀតនឹងឃាត់ខ្លួនប្រគល់ឲ្យសមត្ថកិច្ចចាត់ការតាមនីតិវិធីច្បាប់ ។
លោក ហ៊ម សាវ៉ន មេប៉ុស្តិ៍រដ្ឋបាលឃុំអូរ ស្វាយឲ្យដឹងថា រណាយន្តចំនួនពីរគ្រឿងនោះប្រជាសហគមន៍បុរីអូរស្វាយរឹបអូសពីជនខិលខូចលួចចូលកាប់ព្រៃឈើនៅដែនសហគមន៍ កាលពីថ្ងៃទី០១ ខែមេសា ឆ្នាំ២០១៨ ហើយនៅព្រឹកថ្ងៃទី០២ ខែមេសានេះ ពួកគាត់បានប្រគល់ឲ្យជំនាញរដ្ឋបាលព្រៃឈើសង្កាត់ដុងក្រឡនៅមុខប៉ុស្តិ៍រដ្ឋបាលឃុំអូរស្វាយ ដើម្បីដឹងឮនាំទៅរក្សាទុកជាសម្បត្តិរដ្ឋ ។
មន្ត្រីរដ្ឋបាលព្រៃឈើសង្កាត់ដុងក្រឡបានឲ្យដឹងថា កាលពីវេលាម៉ោងជិត១០ព្រឹកថ្ងៃទី២ ខែមេសា ឆ្នាំ២០១៨ ប្រជាសហគមន៍បុរីអូរស្វាយបានប្រគល់រណាយន្តម៉ាកស្ទៀលចំនួនពីរគ្រឿង ជូនមកសង្កាត់រដ្ឋបាលព្រៃឈើដុងក្រឡ ដើម្បីរក្សាទុកជាសម្បត្តិរដ្ឋ ក្រោយពួកគាត់ចុះល្បាតនៅដែនព្រៃសហគមន៍ ដោយប្រទះឃើញជនខិលខូចកំពុងកាប់បំផ្លាញព្រៃឈើគ្មានការអនុញ្ញាតកាលពីថ្ងៃទី០១ ខែមេសា ឆ្នាំ២០១៨ ។
បច្ចុប្បន្នក្រោយធ្វើកំណត់ហេតុប្រគល់ទទួល រួចវត្ថុតាងខាងលើនោះក៏បានរក្សាទុកនៅសង្កាត់រដ្ឋបាលព្រៃឈើដុងក្រឡរួចរាល់ហើយដែរ ៕
ចែករំលែកព័តមាននេះ