ប្រទេសឥណ្ឌា ៖ ប៉ូលិសរាយការណ៍នាថ្ងៃទី១ មេសា ថា មនុស្ស១៦នាក់ស្លាប់ក្នុងការប្រយុទ្ធគ្នានានារវាងកងទ័ពឥណ្ឌា និងពួកឧទ្ទាមនៅតំបន់កាស្មៀរដែលមានជម្លោះ ។
ទាហានឥណ្ឌា៣នាក់ និងមនុស្ស១១នាក់ ចាត់ទុកជាពួកបះបោរ ព្រមទាំងជនស៊ីវិល២នាក់បានត្រូវស្លាប់ក្នុងការប៉ះទង្គិចគ្នាជាច្រើននៅភាគខាងត្បូងទីក្រុងស្រីុណាហ្គា រដ្ឋធានីនៃរដ្ឋកាស្មៀរឥណ្ឌា ។
ម្យ៉ាងវិញទៀត បាតុកម្មនានាកើតមាននៅទីក្រុងនេះដោយសាលារៀនទាំងឡាយនៅតែបិទទ្វារនាថ្ងៃទី២ មេសា មកពីការអំពាវនាវថ្មីៗរបស់បណ្តាក្រុមឧទ្ទាមឱ្យធ្វើបាតុកម្ម។
ឥណ្ឌាចោទប្រកាន់ប៉ាគីស្ថានថា បំពាក់អាវុធ និងជួយហ្វឹកហ្វឺនពួកឧទ្ទាមនៃក្រុម LASHKAR-E-TAIBA ព្រមទាំងក្រុមប្រដាប់អាវុធឯទៀតៗនៅកាស្មៀរ ក៏ប៉ុន្តែប៉ាគីស្ថានបានបដិសេធ ។
កាលពីឆ្នាំ២០១៧ ពួកឧទ្ទាមកាស្មៀរយ៉ាងតិច២០៦នាក់ សមាជិកកងកម្លាំងសន្តិសុខឥណ្ឌា៧៨នាក់ និងជនស៊ីវិល៥៧នាក់ស្លាប់នៅកាស្មៀរដែលញ៉ាំងឱ្យឆ្នាំនោះជាឆ្នាំយ៉ាងបង្ហូរឈាមក្នុងតំបន់នេះ ៕
ចែករំលែកព័តមាននេះ